အီရန် နျူကလီးယား သဘောတူညီမှုကို ဆက်လက် လိုက်နာရန် ခြွင်းချက်ဖြင့် ထရမ့်သဘောတူ

အီရန်၏ နျူကလီးယား ထိန်းချုပ်ရေး သဘောတူညီမှုကို ခြွင်းချက် အခြေအနေ အချို့ဖြင့် အမေရိကန်က ဆက်လက် လေးစား လိုက်နာ ကျင့်သုံးနေမည်ဟု သမ္မတ ဒေါ်နယ်လ်ထရမ့်က ကြေညာခဲ့သည်။

အစောပိုင်းတွင် ထရမ့်က ယခင် အမေရိကန် သမ္မတဟောင်း ဘာရတ် အိုဘားမား လက်ထက်က ရရှိခဲ့သည့် အီရန် နျူကလီးယား ထိန်းချုပ်ရေး သဘောတူညီမှုများကို ဆက်လက် မလိုက်နာတော့ဘဲ အီရန်အပေါ် ပယ်ဖျက်ထားသည့် အရေးယူ ပိတ်ဆို့မှုများကို ပြန်လည် ကျင့်သုံးလာနိုင်ကြောင်း ခြိမ်းခြောက်ခဲ့သည်။

ဇန်နဝါရီ ၁၂ ရက်တွင်မူ ထရမ့်က အဆိုပါ သဘောတူညီမှုကို မိမိ၏ အစိုးရ အနေဖြင့် ဆက်လက် လက်ခံထားမည် ဖြစ်သော်လည်း တစ်ဖက်တွင် အီရန်ကို မျက်စိဒေါက်ထောက် စောင့်ကြည့်နေမည်ဟု သတိပေးသွားခဲ့သည်။ ထို့အပြင် သဘောတူညီမှုပါ အချက်အလက်များကို ပြင်ဆင် ရေးသားရန်လည်း ၎င်းက တောင်းဆိုထားသည်။

အမေရိကန် အနေဖြင့် ရက်ပေါင်း ၁၂၀ ကြာတိုင်း အီရန်နှင့် ပတ်သက်၍ ပြန်လည် ဆန်းစစ်မှု တစ်ခုကို ပြုလုပ်မည်ဖြစ်ပြီး ယခုသဘောတူညီမှု မတိုင်ခင်က ထားရှိသည့် အရေးယူ ပိတ်ဆို့မှုများကို အချိန်မရွေး ပြန်လည် ကျင့်သုံးလာနိုင်ကြောင်း ထရမ့်က ပြောကြားခဲ့သည်။

ထရမ့်၏ ဆုံးဖြတ်ချက်သည် အီရန် နျူကလီးယား သဘောတူညီမှုကို ဆက်လက် ထိန်းသိမ်းထားလိုသည့် ဥရောပ မဟာမိတ် နိုင်ငံများအတွက် ယာယီ အသက်ရှူချောင်စရာ ဖြစ်လာသည်။ သို့သော် ထရမ့်က ဥရောပ မဟာမိတ်များကို ရည်ရွယ်ကာ အီရန်နျူကလီးယား သဘောတူညီမှု စာချုပ်တွင် ပါရှိသည့် အားနည်း ယိုယွင်းနေသော အချက်များကို ပြင်ဆင်ရန် သတိပေးခဲ့ပြီး မပြင်ဆင်နိုင်ပါက အမေရိကန်သည် အဆိုပါ သဘောတူညီမှုကို ဆက်လက် အသိအမှတ် ပြုတော့မည် မဟုတ်ဟု ခြိမ်းခြောက်သွားခဲ့သည်။

“နျူကလီးယား အရေးနဲ့ ပတ်သက်လို့ အရေးယူ ပိတ်ဆို့မှုတွေကို ကျုပ်က ပယ်ဖျက်ပေးလိုက်ချင်ပါတယ်။ ဒါကလည်း ကျုပ်တို့ရဲ့ ဥရောပ မဟာမိတ်တွေက အီရန် နျူကလီးယား ထိန်းချုပ်ရေး သဘောတူညီမှုနဲ့ ပတ်သက်လို့ ဆိုးရွားလွန်းတဲ့ အားနည်းချက်တွေကို ပြင်ဆင် ဖယ်ရှားပေးနိုင်မယ် ဆိုရင်ပေါ့။ ဒါဟာ နောက်ဆုံး အခွင့်အရေး ပေးခြင်းပါ”ဟု ထရမ့်က ကြေညာခဲ့သည်။

၎င်းက အီရန်နျူကလီးယား ထိန်းချုပ်ရေး သဘောတူညီမှုကို မိမိလက်ထက်တွင် ဆိုပါက အမေရိကန် အနေဖြင့် လက်ခံ လိုက်နာခဲ့မည် မဟုတ်ကြောင်း၊ ယခုလည်း ယင်းသဘောတူညီချက်မှ နုတ်ထွက်ခြင်းမျိုး အချိန်မရွေး ဖြစ်နိုင်ကြောင်း သတိပေး ပြောကြားသွားသည်။

Ref: CNN

Top News