အကောင်းအဆိုးများနှင့်အတူ

‘‘ဟုတ်ကဲ့ မင်းထွန်းပါ’’

‘‘ဟေ့ကောင် ငါမျိုးကျော် ရယ်။ အောင်ကျော်မင်းဆီ ရောက်နေသလား’’

‘‘ငါ့ဆီ မလာဘူးကွ။ ဘာဖြစ်လို့လဲ’’

‘‘ဒီကောင် အိမ်ကနေ ထွက်  သွားတာ နှစ်ပတ်ကျော်ပြီ။ သူ သွားတတ်တဲ့ သူ့သူငယ်ချင်းတွေ ရွာကို စုံစမ်းကြည့်တော့ ပြန်သွား တာ နှစ်ရက်ရှိပြီတဲ့။ အိမ်လည်း ပြန်မလာဘူးကွ။ မင်းဆီများ ဆက်သွားနေသလားလို့ လှမ်းမေး ကြည့်တာ။ စိတ်လေနေမှာစိုးလို့ အလုပ်တစ်ခုခု လုပ်ပါလား ပြော မိရာက စကားအချေအတင် ဖြစ် သွားတာပဲ။ ခုထိဘာမှလည်း စိတ်မ၀င်စားဘူး။မင်းဆီလာရင်လည်း လက်ချာလေး ဘာလေး ပေး လိုက်စမ်းပါဦး။ မင်းကိုတော့ ဒီ ကောင်ကလေးစားတယ်ကွ’’

‘‘ပြောသင့် ပြောထိုက်တာ တော့ ပြောတာပဲကွာ၊ သူက တောင် ငါ့ကိုပြန်ပြီး လက်ချာရိုက် တတ်သေးတယ်။ ဟား ...ဟား... တိတိကျကျ ထောက်ပြရအောင် ကလည်း ဘာမှမလုပ်သေးတဲ့သူ ဆိုတော့ ဘာမှမမှားသေးဘူးလေ’’

‘‘ဘာမလုပ်ရမှာလဲ။ အခုဒီ ကောင်သောက်တတ်နေပြီကွ’’

‘‘တစ်ခါတလေမို့လား၊ Social Drinking အဆင့်လောက် က ဒီခေတ်မှာ ယဉ်ကျေးမှုတစ်ခု လိုတောင် ဖြစ်နေပြီ။ အဆင့် ကျော်မသွားဖို့သာ အရေးကြီးတာ ပါ။ သူလည်းခေတ်ပညာတတ် လူငယ်တစ်ယောက်ပဲ။ သူ့ဘ၀ နဲ့ ယုံကြည်ချက်တွေ၊ ဆုံးဖြတ်ချက် တွေထဲ ၀င်ပြီး ဆရာကြီးလုပ်လို့ မရတော့ဘူး။ စကားပြောရင်း၊ ငြင်းခုံရင်း မသိမသာနှိုက်ထုတ်၊ ချေချွတ်၊ ပြန်ဖြည့်၊ အားပေး၊ တည်ဆောက်နည်းတွေနဲ့ စိတ်ရှည်ရှည်သွားရမယ့် ကိစ္စမျိုးကွ’’

‘‘ရှုပ်နေတာပဲကွာ၊ မင်းနဲ့ တော့ လိုက်ဖက်ပါတယ်။ ဒီ ကောင်ကလည်း ကျောင်းပြီးက တည်းက စာအုပ်တွေ၊ နိုင်ငံတကာ သတင်းတွေနဲ့ နပန်းလုံးနေတော့ တာ။ စကားပြောလိုက်ရင်လည်း စကားလုံးတွေက ပါးစပ်နဲ့ မဆံ့ ဘူး။ စာကြောင်ကြောင်နေသ လား ထင်ရတယ်။ ကဲ..ဒါပဲကွာ၊ မင်းကလည်း ငါ့ဆီတောင် လာ ဖော်မရတော့ဘူး။ လူပျိုကြီးလုပ် နေပြီး ဘယ်သူ့ကြောက်နေရလို့ လဲ’’

‘‘မင်းလိုကြောက်ရမယ့် မိန်း မမရှိပေမယ့် စောင့်ရှောက်ရမယ့် အမေရှိသေးတယ်ကွ။ ကဲ...ငါ လည်း အလုပ်သွားချိန်နီးပြီး ဒါပဲ နော်’’

‘‘မျိုးကျော်နှင့် ဖုန်းပြောအ ပြီး အလုပ်ကိုထွက်လာစဉ် ကျွန် တော်ဖတ်ခဲ့ဖူးသော ကဗျာတစ် ပုဒ်ကို သတိရမိသည်။ ဗြိတိသျှ ကဗျာဆရာ Paul Muldoon ၏ ‘ဘရောင်းလီ’အကြောင်း ကဗျာ ဖြစ်ပါသည်။ ဘရောင်းလီအမည် ရှိ လယ်သမားလူငယ်လေးတစ် ယောက် လယ်တောအိမ်မှ ပျောက်သွားသည်။ တစ်ရွာလုံး အဆန်းတကြယ်ဖြစ်ကြရသည်။ ဘရောင်းလီတွင် သူ့ဘ၀သူကျေ နပ်လောက်စရာ မြေယာရှိသည်။ စပါးနှင့် အာလူးစိုက်ခင်းတွေ ရှိ သည်။ လယ်ထွန်ရင်းတန်းလန်း အဆိုင်းပင် မဖြုတ်ရသေးသည့် ခိုင်းမြင်းနှစ်ကောင်  ရှိသည်။ သင်ပုန်းကျောက်မိုးအိမ်ရှိသည်။  သို့သော် ဘရောင်းလီဘာကြောင့် ထွက်သွားသည်ကို တစ်ရွာလုံး အဖြေရှာလို့ မရကြဘဲ ပဟေဠိ ဖြစ် ကျန်ရစ်ခဲ့ကြသည်။

ကဗျာဆရာသည် စွန့်ဦးတီ ထွင်တတ်ကြသော လူငယ်ထု ကိုယ်စား ဘရောင်းလီ၏ ရုပ်ပုံ လွှာကို ဖန်တီးထင်ဟပ်ပြလိုက် ဟန် တူပါသည်။

ပထမဘ၀တွင် ပညာသင် ကြရသည်။ ကိုယ့်ဘ၀၊ ကိုယ့်အ ခြေအနေအလျောက် ထိုက်သင့် သည့် ပညာအရည်အချင်းလေး တွေကို အားပြုကာ ဘ၀ရှင်သန် မှုအတွက် ရေကြည်ရာ မြက်နုရာ ရှာဖွေကြသည်။ များသောအား ဖြင့်တော့ စက်မှုဖွံ့ဖြိုးပြီး ဈေး ကွက်သက်ဝင်မှု ကြီးမားသည့် မြို့ကြီးပြကြီးတွေဆီသာ ဦးတည်ချီ

