ပါမောက္ခချုပ်မိတ်ဆက် (လူအောင်-၀မ်းတွင်း)

ပါမောက္ခချုပ်ဆရာတော်ဒေါက်တာနန္ဒမာလာ ဘိဝံသဟောကြားခဲ့သော တရားတော်များအနက် ကောင်းနိုးရာရာကို စိစစ်ထုတ်နုတ်၍ဖော်ပြထား သော စာအုပ်ဖြစ်သည်။ ယခုနာယူကောက်နုတ်သူ လူအောင်(၀မ်းတွင်း)သည် ရဟန်းတော်တိုင်းအောင် မြင်ရန် ခက်ခဲသောမန္တလေးသကျသီဟဓမ္မာစရိယ အောင်မြင်ခဲ့သူဖြစ်ပါသည်။ ၎င်းက ပါမောက္ခချုပ် ဆရာတော်၏တရားတော်များကို ကျေကျေညက် ညက်နာယူကာ ယခုလိုပြန်လည်စုစည်းထားခြင်းဖြစ် သည်။ ဥပမာ-စာအုပ်ပါကောက်နုတ်ချက်များကို ယခုလိုဖတ်ရပါမည်။


ဆုတောင်းပြည့်

ခုခေတ်တော့ လူတွေကလမ်းလွဲကြတယ်။

ဆုတောင်းပြည့်ဘုရားဆိုပြီး ဆုတောင်းကြတယ်။

တကယ်တော့ ဆုတောင်းပြည့်တယ်ဆိုတာ

ဘုရားနဲ့မဆိုင်ဘူး၊ ကိုယ်နဲ့ပဲဆိုင်တယ်။

ကိုယ့်မှာ သဒ္ဓါ၊ သီလ၊ သုတ၊ စာဂ၊ ပညာတွေ

မရှိရင် ဘယ်လောက်ဆုတောင်းတောင်း မပြည့်ဘူး။

ကိုယ့်မှာ လိုအပ်တဲ့အရည်အချင်းမှမရှိတာ။

အရည်အချင်းမရှိဘဲနဲ့

အလုပ်သွားလျှောက်ရင် အလုပ်ဘယ်ရမလဲ။

အဲဒီလိုပါပဲ။

(စိုးရိမ်စိတ်ကိုဖယ်ရှားခြင်း တရားတော်)

အုန်း၊ ငှက်ပျော

အရှင်ကြီး မစတော်မူပါတဲ့။

ပြောရရင်

တန်ခိုးရှင်က ငှက်ပျောသီးနဲ့အုန်းသီးဘာလုပ်မှာလဲ။

မဟုတ်ဘူးလား။

အချိန်မရွေး ရနိုင်တဲ့သီးနှံမို့ အဲဒါလုပ်ထားတာ၊

တခြားသီးနှံက ရာသီအလိုက်ပဲ သီးတာလေ၊

ဘာမှမဟုတ်ဘူး။

ရတဲ့ပစ္စည်းခိုင်အောင်လို့တဲ့ ရခိုင်သီးမှ ထိုးတယ်။

ကြမ်းမှာကြောက်လို့ ဖီးကြမ်းမထိုးဘူးတဲ့။

(ကိုးကွယ်ခြင်း၏ အမြင့်ဆုံးရည်မှန်းချက် တရားတော်)

အသံချဲ့စက်

ဗုဒ္ဓဘာသာဖြစ်ပြီး ဘုရားစကားနားမထောင်ဆုံးက

ဘုန်းကြီးတို့ ဗမာလူမျိုးတွေပဲ။

မြတ်စွာဘုရားက

‘အပ္ပသဒ္ဒကာမာ အပ္ပသဒ္ဒ၀ိနီတာ...’

အသံတိုးတာကို မြတ်နိုးတော်မူတယ်။

သာရေးဖြစ်ဖြစ်၊နာရေးဖြစ်ဖြစ်

အသံချဲ့စက်ကြီးတွေ အော်ဖွင့်နေတာ

ဗမာပြည်ပဲ ရှိတယ်။

(လောကသားတို့အတွက် မြတ်ဗုဒ္ဓ၏ကြိုးပမ်းချက် တရားတော် အပိုင်း-၃၁)

သန္တုဋ္ဌိပရမံ ဓနံ

ဘုရားရှင်က ပိုင်ဆိုင်မှုကို တားမြစ်တာမဟုတ်ဘူး။

အဲဒီပိုင်ဆိုင်မှုအပေါ် တွယ်တာတပ်မက်ခြင်းကိုသာ

တားမြစ်တာ။

ပိုင်ဆိုင်တာမကောင်းဘူးလို့ မဟောဘူး၊

တွယ်တာတာကိုပဲ မကောင်းဘူးလို့ပြောတာ။

ဘာကြောင့်လဲ၊

တွယ်တာမှုဟာ သောကကိုဖြစ်စေတတ်လို့...။

‘သန္တုဋ္ဌိပရမံ ဓနံ’ ဆိုတာ အဲဒါကိုပြောတာ။

(အကောင်းဆုံးကို ရွေးချယ်ခြင်းအကြောင်း တရားတော်)

အခြေခံ

ဘုရားရဲ့အဆုံးအမက...

ယုံကြည်မှုကို အခြေမခံဘူး။

သိမြင်နားလည်မှုကို အခြေခံတယ်။

(ကုသိုလ်ဖြစ်ကြောင်း တရားတော်)

အဘိဓမ္မာ

အဘိဓမ္မာသင်တယ်ဆိုတာ

ကိုယ့်အကြောင်းကိုယ် ပြန်ပြီးလေ့လာတာ။

လူဆိုတာက

သူများအကြောင်းပဲ စိတ်ဝင်စားတတ်တယ်။

တရားဆိုတာ ဒါတွေပြောတာ။

တခြားသွားမရှာနဲ့။

ပထမ သင်ရတယ်။

ပြီးရင် ဆင်ခြင်ရတယ်။

ဆင်ခြင်မှ တွယ်တာမှုကို လျှော့ချနိုင်တယ်။

(ဓမ္မပညာသင်တန်း)

စာအုပ်ကို ဓမ္မဒါနပြုလိုသူများနှင့် ၀ယ်ယူဖတ်ရှု လိုသူများ တန်ဖိုး ၁,၀၀၀ ကျပ်ဖြင့် ဖုန်း-၀၉၄၅၂၄၃၄၆၇၇ (နှင်းလူစာပေ) သို့ ဆက်သွယ်နိုင်ပါသည်။