NCA လက်မှတ်ထိုးခြင်း အကြောင်းရင်းကို NMSP ကဒေသခံများအားရှင်းပြ

ရေးမြို့နယ် ၀ယ်ပေါင်ရွာ၌ ပြုလုပ်သော NMSP ရှင်းလင်းပွဲ (ဓာတ်ပုံ − NMSP (FB))

မွန်လူမျိုးများ ရသင့်ရထိုက် သည့် အခွင့်အရေးကို ဆွေးနွေးပွဲ ညှိနှိုင်းမှုမှတစ်ဆင့် ရရှိမည်ဟု ယုံကြည်၍ တစ်နိုင်ငံလုံးပစ်ခတ် တိုက်ခိုက်မှုရပ်စဲရေး သဘောတူ စာချုပ် (NCA) လက်မှတ်ရေး ထိုးရန် ဆုံးဖြတ်ခဲ့ကြောင်း မွန် ပြည်သစ်ပါတီ(NMSP)က ဒေသ ခံများ အား ရှင်းပြသည်။


NMSP ဗဟိုကော်မတီဝင် နိုင်ဉာဏ်ထွန်းဦးဆောင်သည့် အ ဖွဲ့သည် ဖေဖော်ဝါရီ ၁၀ ရက်က မွန်ပြည်နယ် ရေးမြို့နယ် ၀ယ် ပေါင်ရွာ ဘုန်းတော်ကြီးကျောင်း တွင် ဒေသခံများ၊ အဖွဲ့အစည်း ကိုယ်စားလှယ်များနှင့် တွေ့ဆုံ ကာ NCA လက်မှတ်ရေးထိုးရန် ဆုံးဖြတ်မှုအခြေအနေကို ရှင်းပြခဲ့ သည်။ အဆိုပါတွေ့ဆုံပွဲသို့လူဦး ရေနှစ်ရာခန့်တက်ရောက်သည်။

မွန်ပြည်သစ်ပါတီအနေဖြင့် လက်နက်ကိုင်တော်လှန်ရေးနည်း ဖြင့် မိမိတို့လိုလားချက်များရရှိရေး နှစ်ခြောက်ဆယ်ကျော် ဆောင် ရွက်သော်လည်း ပြဿနာကို အ ဆုံးမသတ်နိုင်ခြင်း အခြေအနေ များကိုလူထုအား ရှင်းပြခဲ့ကြောင်း NMSP ထားဝယ်ခရိုင်ဥက္ကဋ္ဌ လည်းဖြစ်သူ နိုင်ဉာဏ်ထွန်းက ပြောသည်။

‘‘ကျွန်တော်တို့ဘက်က ချည်းမဟုတ်ပါဘူး။ အစိုးရဘက် ကလည်း ဒီအပေါ်မှာလက်ခံလာ တယ်။ ဆိုတော့။ ကျွန်တော်တို့က တိုက်ခိုက်ချင်လို့ တိုက်နေတာ မဟုတ်ဘူး။ မိမိလူမျိုးရဲ့ရသင့်ရ ထိုက်တဲ့အခွင့်အရေးကို လိုလား လို့သာပေါ့။ မလွှဲမရှောင်သာ လက်နက်ကိုင်တိုက်ခိုက်ရတာ ပေါ့။ မတိုက်မခိုက်ရဘဲနဲ့ ဖြေရှင်း လို့ရတဲ့နည်းပေါ်လာရင် အချိန် မရွေးကြိုဆိုလက်ခံတာ ဒီသ ဘောပါပဲ။ အခုလည်း မတိုက်ဘဲ နဲ့စားပွဲဝိုင်းမှာ ဖြေရှင်းလို့ရမယ်ဆို တော့ မွန်ပြည်သစ်ပါတီကယုံ ကြည်မှုရှိရှိနဲ့လုပ်တာ’’ ဟု နိုင် ဉာဏ်ထွန်းက ပြောသည်။

အဆိုပါလူထုတွေ့ဆုံပွဲများ ကို မွန်ပြည်သစ်ပါတီအုပ်ချုပ်မှုရှိ ရာဒေသများ၌ ပြုလုပ်ရန်ဗဟိုက ညွှန်ကြားထားကြောင်း ဗဟိုကော် မတီဝင်နိုင်အောင်မငေးက ဆို သည်။

‘‘ကျွန်တော်တို့က NCA ကို ဘာကြောင့်ထိုးတယ်၊ ဘယ်လို ရည်ရွယ်ချက်နဲ့ထိုးတယ်၊ ဘယ် လိုအကျိုးရလဒ်ရှိတယ်။ အဲဒီကိစ္စ ကို ကျွန်တော်တို့အုပ်ချုပ်မှုဒေသ အားလုံးကို ရှင်းလင်းဖို့ညွှန်ကြား ထားတာ’’ ဟု ၎င်းကပြောသည်။

မွန်ပြည်သစ်ပါတီအနေဖြင့်  မွန်ပြည်နယ်၊ တနင်္သာရီတိုင်းနှင့် ကရင်ဒေသအချို့တွင် အခြေစိုက် လှုပ်ရှားမှုများရှိသည်။

လူထု တွေ့ဆုံရှင်းလင်းပွဲ များကို NMSP က မွန်လူမျိုးများနေထိုင်ရာ ဒေသများတွင် ယမန်နေ့ကစ၍ ပြုလုပ်နေသည်။ လူထုရှင်းလင်းပွဲများကို NCAလက်မှတ်ရေးထိုးမည့် ဖေဖော်ဝါရီ ၁၃ ရက်မတိုင်မီအထိ ပြုလုပ်မည်ဖြစ်ပြီး လက်မှတ်ရေးထိုးပြီးချိန်၌လည်း ပိုမိုကျယ်ပြန့်စွာ ဆက်လက်ပြုလုပ်ရန်စီစဉ်ထားကြောင်းNMSPတာဝန်ရှိသူများက ပြောသည်။

အစိုးရနှင့်မွန်ပြည်သစ်ပါတီ (NMSP)၊ လားဟူဒီမိုကရက်တစ် အစည်းအရုံး(LDU)တို့အကြား NCA လက်မှတ်ရေးထိုးခြင်းကို ဖေဖော်ဝါရီ ၁၃ ရက်တွင်နေပြည် တော်၌ ပြုလုပ်မည်ဖြစ်သည်။ NCA လက်မှတ်ထိုးပြီးပါက မွန် လူမျိုးအလိုက် အမျိုးသားအဆင့် နိုင်ငံရေးဆွေးနွေးပွဲများကျင်းပ ရန် ရည်ရွယ်ထားသည်။