တက်တတ်ကြသည် မဟုတ်လား။ ယခုအခါ ခရီးဆောင်ကျောပိုး အိတ်ကိုယ်စီနှင့် စောင့်ဆိုင်းနေ တတ်ကြသော လူငယ်တွေကို ရွာ ကားဂိတ်နှင့် မြို့ပြကားဂိတ်တွေ အပြင် နိုင်ငံတကာလေဆိပ်တွေအထိပင် မြင်တွေ့နေကြရပါသည်။

အောင်ကျော်ဆိုသည့် ခေတ် ပညာတတ် လူငယ်တစ်ယောက် ကတော့ ထိုမျှလောက် ခြေလှမ်း မကျယ်သေးဘူးထင်သည်။ သူ့ ဇာတိမြို့ပွင့်ဖြူနှင့် မိုင်နှစ်ဆယ် ကျော် သုံးဆယ်ဝန်းကျင်လောက် သာ ခြေစကြာဖြန့်ကြက်လို့ ကောင်းတုန်း ရှိပါသေးသည်။

အောင်ကျော်၏ အစ်ကို မျိုး ကျော်သည် ကျွန်တော်နှင့်ကျောင်း နေဖက် သူငယ်ချင်းဖြစ်သည်။ သူမကွေးတက္ကသိုလ်ရောက်လာ တော့ အတန်းတူ၊ မေဂျာတူ ပေါင်းဖက်မိကြသည်။ သူကပထ မနှစ်တွင် အဆောင်မှာနေခဲ့ပြီး ဒုတိယနှစ်မှစ၍ သိင်္ဂါရပ်ထဲရှိ ကျွန်တော့်အိမ်သို့ ပြောင်းနေကာ ကျောင်းအတူတက်ခဲ့ကြသည်။ ကျောင်းပိတ်ရက်များတွင် သူ့ဇာ တိမြို့ ပွင့်ဖြူသို့ မကြာခဏ ကျွန်တော်လိုက်လည်ခဲ့သည်။ ထိုစဉ်ကတည်းက အထက်တန်း ကျောင်းသား အောင်ကျော်နှင့်ပါ ခင်မင်ရင်းနှီးခဲ့ပါသည်။

ကျောင်းပြီးပြီးချင်း မျိုးကျော်အိမ်ထောင်ကျသည်။ သူအိမ်ထောင်ကျပြီး တစ်နှစ်ခန့်အကြာတွင် မိဘတွေရှေ့ဆင့် နောင့်ဆင့် ဆုံးပါးသွားကြသည်။ သို့သော် သူတို့ညီအစ်ကိုနှစ် ယောက် ကံကောင်းကြပါသည်။ မိဘတွေက အလယ်လမ်းထဲတွင်  တိုက်ခံအိမ်တစ်လုံးနှင့် ဈေးကြီးအပြင် တိုက်တန်းတွင် ကုန်စုံဆိုင်ကြီးတစ်ဆိုင် အမွေထားရစ်ခဲ့သည်။ မျိုးကျော်တို့ လင်မယားက ကုန်စုံဆိုင်ကို ဆက်လက်ဦးစီး လုပ်ကိုင်ခဲ့ကြသည်။

အောင်ကျော်က အစ်ကိုဖြစ် သူနှင့် အသက်သုံးနှစ်လောက် ကွာသည်။ သူမကွေးတက္ကသိုလ် လာတက်တော့ သူ့အစ်ကိုနည်း တူ ကျွန်တော့်အိမ်မှာနေပြီး ကျောင်းတက်သည်။ သူ့ကို ကျွန် တော်က ညီငယ်တစ်ယောက်လို ဆက်ဆံကာ သူငယ်ချင်းတစ် ယောက်လိုလည်း ပေါင်းခဲ့သည်။ အောင်ကျော် ကျောင်းမပြီးမီ ကျွန်တော့်အဖေဆုံးသည်။ အဖေ့လုပ်ငန်းကို ကျွန်တော်ဆက်လက်လုပ် ကိုင်ရင်း ပွင့်ဖြူမြို့နှင့် ဝေးကွာ သွားခဲ့ပါသည်။

 ကျောင်းပြီးသွားသော အောင်ကျော်ကမူ မကွေးမြို့သို့ မကြာမကြာ ရောက်လာတတ် သည်။ အိမ်တွင်အမေနှင့် ကျွန် တော်နှစ်ယောက်တည်းသာ ရှိ သဖြင့် သူ့အတွက် လွတ်လပ်နေ သည်။ အောင်ကျော်က သူ့အစ် ကိုနှင့် ဆန့်ကျင်ဘက်စရိုက်ရှိ သည်။ အရာရာပြီးပြည့်စုံသော လူငယ်တစ်ယောက်အနေအ ထား ရှိသော်လည်း နှလုံးသားရေး ရာ ကိစ္စတွေကို စိတ်မ၀င်စားပါ။ လွတ်လွတ်လပ်လပ် နေထိုင်တွေး ခေါ်တတ်သည်။ စာဖတ်ဝါသနာ အတော်ကြီးသည်။ ကျွန်တော်စု ဆောင်းထားသမျှ စာအုပ်တွေက သူ့အတွက် လောကသစ်တွေ ဖြစ် နေသည်။ ကျွန်တော့်အပေါ် လေး စားခင်မင်နေသည်ကလည်း စာ ပေစိတ်နှင့် ဘာသာစကားတူညီ နေသောကြောင့် ဖြစ်သည်။ ကျွန် တော်နှင့် စရိုက်ချင်းဆင်တူသော ကြောင့်လား မသိ။ အောင်ကျော့် ကို အမေကလည်း သားတစ် ယောက်လို ချစ်ခင်နေခဲ့ပါသည်။

