သုံးနှစ်မျှ ဆက်တိုက် မိုးခေါင်ခဲ့သည့် ကိပ်တောင်းမြို့တွင် မိုးပြန်ရွာ

နှစ်ရှည်လများ ဆိုးရွားစွာ မိုးခေါင်နေခဲ့သည့်နောက် တောင်အာဖရိကနိုင်ငံ၊ ကိပ်တောင်းမြို့တွင် မိုးပြန်လည် ရွာသွန်းခဲ့ကြောင်း သိရသည်။


လွန်ခဲ့သည့် သုံးနှစ်အတွင်း မိုးခေါင်ရေရှားမှုဒဏ် အလူးအလဲ ခံခဲ့ရသည့် ကိပ်တောင်းတွင် ပြီးခဲ့သည့် သီတင်းပတ်ကုန်က မိုးပြန်ရွာခဲ့ခြင်း ဖြစ်သည်။ ဖေဖော်ဝါရီ ၉ ရက် ညပိုင်းက စတင်၍ မိုးရွာသွန်းချိန်တွင် မိုးရေချိန် ပမာဏ ၈ မီလီမီတာထိ ရောက်ရှိခဲ့သည်။

ကိပ်တောင်း မြို့ခံများသည် ကာလရှည်ကြာ မထိတွေ့ခဲ့ရသည့် သည်းထန်စွာ ရွာသွန်းသော မိုးရေစက်များကြောင့် အိမ်အပြင်ဘက်သို့ ပျော်ရွှင်စွာ ထွက်လာပြီး မိုးရေများကို ခံယူခဲ့ကြသည်။ ကိပ်တောင်းမြို့သည် မိုးခေါင်မှုများကြောင့် ကမ္ဘာပေါ်တွင် ပထမဆုံးအကြိမ် ရေရှားပါးမှု ကပ်ဘေးဆိုက်သည့် အထင်ကရမြို့ကြီးတစ်ခု ဖြစ်လာရန် အလွန်နီးစပ်ခဲ့သည်။

ကိပ်တောင်းတွင် နေ့စဉ် ရေကို ခွဲတမ်းစနစ်ဖြင့် သုံးစွဲရန် တာဝန်ရှိသူများက ညွှန်ကြားထားပြီး မိုးဆက်တိုက် ခေါင်နေပါက ဧပြီလလယ်ခန့်တွင် အဆိုးဆုံး အကျပ်အတည်းအဖြစ် Day Zeroခေါ် ရေပြတ်လပ်သည့်နေ့ ဆိုက်ရောက်လာမည်ဟုပင် ခန့်မှန်းထားသည်။

မိုးလေဝသ ပညာရှင်များက ယခုမိုးသည် ရက်ပိုင်းမျှ ဆက်တိုက် ရွာနေရန် မျှော်လင့်လျက် ရှိသည်။ ကိပ်တောင်း မြို့ခံများ အတွက်လည်း ယာယီအားဖြင့် ရေရှားပါးမှုကို အထိုက်အလျောက် ဖြေရှင်းနိုင်ခွင့် ရသွားခဲ့သည်။

သို့သော် လက်ရှိ မိုးရွာသွန်းမှုမျှဖြင့် Day Zero ကြုံနိုင်ခြေကို အပြီးတိုင် ဖယ်ရှားနိုင်မည် မဟုတ်ချေ။ ယင်းအစား ဧပြီလတွင် Day Zero ကြုံနိုင်သည့် အနေအထားမှ မေ ၁၁ ရက်သို့ နောက်ဆုတ်သွားကြောင်း ခန့်မှန်းထားသည်။ Day Zero ကြုံလာပါက ကိပ်တောင်း မြို့ခံများ အနေဖြင့် တစ်ဦးလျှင် ပျမ်းမျှ ရေ လီတာ ၂၀ မျှသာ နေ့စဉ် အသုံးပြုနိုင်လောက်အောင် အကန့်အသတ် ကြီးသွားမည်ဟုလည်း သိရှိရသည်။

Ref: BBC