မွန်ပြည်နယ်တွင် တစ်နှစ်အတွင်း သစ်မာသားများ အများဆုံးဖမ်းမိ

 မွန်ပြည်နယ်တွင် ၂၀၁၇ အတွင်း တရားမ၀င် သစ်တန်ချိန် ၆၁၃ တန်ကျော် ဖမ်းဆီးမိခဲ့သည့်အနက် သစ်မာသားအများဆုံး ပါဝင်ကြောင်း မွန်ပြည်နယ် ပြည်နယ်သစ်တောဦးစီးဌာန ညွှန်ကြားရေးမှူး ဦးမင်းသိန်းမြင့်က ပြောသည်။

တစ်ပြည်နယ်လုံးတွင် ၂၀၁၇ ဇန်န၀ါရီမှ ဒီဇင်ဘာအတွင်း ကျွန်း သစ် ၄၇ဒသမ၁၉၉၆ တန်၊ သစ်မာ ၄၉၂ဒသမ ၃၇၁၆ တန်နှင့် အခြားသစ် ၇၃ဒသမ ၉၆၇၂ တန်ချိန် ဖမ်းဆီးမိခဲ့ပြီး စုစုပေါင်း ၆၁၃ ဒသမ ၅၃၈၄ တန်ဖြစ်ကြောင်း ပြည်နယ်သစ်တောရုံးဖမ်းဆီးရမှု လအလိုက်စာရင်းများ၌ ဖော်ပြထားသည်။

‘‘ကျွန်းသစ်၊ သစ်မာတွေဖမ်း မိရင် နိုင်ငံတော်ကနေ တိုက်ရိုက် လေလံပေးတယ်။ တခြားသစ်တွေကိုတော့ ပြည်နယ်ဖွံ့ဖြိုးရေးအ တွက် လိုအပ်တဲ့နေရာမှာ ကျွန် တော်တို့ကနေ တိုက်ရိုက်လေလံ ပစ်ပေးတယ်’’ဟု ဦးမင်းသိန်းမြင့် က ပြောသည်။

ယခု ဖမ်းဆီးထားသည့် တရားမ၀င်သစ်များသည် ပေါင်၊ မုဒုံ၊ မော်လမြိုင်မြို့နယ်တို့မှ အများဆုံးဖမ်းဆီးမိပြီး တစ်နှစ်အတွင်း တရားမ၀င်သစ်သယ်ဆောင်သူများနှင့် ပိုင်ရှင်များကို တရားစွဲထားသည့် တရားခံ ၁၀၀ နှင့် အမှု ၁၀၀ ရှိကြောင်း ပြည်နယ်သစ် တောရုံးမှ တာဝန်ရှိသူတစ်ဦးက ဆိုသည်။

‘‘ဒီနှစ် ဖမ်းဆီးမိထားတဲ့ စာရင်းအရတော့ သစ်မာသား အများဆုံးပါ။ မွန်ပြည်နယ်မှာ တရားမ၀င်သစ်ကားတွေ ဒီနှစ်မှာ ပိုဖမ်းမိလာတယ်’’ဟု အထက်ပါ တာဝန်ရှိသူက ပြောသည်။

မွန်ပြည်နယ်ရှိ သစ်စက်များတွင် တရားမ၀င်သစ်များရှိ၊ မရှိတစ်လတစ်ကြိမ်စစ်ဆေးပြီး ဖမ်းဆီးမိသည့် ကျွန်း၊ ပိတောက်သစ်များကို ရောင်းချခြင်းမရှိဘဲ နိုင်ငံတော် (မြန်မာနိုင်ငံသစ်ထုတ်လုပ်ရေးလုပ်ငန်း)သို့ ပေးပို့ရကြောင်း ဦးမင်းသိန်းမြင့်က ဆိုထားသည်။

မွန်ပြည်နယ်တွင် တန်ချိန် ၆,၀၀၀ အောက်ထုတ်လုပ်သည့် သစ်စက် ၇၀ ခု၊ အချောထုတ်လုပ်သည့် သစ်စက် လေးခု၊ လျှာထိုးသစ်စက် ၂၂ ခု၊ အိမ်တွင်း ပရိဘောဂသစ်စက် ၁၈၁ ခု၊ စုစု ပေါင်းသစ်စက် ၂၇၇ ခုရှိသည်။

၂၀၁၆-၁၇ ဘဏ္ဍာနှစ်တွင် ဖမ်းဆီးမိသော ကျွန်းလုံး ၅ဒသမ ၆၉၁၆ တန်၊ ကျွန်ခွဲသား ၁၆ဒသမ၃၅၃၉ တန်၊ သစ်မာလုံးခွဲသား ၂၉၈ဒသမ၆၂၃၇ တန်၊ အခြား သစ်လုံး ၁၇၈ဒသမ၉၅၅၄ တန်၊ အခြားခွဲသားသစ် ၈၃ဒသမ၇၀၉၂တန်၊ စုစုပေါင်းဖမ်းဆီးမိသည့် တရားမ၀င်သစ် ၅၈၃ ဒသမ ၃၃၄၀ တန်ရှိသည်။

More in Regional Section