ထိုနေ့က အလုပ်သိမ်းပြီး အိမ်ပြန်ရောက်တော့ အောင် ကျော်ကြိုရောက်နေတာ တွေ့ရ သည်။ ထုံးစံအတိုင်း စာအုပ်ပုံထဲ တွင် ခေါင်းဝင်နေသည်။ ကျွန် တော်အလုပ်သွားသည့်အခါ တစ် ယောက်တည်း ကျန်ရစ်ရှာသော အမေသည် အောင်ကျော်ရောက် လာလျှင် အဖော်ကောင်းတစ် ယောက်ရသလို သက်ဝင်လှုပ်ရှား နေတတ်သည်။ ရေချိုးချိန်တန် လျှင် ရေချိုးခိုင်းမည်။ ထမင်းချိန် တန်လျှင် ထမင်းကျွေးမည်။ ပြီး တော့ လက်ဖက်သုပ်ဖြစ်စေ၊ ချင်းသုပ်ဖြစ်စေ၊ အပျင်းပြေစား စရာတစ်ခုခုကို ရေနွေးကြမ်းအိုး နှင့်အတူ အောင်ကျော့်ဘေးနား တွင် ထားပေးမည်။ ပြီးတော့ သူ ပြောချင်တာတွေကို တဖောင် ဖောင်ထိုင်ပြောနေသည်။ အောင် ကျော်က ‘‘အင်း၊ ဟုတ်ကဲ့’’ လိုက် ပေးမည်။ သို့သော် သူ့အာရုံက စာအုပ်ထဲတွင် နစ်နေမည်။

‘‘မင်းရောက်လာလိမ့်မယ်လို့ တော့ ထင်သား’’

‘‘အစ်ကိုက ဖုန်းဆက်တယ် မို့လား’’

‘‘အေး၊ ဟုတ်တယ်’’

ဒါလောက်ပါပဲ။ သူ့က သူ အိမ်အကြောင်းကို စကားလုပ်ပြီး ပြောတတ်သူမဟုတ်။ အစ်ကို လုပ်သူနှင့် မရီးအကြောင်းကို စကားစပ်မိလွန်းမှ ‘‘သမားရိုးကျ လူသားတွေပါ’ ’ဟု တစ်ခွန်းတည်း ပြောတတ်သည်။ သူ့စကားလုံး တွေက တစ်ခါတလေ ရယ်စရာ ကောင်းသလို ရံဖန်ရံခါ ထိတ် လန့်စရာလည်း ကောင်းပါသည်။

‘‘ညီလေး ချိန်ဘာမဆင်းသေး ဘူးလား’’

‘‘မဆင်းဘူးအစ်ကို’’

‘‘ဘာဖြစ်လို့လဲ။ ဟိုမှာ မဆင်းချင်ရင် ဒီမှာဆင်းပါလား’’

‘‘ဘယ်မှာမှ မဆင်းချင်ဘူး။ ကျွန်တော်မှ ရှေ့နေ မဖြစ်ချင်တာ’’

‘‘ဟင်၊ ဒါဖြင့် ဘာလို့ ဥပဒေ ဘွဲ့ယူခဲ့တာလဲ’’

‘‘ဆယ်တန်းအောင်တုန်းက သိပ်နားမလည်သေးလို့ ဖြစ်မှာ ပါ။ သူငယ်ချင်းတွေနဲ့အပြိုင် ကိုယ့်အောင်မှတ်မီရာ မေဂျာကို ယူလိုက်တာပဲ။ ဘာရယ်လို့ မဟုတ်ဘူး။ ကျောင်းပြီးမှ ၀ါသ နာမပါမှန်းသိတာ။ ဥပဒေကို တော့ စိတ်ဝင်စားပါတယ်။ ရှေ့ နေအလုပ်ကို စိတ်မ၀င်စားတာ။ လူတမ်းစေ့ဘွဲ့တစ်ခု ရလိုက် တယ်လို့ပဲသဘောထားတယ်’’

‘‘အေးအေးဆေးဆေး စဉ်း စားဦးပေါ့။ တို့ဆီမှာ ဆေးဘွဲ့ယူ ပြီး ဆရာဝန်မလုပ်ဘဲ မင်းသား၊ မင်းသမီး၊ အဆိုတော်၊ စာရေး ဆရာ၊ စီးပွားရေးလုပ်ငန်းရှင်လုပ် နေကြတာတွေ တစ်ပုံကြီး၊ အစ် ကို့ သူငယ်ချင်းတစ်ယောက်ဆို ဥပဒေဘွဲ့ယူ၊ တည်းခိုခန်းဖွင့်ပြီး ကဗျာတွေရေးနေတယ်။ တော် တော်တော့ ထော်လော်ကန့်လန့် နိုင်သလိုပဲ’’

‘‘တကယ်တော့ ဘာမှမဆန်း ပါဘူးအစ်ကိုရာ။ အဖြူအမည်း၊  အကောင်း အဆိုး၊ အမှားအမှန် ဆိုတာ မျဉ်းတစ်ကြောင်းတည်း နဲ့ ခြားထားလို့မှ မရတာလေ။ လော ကကြီးကိုက ထော်လော်ကန့်လန့် လောကကြီးပါ’’

‘‘ဟား၊ အဘိဓမ္မာတွေ ဖွင့် လှချည့်လား၊ လုပ်စမ်းပါဦး’’

‘‘ကဲ... ကျွန်တော်မေးမယ်။ အ ပြေးပြိုင်တဲ့အခါ ဖိနပ်စီးပြေးသူ နဲ့ ဖိနပ်မစီးဘဲ ပြေးသူဘယ်သူက ပိုသာသလဲ’’

‘‘ဒါက ရှင်းပါတယ် ညီလေး ရာ၊ ဖိနပ်စီးပြီး တစ်ကမ္ဘာလုံးပြိုင် နေကြတာ မဟုတ်လား။ အားက စားသမားတိုင်း ဖိနပ်ပါသူက သာ တယ်ပြောမှာပဲ’’

