ဆော်ဒီတွင် ပထမဆုံးအကြိမ်အဖြစ် အမျိုးသမီးများ ဘောလုံးကွင်းထဲ ဝင်အားပေးခွင့်ရ

နိုင်ငံ၏ သမိုင်းဝင် အပြောင်းအလဲ တစ်ရပ်အဖြစ် ဆော်ဒီအာရေးဘီးယားတွင် အမျိုးသမီးများကို ဘောလုံးကွင်းအတွင်း ပထမဆုံးအကြိမ် ဝင်ရောက် အားပေးခွင့် ပြုလိုက်ပြီ ဖြစ်သည်။

ပြီးခဲ့သည့် နှစ်ကုန်ပိုင်းက ဆုံးဖြတ်ခဲ့သည့် စည်းမျဉ်း အပြောင်းအလဲကို ဇန်နဝါရီ ၁၂ ရက်က ဂျာဒါးမြို့တွင် အာဏာပိုင်များက စတင် အကောင်အထည် ဖော်လာခဲ့သည်။ မြို့ထဲရှိ အားကစားရုံ တစ်ခုထဲသို့ အမျိုးသမီး ပရိသတ်များ ပထမဆုံးအကြိမ် ဝင်ရောက်လာပြီး မိသားစုဝင်များနှင့်အတူ ဘောလုံးပွဲ အားပေးခွင့် ရခဲ့သည်။

ဆော်ဒီ အစိုးရ၏ ပြုပြင်ပြောင်းလဲရေး လုပ်ငန်းစဉ်များတွင် အမျိုးသမီးများအပေါ် အစဉ်အဆက် ဖိနှိပ် တင်းကျပ်လာသည့် ဓလေ့ထုံးစံများကို ဖြေလျှော့ပေးရန် အလေးအနက် ထည့်သွင်း ဆောင်ရွက်နေပြီး ယခုသတ်မှတ်ချက်အရ မိသားစုဝင်များနှင့်အတူ အမျိုးသမီးများ ဘောလုံးပွဲ ကြည့်နိုင်ရန်အတွက် အားကစားကွင်းများတွင် သီးသန့် ဧရိယာများ ဖြည့်တင်း တပ်ဆင် တည်ဆောက်ပေးခဲ့သည်။

အမျိုးသမီးများ အနေဖြင့် လက်မှတ်ဝယ်ပြီးချိန်တွင် မိသားစုဂိတ်ပေါက်မှ ကွင်းထဲဝင်ပြီး မိသားစု ဧရိယာများတွင်သာ ပွဲကြည့်ခွင့် ရမည်ဖြစ်သော်လည်း ယင်းအပြောင်းအလဲကပင် ဆော်ဒီ၏ အမျိုးသမီး အခွင့်အရေး လှုပ်ရှားမှုတွင် ထင်ရှားသည့် အချိုးအကွေ့ ဖြစ်လာသည်။

ထိုနေ့တွင်ပင် ထူးခြားမှု တစ်ခုအဖြစ် ဂျာဒါး၌ အမျိုးသမီး ယာဉ်မောင်းများအတွက် အဓိက ရည်ရွယ်ထားသည့် ပထမဆုံး ကားပြခန်းကို ဖွင့်လှစ်ခဲ့သည်။ ဆော်ဒီတွင် အမျိုးသမီးများကို ကားမောင်းခွင့် မပေးဘဲ ပိတ်ပင်ထားခြင်းကို ပြီးခဲ့သည့် နှစ်ကုန်ပိုင်းတွင် စတင် ပယ်ဖျက်ပေးခဲ့သည်။ အမျိုးသမီးများ ကားလိုင်စင် လျှောက်ထားခွင့် ရလာပြီး ကိုယ်တိုင် ကားမောင်းရန် အခွင့်အရေး ရှိလာသည်။

ဂျာဒါးရှိ အားကစားရုံထဲတွင်မူ အမျိုးသမီး ဧည့်ကြိုများက အမျိုးသမီး ပရိသတ်များကို နေရာချ ကူညီပေးခဲ့သည်။ ၎င်းတို့သည် မြို့ခံ အသင်းတစ်သင်းကို ပျော်ရွှင်စွာ အားပေးခဲ့ကြကြောင်း မျက်မြင်များက ဆိုသည်။ သို့သော် အမျိုးသမီး ပရိသတ်များရော၊ ဧည့်ကြိုများပါ အစ္စလာမ်မစ် ရိုးရာ ဓလေ့အတိုင်း အနက်ရောင် ခြုံထည်များကို ဝတ်ဆင်လာရသည်။

ဆော်ဒီ အစိုးရက လာမည့် ရက်ပိုင်းအတွင်း ကစားစေမည့် နောက်ထပ် ဘောလုံးပွဲ နှစ်ပွဲသို့လည်း အမျိုးသမီး ပရိသတ်များ တက်ရောက် အားပေးခွင့်ရရန် စီစဉ်ထားကြောင်း အတည်ပြု ကြေညာထားသည်။

Ref: BBC

Top News