‘‘ကျွန်တော်လည်း အဲဒီလိုပဲ ထင်ခဲ့တာ။ ကင်ညာနိုင်ငံသား တွေ တန်းစီပြီး ခြေဗလာနဲ့ ပန်း ၀င်လာကြတော့ ခက်ကုန်ရော။ တာရာဟူးမားရား အင်ဒီးယန်း တွေက ဖိနပ်ပါပါ၊ မပါပါ ယှဉ် ပြိုင်ရဖို့သာ အဓိကလို့မြင်တယ်။ သူတို့ကိုယ်သူတို့ Rana Muri ပြေး နေတဲ့ ခြေထောက်များလို့ ခေါ်ကြသတဲ့။ အမေရိကန်နိုင်ငံ ကော်လိုရာဒိုမှာ မိုင်တစ်ရာခရီး ရှည် ပြေးပွဲနှစ်စဉ်ကျင်းပတယ်။ အပြေးဖိနပ်ထုတ်လုပ်တဲ့ ကုမ္ပဏီ တွေက စပွန်ဆာလုပ်ပေးတယ်။ မာရသွန်ပြိုင်ပွဲဆိုတာ ဖိနပ်ကြော် ငြာတဲ့ နေရာပဲ။ ပြိုင်ပွဲဝင်သူတွေ ကို သူတို့ကြော်ငြာတဲ့ ဖိနပ်တွေ စီးပြိုင်ခိုင်းတယ်။ တကယ်လည်း ပြေးရော တာရာဟူးမားရားတွေ က ဖိနပ်တွေ ချွတ်ပြေးသူပြေး၊ တာရာဖိနပ်ပြောင်းစီးပြီး ပြေးသူ ပြေးနဲ့ ပန်းဝင်လာကြတော့ စပွန် ဆာတွေ ပက်လက်လန်ကုန် တယ်။ ရှိသေးတယ်။ ရတဲ့ဆုက ရွှေခါးပတ်၊ ငွေခါးပတ်တွေတဲ့။ အဲဒါတွေကို ဆိတ်တွေနဲ့လဲပြီး ဆိတ်သားဟင်း ချက်စားပစ်ကြ တယ်။ ဒီလိုဆုတံဆိပ်တွေက သူ တို့အဖို့ ငွေသားလောက် လက် တွေ့ကျတာ မဟုတ်ဘူး။ နောက် စာရေးဆရာကြီး ဟဲမင်းဝေးအ ဖြစ်လည်း ထော်လော်ကန့်လန့်ပဲ အစ်ကိုရ’’

‘‘ဟဲမင်းဝေးက ဘာဖြစ်လို့ လဲ’’

‘‘သူ့ဝတ္ထုက The Old Man and the Sea ထဲမှာ သူ့ဇာတ် ကောင်စန်နီယာဂိုရဲ့ လူ့ဘ၀ လူ့အ ဖြစ်ကို ကြုံးဝါးပြခဲ့တယ်လေ။ လူ သားကို ဖျက်ဆီးချေမှုန်းလို့ရချင် ရမယ်။ အနိုင်ယူလို့တော့ မရဘူး တဲ့။ သူကိုယ်တိုင်ကျ သူ့ကိုယ်သူ သတ်သေသွားခဲ့တာပဲ မဟုတ် လား’’

‘‘ဟဲမင်းဝေးအဖြစ်က ပြဿ နာပေါ့။ အဲဒီအချိန်က သူ့အသက် (၆၀)နှစ်။ အက်ဖ်ဘီအိုင်အေးဂျင့် တွေက တကောက်ကောက်လိုက် ပြီး စုံစမ်းထောက်လှမ်းခံနေရလို့ စိတ်ဓာတ်ပြိုကွဲသွားတယ်။ မခံ နိုင်တော့တဲ့အဆုံး သူ့ကိုယ်သူ သေ နတ်နဲ့ နိဂုံးချုပ်ပစ်လိုက်တယ်။ Depression ပေါ့။ ဆက်လက် ရှင်သန်ချင်စိတ် မရှိတော့လောက် အောင် ဆန္ဒကကင်းမဲ့သွားတာ’’

‘‘ဗစ်တာဟူးဂိုးပြောခဲ့သလိုပဲ။ People do not Lack Strength. They Lack Will တဲ့။ လူတွေဟာ ခွန်အားမဲ့နေတာမဟုတ်ဘူး။ ဆန္ဒ ကင်းမဲ့နေတာ။ အဲဒါက ကုစားရ ခက်တယ်’’

×××

 ကျွန်တော်တို့နှစ်ယောက် စကားအချေအတင်တွေ ဆက် တိုက်ဖြစ်ပေါ်လာသည်။ သူ၏ ထွက်ပြူလာစ အဆိုးမြင်ဝါဒကို ကျွန်တော်က ချေချွတ်မိသော ကြောင့် ဖြစ်ပါသည်။ ကျွန်တော် က ကျွန်တော်တို့ရောက်ရှိနေ သော ခေတ်ကို Globalization ကမ္ဘာလုံးဆိုင်ရာ တစ်သားတည်း ဆက်စပ်ပေါင်းစည်းမိသွားသော ကမ္ဘာ၏ ခေတ်အဖြစ် ရည်ညွှန်း  သည်။ အောင်ကျော်ကမူ လက်ရှိ လူ့အဖွဲ့အစည်းသည် ကမ္ဘာလုံး ဆိုင်ရာ ဒုက္ခဘုံ Global Dystopia တစ်ခုဟု သတ်မှတ်ချေပသည်။

‘‘လူမှာ အတွေးအမြင်ဆိုတာ ရှိနေမှတော့ အကောင်းမြင်တာ ရှိသလို အဆိုးမြင်တာလည်း ရှိ ရမှာပေါ့။ အမြဲတမ်းအရာရာကို အကောင်း မြင်ရမယ်ဆိုတာ အစွန်းရောက်သလို အမှန်တရား နဲ့ပါ ဝေးကွာနိုင်တယ်။ လက်ရှိ ကမ္ဘာရဲ့ ဈေးကွက်စီးပွားရေးစနစ် ကို ကြည့်၊ ကုန်ပစ္စည်းကောင်း ကောင်း ဈေးကြီးကြီးကို သုံးစွဲနိုင် မှ ကောင်းမွန်တဲ့ဘ၀၊ သုံးစွဲသူအ ဓိက၊ လွတ်လပ်တဲ့ ဒီမိုကရက် တစ် အခွင့်အရေး၊ ဖုန်းနဲ့စာနဲ့ အင်တာနက်နဲ့ မှာယူနိုင်တဲ့၊ အိမ် တိုင်ရာရောက် ပို့ဆောင်ပေးတဲ့ ၀န်ဆောင်မှုစနစ်တွေ၊ ကြော်ငြာ တွေနဲ့ တစ်ချိန်လုံး သာလွန် ကောင်းမွန်တိုးတက်တဲ့ ကမ္ဘာကြီး အဖြစ် အော်ဟစ်နေကြတယ်။ ကျွန်တော်မြင်တဲ့ ဈေးကွက်စီးပွား ရေးစနစ်က လူတိုင်းကို သာတူညီ မျှ သဘောမထားဘူး။ ငွေများ များသုံးနိုင်သူကို ယဉ်ကျေးပျူငှာ ဆက်ဆံတယ်။ ငွေမသုံးနိုင်သူကို သူခိုးကြမ်းပိုးလို စော်ကားတယ်။ ရင်းနှီးမြှုပ်နှံနိုင်သူတွေက အခွင့် အာဏာရှိတယ်။ လူ့အဖွဲ့အစည်း ကို စာပို့သင်္ကေတတွေ၊ အိတ်ချိန်း တွေ၊ အသွေးအသားမဲ့ စက်ရုပ် တွေအဖြစ် ပြောင်းလဲပစ်တယ်။ ဒါတွေကို အကောင်းမြင်မျက်လုံး တွေနဲ့ ဘယ်လိုမြင်အောင် ကြည့် မလဲ’’

‘‘အကောင်းမြင်ဝါဒနဲ့ စာရင် အဆိုးမြင်ဝါဒက အမှန်တရားနဲ့ ပို နီးစပ်စေပါတယ်။ နှစ်ဖက်မျှ အောင်တော့ ကြည့်တတ်ရမယ်။ အဆိုးမြင်သက်သက်က လူကို ထွက်ပေါက်မဲ့စေတယ်။ စိတ် ဓာတ်ကျစေတယ်။ မွန်းကျပ်စေတယ်။ ဟဲမင်းဝေးလို ရှင်သန်ချင် စိတ်ကင်းမဲ့တဲ့ အန္တရာယ်မျိုးကျ ရောက်စေနိုင်တယ်။ တစ်နည်း အားဖြင့် အနုတ်သဘောဆောင် တဲ့ အတွေးအမြင်ကြောင့် လူ့ သက်တမ်းကို တိုတောင်းစေတယ်’’

‘‘ဒီသဘောက နှစ်ဖက်စလုံး မှာရှိပါတယ်။ ငါဟာ လူသား ကောင်းကျိုးအတွက် ဆောင်ရွက် နေတာ။ ငါ့မှာ ရန်သူမရှိဆိုတဲ့ အစွန်းရောက်အမြင်ကြောင့် စိတ် ချလက်ချနေမိရင်း လုပ်ကြံသတ် ဖြတ်ခံရတဲ့ သာမန်ပြည်သူတွေ၊ နိုင်ငံ့ခေါင်းဆောင်တွေ၊ ဘာသာ ရေးခေါင်းဆောင်တွေ ဘယ် လောက်များခဲ့ပြီလဲ။ ၂၀၀၇ ဧပြီ လထုတ် Time မဂ္ဂဇင်းတစ်အုပ် လုံး Global Warming အကြောင်း ရေးထားတယ်။ သဘာဝပတ်ဝန်း ကျင်ဆိုင်ရာ ဘာသာရပ်ကို နား မလည်ရင် ကမ္ဘာကြီးပူလာတဲ့အ ကြောင်းကို နားလည်မှာမဟုတ် ဘူး။ ကာဗွန်ထွက်တာ၊ ပတ်ဝန်း ကျင်ညစ်ညမ်းတာ၊ အက်စစ်မိုး ရွာတာ၊ ရာသီဥတုပြောင်းတာ၊ အိုဇုန်းဓာတ်ငွေ့လျော့ကုန်တာ ဘာကြောင့် ဖြစ်လာတာလဲ။ တရားခံကလူတွေ ကာဗွန်ဒိုင် အောက်ဆိုက်၊ နိုက်ထရပ်စ် အောက်ဆိုက်၊ မီသိန်းဓာတ်ငွေ့ တွေနဲ့ ဟေလိုကာဗွန် CFC တွေ ထုတ်လုပ်ဖန်တီးနေကြတယ်။ အဓိက ကာဗွန်ဒိုင်အောက်ဆိုက် ဓာတ်ငွေ့တွေပေါ့။ ကျွန်တော် ပြောချင်တဲ့ အချက်က လူတွေ ဟာ ကမ္ဘာကြီးကို နည်းမျိုးစုံနဲ့ ဖျက်ဆီးခဲ့ကြတယ်။ ဆက်ပြီး လည်း ဖျက်ဆီးနေကြဆဲပဲ။ လက်တွေ့ထိထိရောက်ရောက် ဘာတွေတားဆီး ကာကွယ်နေကြပြီလဲ။ ခုထိတော့ ကမ္ဘာကြီးကို ဘယ်လိုဘယ်ညာ ကယ်တင်ကြပါလို့ သွေးရူးသွေးတန်းအော်ဟစ်နေကြ တုန်းပဲ ရှိတယ်။ အဲဒါအကောင်းမြင်ဝါဒလား၊ အဆိုးမြင်ဝါဒလား ကျွန်တော်စဉ်းစားလို့ မရဘူး’’

‘‘အမှန်တကယ် တိုးတက်တဲ့ အပိုင်းတွေကို အခြေခံစဉ်းစား ကြတာပေါ့။ Global ကာလအ တွင်းမှာ ဖွံ့ဖြိုးဆဲ နိုင်ငံတွေဟာ ကုန်သွယ်မှုနည်းပညာ၊ ပညာရေး ဆိုင်ရာ ရင်းနှီးမြှုပ်နှံမှုတွေနဲ့ အ ခြေခံကျတဲ့ ဆင်းရဲခြင်းလွတ်ကင်း ဖို့၊ ဒီမိုကရေစီတိုးတက်ဖို့၊ လွတ် လပ်စွာ ပြောဆိုခွင့်တွေ တိုးချဲ့ ဖြန့်ကြက်ဖို့ တဖြည်းဖြည်း ပုံဖော် လှုပ်ရှားလာနိုင်တယ်။ မျှမျှတတ မြင်တတ်ဖို့ဆိုရင် အဖွဲ့အစည်း တွေ၊ ပူးပေါင်းဆောင်ရွက်သူတွေ အနေနဲ့ ပိုကျယ်ပြန့်တဲ့ လူမှုတာ ၀န်တွေကို သိတတ်ဖို့လိုတယ်။ ကျန်းမာရေး၊ ပညာရေး၊ ပတ်ဝန်း ကျင်ထိန်းသိမ်းရေး၊ စီးပွားရေး ဆိုင်ရာ တိုးတက်မှုတွေကနေ အ ကျိုးအမြတ်ခံစားခွင့်တွေကို အ လေးထားဖို့ လိုတယ်။ အပြည် ပြည်ဆိုင်ရာ အသင်းအဖွဲ့တွေရဲ့ စည်းရုံးကူညီမှုတွေ၊ ရင်းနှီးမြှုပ်နှံ မှုတွေ ရရှိဖို့လိုတယ်။ ကမ္ဘာကြီး ပျက်စီးနေပါပြီလို့ မြင်နေမယ့်အ စား အခြေအနေတွေ ပြောင်းလဲ သွားအောင် ပြုပြင်ဖို့ ၀ိုင်းဝန်းကြိုး စားကြတာ ပိုမကောင်းဘူးလား’’

‘‘အစ်ကိုက ကျွန်တော့်ကို အ ဆိုးမြင်သမား သက်သက်လို့ မြင် ရင် မြင်လိမ့်မယ်။ ကျွန်တော်က အဆိုးမြင်ဝါဒရဲ့ ကောင်းကွက် တွေနဲ့ အကောင်းမြင်ဝါဒရဲ့ ဆိုး ကွက်တွေကို သုံးသပ်ကြည့်နေ တာ၊ အလုပ်တော့ ဖြစ်ပါတယ်’’

သူ့အပေါ် ဝေဖန်ပိုင်းခြားမှု ပြင်းပြင်းထန်ထန် မလုပ်နိုင်ပါ။ သမားရိုးကျရှင်သန်နေသော လူ ငယ်တချို့နှင့် နှိုင်းစာလျှင် အောင်ကျော်၏ လေ့လာအားထုတ်မှုနှင့် အတွေးဖြန့်ကြက်မှုက ပို၍လေး စားစရာကောင်းပါသည်။ ထို့နေ့ ညဥ့်ဦးပိုင်းအချိန်တွင် မြို့ခံကျောင်း နေဖက် သူငယ်ချင်းတစ်ယောက် နှင့် ဆုံမိပြီး အောင်ကျော်အပြင် သို့ လိုက်ပါသွားသည်။ ညစာ ထမင်းစားချိန်အထိ ပြန်ရောက် မလာပါ။ အမေကပါ စိတ်ပူနေ ၍ ဆိုင်ကယ်ဖြင့် လိုက်ရှာရသည်။ ကျွန်တော်တို့နှစ်ယောက် မကြာ ခဏရောက်ခဲ့ဖူးသည့် ဆိုင်တွေ အကုန်လိုက်ကြည့်သည်။ သူတို့ နှစ်ယောက်ကို မတွေ့။ ကျွန်တော် မသိသော တစ်နေရာကို ရောက် နေကြဟန်တူသည်။

နောက်ဆုံးလက်လျှော့ကာ အိမ်ဘက်သို့ ပြန်အလှည့်တွင် ချောင်ကျကျ ကမ်းနားလမ်းဘက် ရှိ ကိုဖြူသီးဘီအီးဆိုင်ကို သတိရ လိုက်မိသည်။ ထိုဆိုင်သို့ အောင်ကျော်ကို နှစ်ခေါက်ခေါ်သွားဖူးသည်။ ကိုဖြူသီးဆိုင်သည် အစိုးရဂိုဒေါင်ထုတ် ဘီအီးတစ်မျိုးသာ ရောင်းသော ကောင်တာခွဲ ဆိုင် ဖြစ်သည်။ အရက်သားမှန်သည်။ ထိုဘီအီးကိုအောင်ကျော် အကြိုက်တွေ့ခဲ့သည်။ ကာလာတွေထက် ပိုကောင်းသည်ဟုပြောဖူးသည်။ ညပိုင်းတွင် လူအစည်ဆုံးဖြစ်သည်။ထိုဆိုင်သည် ပွဲရုံပြန်အလုပ်သမားများ၊ ဆိပ်ကမ်းကုန်တင်ကုန်ကျ အလုပ်သမားများ၊ ပျံကျအထမ်းသမားနှင့် လက်လုပ်လက်စားအများစုတို့ အနားယူအပန်းဖြေရာ ဆင်စွယ် နန်းတော်တစ်ခု ဖြစ်ပါသည်။ ထို ဆိုင်သို့ အသော့နှင့်လိုက်တော့မှ ကိုယ့်လူနှစ်ယောက်ကို တွေ့လိုက်ရသည်။

သူတို့နှစ်ယောက်က ဆိုင် အတွင်းသို့ ၀င်မထိုင်ကြပါ။ ဆိုင်ရှေ့တွင် ပုံမှန်အမြည်းလာ ရောင်းသော ဒေါ်ထွေးတင်ခုံဘေးရှိ ထင်းရှူးသေတ္တာခွံကြီးကို စားပွဲ လုပ်ထိုင်နေကြခြင်း ဖြစ်သည်။ ဒေါ်ထွေးတင်ယူဆောင်လာသော သစ်သားထိုင်ခုံပုလေးတွေက လည်း အဆင်သင့်။

‘‘အစ်ကို လိုက်ရှာနေတာ လား။ လမ်းလျှောက်စကားပြော ရင်း ပျင်းတာနဲ့ ၀င်ထိုင်နေကြ တာ။ အစ်ကိုလုပ်ဦးမှာလား’’

‘‘ခပ်ပါးပါးပေါ့ကွာ’’

‘‘ဒီမှာထိုင်လေ။ ဆိုင်ထဲက လူပြည့်ပြီး ရှုပ်နေတာ’’

သစ်သားထိုင်ခုံပုလေးတစ် လုံးကို ဆွဲယူပြီးထိုင်လိုက်သည်။ ဒေါ်ထွေးတင်က ကျွန်တော့်ကို မြင်တော့ သူ့ဝသီအတိုင်း အသံ ကျယ်ကြီးနှင့် နှုတ်ဆက်ပါသည်။

‘‘ဟဲ့၊ ဂေါ်မစွံလူပျိုကြီးပါ လား။ မတွေ့တာတောင် အ တော်ကြာပြီ။ လိမ္မာနေတာပေါ့ လေ။ ကဲ ရောက်တုန်းရောက် ခိုက် အားပေးလိုက်စမ်းပါဦး’’

‘‘တိုးတိုးပြောစမ်းပါဗျာ။ ရပ် ကျော်ရွာကျော် အသံကြီးနဲ့’’

‘‘အမလေး၊ ကိုယ့်စည်းစိမ် နဲ့ ကိုယ် ဘာဖြစ်သေးလဲ။ ဒီမယ် လူပျိုကြီးကြိုက်တတ်တဲ့ အမြည်း လေး၊ စပါးစကုဗျပ်၊ မယားတစ် ခုလပ်၊ လူမှာ ကြား၊ ကြက်မှာ တောင်ပံပြားတဲ့။ လူပျိုကြီးမေ့နေ မှာစိုးလို့ ပြောရတာ ဟား ဟား ဟား ’’

အောင်ကျော်တို့နှစ်ယောက် ကတော့ လူငယ်တွေပီပီ ဒေါ်ထွေး တင်၏ Dialogue ကို တခွီးခွီး သဘောကျနေကြပါသည်။

‘‘ဟဲ့ မောင်မင်းထွန်း မင်းတို့ အချစ်တော်ကြီးဇော်မင်း ပြန် လွတ်လာပါရော့လား။ ဆိုင်ထဲဝင် သွားတာ တွေ့လိုက်တယ်။ ခု လောက်ရှိ ၀ိုင်းတကာလှည့် မိုက် ကြေးခွဲသောက်ရင်း တော်တော် မှန်နေလောက်ပြီ’’

‘‘ဟုတ်လား၊ ဘယ်တုန်းက လွတ်လာတာလဲ’’

‘‘မသိပါဘူးကွယ်။ အဒေါ် လည်း ဒီနေ့မှ မြင်လိုက်တာ’’

ကျွန်တော်နှင့် ဒေါ်ထွေးတင် တို့ စကားကို နားထောင်ရင်း အောင်ကျော်အသံတိတ်မေးခွန်း ထုတ်နေသည်။ ကျွန်တော်က သူ့ တို့နှစ်ယောက်ဆင်ခြင်တိုင်းထွာ နိုင်ရန် ရာဇ၀င်လူဆိုးစာရင်းဝင် ဇော်မင်းအကြောင်း ပြောပြလိုက် ရသည်။ သည်ဘက်ရပ်ကွက် သားတွေကတော့ ဇော်မင်းဆို လျှင် အော့နှလုံးနာစွာ ကျွမ်းဝင်ထားကြပြီး ဖြစ်သည်။ ဇော်မင်းသည် အသားညိုညို ထောင်ထောင်မောင်းမောင်းနှင့် ကျွန်တော့်ထက် သုံးနှစ်လောက်ငယ်သည်။

‘အမေက မွေး၊ ထောင်ကကျွေး’ဆိုသည်နှင့်အညီ အချုပ်ထောင်ကို ခြင်ထောင်လို သဘောထားကာ ၀င်ထွက်ရှင်သန်နေသူ ဖြစ်သည်။ခုလည်း ပြစ်မှုတစ်ခုကြောင့် နှစ်ရှည်ထောင်ဒဏ်ကျသွားရာမှ ပြန် လွတ်လာခြင်းဖြစ်သည်။ အောင် ကျော်က ကျွန်တော်နှင့် ငြင်းခုံ လက်စအကောင်းမြင်၊ အဆိုးမြင် ၀ါဒ အကြောင်းအရာထဲသို့ လူ မိုက်ဇော်မင်းကိုပါ ဆွဲထည့်လာ သည်။

‘‘အစ်ကိုအပါအ၀င် သူ့အ ကြောင်းကို သိသူတွေအားလုံးက အကောင်းမြင်ဝါဒနဲ့ သည်းခံဆက်ဆံပေးနေကြတာ။ စကားနည်း ရန်စဲသဘောလေ။ တစ်နည်းအား ဖြင့် အကျင့်ပျက်လူမိုက်တစ် ယောက်ကို ၀ိုင်းဝန်းစောင့်ရှောက် ပေးနေကြတဲ့ သဘောပဲ။ ဥပမာ အစ်ကိုကိုယ်တိုင်ကကော သူ့ကို ကြောက်သလား’’

‘‘လူချင်းသက်သက်ကတော့ ဘယ်ကြောက်လိမ့်မလဲ’’

‘‘ဒါပေမဲ့ ခွေးရူးနဲ့ဖက်မပြိုင် ချင်ဘူး။ ဣနြေ္ဒသိက္ခာ အပျက်မ ခံချင်ဘူး။ ရုံးရောက် ဂါတ်ရောက် မဖြစ်ချင်ဘူး။ သူ့အဖို့က အ ကြောင်းမဟုတ်တော့ပေမယ့် ကိုယ်က ဒီလိုပြဿနာမျိုးနဲ့ နှစ် ပါးမသွားချင်ဘူး။ အစ်ကို့လိုပဲ အားလုံးက ခန္တီတရားလက်ကိုင်ထား ပြီး အလျှော့ပေးနေကြတာမို့ လား။ သူကလည်း ဒီအချက်ကို အခွင့်ကောင်းယူပြီး ဒီလိုနေရာဌာ နမျိုးမှာ အစားချောင်နေတာ။ ဒီ လိုလူမိုက်မျိုးတွေက အသိဉာဏ် မဲ့မိုက်လုံးကြီးရုံ သက်သက်ပါ။ သတ္တိရှိကြတာ မဟုတ်ဘူး’’

‘‘ညီလေးပြောတာ မှန်ပါ တယ်။ ဇယားမရှုပ်ချင်တော့ ရှောင်ရ၊ တိမ်းရ၊ သည်းခံရတာ ပေါ့။ ဒါကမင်္ဂလာတရားနဲ့လည်း ညီပါတယ်’’

‘‘မဟုတ်သေးဘူးအစ်ကို။ အဲဒီကျင့်စဉ်က လူမိုက်သက်ရှည် အောင် လုပ်ပေးနေတဲ့ သဘော ဖြစ်နေတယ်’’

‘‘ထားတော့ ၊ ပြန်ကြရ အောင်၊ အိမ်မှာ အမေစောင့်နေ လိမ့်မယ်’’

‘‘ခဏလေးအစ်ကို၊ သိပ်မ ကြာပါဘူး’’

အောင်ကျော်က ဆိုင်ထဲဝင် သွားပြီး နောက်တစ်ပိုင်းထပ်ယူ လာသည်။ သူပြန်ထွက်လာပြီး  မရှေးမနှောင်းပင် ဇော်မင်းလည်း ပြန်ထွက်လာတာ မြင်ရသည်။ အောင်ကျော်နှင့် သူ့သူငယ်ချင်း ကို အသာလက်တို့ပြရင်း ကျွန် တော်မျက်နှာလွှဲထားလိုက်သည်။ သို့သော် ဇော်မင်းက ကျွန်တော့် ကို မြင်သည်။ တကယ်တော့ သူ နှင့် ကျွန်တော်က အလွန်ခင်မင် ရင်းနှီးခဲ့သူတွေ ဖြစ်သည်။ ဆိုး သွမ်းမိုက်မဲသည့် သူ့အကျင့်စရိုက်တွေ၊ အမှုအခင်းတွေနှင့် မပတ်သက်ချင်သော ကျွန်တော့် အတွင်းစိတ်ကို သူကောင်း ကောင်းသိသည်။ ထိုအချက်က ပင် သူ့အတွက် အခွင့်ကောင်းတစ် ခု ဖြစ်ခဲ့ပါလိမ့်မည်။ ဇော်မင်းက ဆက်မသွားဘဲ ခုံပုလေးတစ်လုံး ကို ဆွဲယူကာ ကျွန်တော်တို့ကြား ထဲသို့ ဇွတ်တိုးထိုင်လိုက်သည်။

‘‘ကိုမင်းထွန်းက အပြင်မှာ ထိုင်နေတာကိုး။ နည်းနည်း လောက် ပြုစုပါဦး။ သိပ်မ၀သေး ဘူး’’

ပြောပြောဆိုဆို ထောင်ထား သော တစ်ပိုင်းပုလင်းကို လှမ်းဆွဲ လိုက်သည်။ သို့သော် ပုလင်းက သူ့လက်ထဲသို့ ပါမသွားပါ။ အောင်ကျော်က သူ့ဘက်သို့ ဖျတ်ခနဲဆွဲ ယူလိုက်သောကြောင့် ဖြစ်သည်။ ကျွန်တော်ဘာမှ မပြောဘဲ အသာ ပြုံးကြည့်နေလိုက်ပါသည်။

‘‘ဘယ်သူက ခွင့်ပြုလို့ခင် ဗျား ၀င်ထိုင်တာလဲ။ ရိုင်းလှချည့် လား’’

အောင်ကျော်ပြုမူလိုက်ပုံက ဇော်မင်းလို လူတစ်ယောက်အဖို့ အံ့အားသင့်စရာဖြစ်သလို သဘာဝလည်း ကျပါသည်။ ဇော်မင်းက တစ်ချက်ပြုံးလိုက်ရင်း ကျွန်တော့် ဘက်ကို လှည့်ကြည့်သည်။

‘‘အစ်ကို့ကောင်လား’’

‘‘ကောင်ဆိုတာ တိရစ္ဆာန် ကို  ရည်ညွှန်းတာ။ ကျုပ်နဲ့ ပတ် သက်ပြီး နောက်တစ်ခါ မသုံးပါ နဲ့။ ခင်ဗျားနဲ့ ကျုပ်က အသိမိတ် ဆွေလည်း မဟုတ်ဘူး။ ဒီဆိုင်ကို ဘယ်သူမှ ဥပုသ်လာစောင့်ကြ တာ မဟုတ်ဘူး။ အရက်လာ သောက်ကြတာ။ အဲဒါသဘော ပေါက်ထားဗျာ’’

အောင်ကျော်က ချက်ချင်း တုံ့ပြန်လိုက်သည်။ ဇော်မင်းက လည်း အောင်ကျော်ကို မထီတရီ အပြုံးနှင့် စိုက်ကြည့်လိုက်သည်။ ဖြူဖြူသန့်သန့် ဥပဓိရုပ်ပိုင်ရှင် အောင်ကျော်လို ငချွတ်တစ် ယောက်ကို သူကစာဖွဲ့နေလိမ့် မည်မဟုတ်။ အခြေအနေက နောက်ကိုပြန်ဆုတ်လို့ မရတော့ ပါ။ ဆိုင်ထဲရှိ ယမကာဝိုင်းအား လုံးက စိတ်ဝင်တစား စောင့်ကြည့် နေကြပါသည်။ လူမိုက်ဇော်မင်း အဖို့ အတော်ကြီးခံရခက်နေမှာ သေချာသည်။ သည်အတိုင်း အလျှော့ပေးဆုတ်ခွာလိုက်ပါက လူမိုက်သိက္ခာကျတော့မည်။ သူ အနိုင်ကျင့်တာကို အမြဲခံခဲ့ရတဲ့ သူတွေက မလေးမခန့် လှောင် ပြောင်ရယ်မောကြတော့မည်။

‘‘မင်းက ဘယ်သူလဲ။ ဘယ် ကလဲ’’

‘‘အဲဒါ ခင်ဗျားအလုပ်မဟုတ် ဘူးထင်တယ်’’

‘‘အဟင်း ... ဟင်း။ ငါ့အ ကြောင်း မင်းမသိဘူးထင်တယ်’’

‘‘အဲဒါလည်း ကျုပ်အလုပ်မှ မဟုတ်ဘဲ’’

‘‘ဟား ဟား ၊ မင်းက တော် တော်ငယ်ပါသေးတယ်’’

ဇော်မင်းအကြောင်းကို ကျွန် တော်ကောင်းကောင်း သိသည်။ ထိုသို့သော အခြေအနေမျိုးတွင် ကြာကြာသည်းခံနေတတ်သူ မဟုတ်။ စကားမဆုံးမီ လက်ဦးမှု ယူ လှုပ်ရှားတတ်သည်။ လှုပ် လည်း လှုပ်ရှားလိုက်ပါသည်။ သို့ သော် သူ့ထက်ပိုမြန်သော ခွေး ခြေခုံစောင်းက သူ့ချိုစောင်းပေါ် သို့ ‘ခွပ်’ ခနဲ ကျရောက်သွား သည်။ ဒေါ်ထွေးတင်၏ အထိတ် တလန့် အော်ဟစ်သံနှင့်အတူ ဇော်မင်းလဲကျသွားသည်။ သူ့ ခေါင်းမှ သွေးများဖြာခနဲ ထွက်ကျ လာသည်။ ရုတ်တရက် ပြန်မထ နိုင်ဘဲ မြေပြင်တွင် လူးလှိမ့်နေ သည်။ ဆိုင်ထဲမှ အလုပ်သမား အုပ်စုတွေ ပြေးထွက်လာပြီး ကျေ နပ်အားရသော မျက်လုံးများဖြင့် ၀ိုင်းကြည့်လိုက်ကြသည်။

×     ×   ×

ရာဇ၀င်လူဆိုး ဇော်မင်းနှင့် ဆုံစည်းခဲ့ကြပြီးနောက်ပိုင်းတွင် အောင်ကျော်၏ စူးစမ်းလေ့လာမှု တွေက ကျွန်တော့်ဘက်သို့ လှည့် လာပြန်သည်။ ကိုဖြူသီးဆိုင်မှ ဖြစ်စဉ်ကို ပိုင်းခြားဝေဖန်သုံးသပ် ရင်း ကျွန်တော့်စိတ်ကို အဖြေရှာ နေခြင်း ဖြစ်သည်။ သူ၏နောက် ဆုံးမေးခွန်းတစ်ခုကိုတော့ ကျွန် တော့်အဖြေ မပေးနိုင်ခဲ့ပါ။

‘‘ကျွန်တော်က ပုလင်းနဲ့ တွယ်ထည့်မလို့ ကြံတုန်းအစ်ကို့ လက်က မြန်လိုက်တာဗျာ။ အစ် ကိုလှုပ်ရှားလိုက်တာ အကောင်း  မြင်စိတ်နဲ့လား၊ အဆိုးမြင်စိတ်နဲ့ လား’’

ရွှေအမြုတေမဂ္ဂဇင်း၊
 ဇူလိုင်လ ၊ ၂၀၁၃