ကိုရီးယားနှစ်နိုင်ငံ ဆက်ဆံရေး မြှင့်တင်မှုအပေါ် ခါးသီးမှု မရှိဟု အမေရိကန် ဒုသမ္မတဆို

အမေရိကန် ဒုသမ္မတ မိုက်ခ်ပန့်စ်နှင့် တောင်ကိုရီးယား သမ္မတ မွန်းဂျေအင်းတို့ကို အတူတွေ့ရစဉ်။

ကိုရီးယား နှစ်နိုင်ငံ ဆက်ဆံရေး မြှင့်တင်ရန် လုပ်ဆောင်နေမှုအပေါ် ခါးသီးသည့် သဘောထား မရှိကြောင်း အမေရိကန် ဒုတိယ သမ္မတ မိုက်ခ်ပန့်စ်က ပြောကြားခဲ့သည်။


တောင်ကိုရီးယားတွင် ကျင်းပနေသည့် ဖြောင်ချန်း ဆောင်းရာသီ အိုလံပစ်သို့ မြောက်ကိုရီးယား ခေါင်းဆောင် ကင်မ်ဂျုံအန်း၏ ညီမဖြစ်သူ ပါဝင်သည့် ကိုယ်စားလှယ်အဖွဲ့ လာရောက်ခဲ့သလို တောင်ကိုရီးယား သမ္မတ မွန်းဂျေအင်းနှင့်လည်း အဆိုပါ ကိုယ်စားလှယ်အဖွဲ့ကြား ဆွေးနွေးမှုများ ပြုလုပ်ခဲ့သည်။

ထိုအခြေအနေကြောင့် ကိုရီးယားနှစ်နိုင်ငံ ဆက်ဆံရေး ပြန်လည် နွေးထွေးလာနိုင်သော်လည်း မြောက်ကိုရီးယားနှင့် ရန်ဘက်သဖွယ် ရပ်တည်နေသော အမေရိကန်က ၎င်းတို့၏ မဟာမိတ် တောင်ကိုရီးယားအပေါ် စိတ်ပျက် ဒေါသထွက်ဖွယ် ရှိနေကြောင်း ထင်ကြေးများလည်း ပျံ့နှံ့လာသည်။

အိုလံပစ် ဖွင့်ပွဲသို့ တက်ရောက်ခဲ့သော်လည်း မြောက်ကိုရီးယား ကိုယ်စားလှယ် အဖွဲ့နှင့် ရည်ရွယ်ချက်ရှိရှိ ရှောင်လွှဲခဲ့သည့် ပန့်စ်ကမူ အမေရိကန်သည် တောင်နှင့်မြောက် ကိုရီးယား နှစ်နိုင်ငံ ဆက်ဆံရေးအတွက် မည်သည့် ခါးသီးမှုမျှ မရှိဟု ဖြေရှင်း ပြောကြားခဲ့သည်။

“မြောက်ကိုရီးယား ကိစ္စနဲ့ ပတ်သက်လို့ ကျွန်တော်တို့ မဟာမိတ် နှစ်နိုင်ငံကြားမှာ ဘာသဘောထား ကွဲလွဲစရာမှ မရှိနိုင်ပါဘူး”ဟု ပန့်စ်က ဆိုသည်။

မြောက်ကိုရီးယား၏ နျူကလီးယားလက်နက် ရည်မှန်းချက်များကြောင့် ကိုရီးယား ကျွန်းဆွယ်တွင် တင်းမာမှုများ မြင့်တက်နေချိန်၌ တောင်ကိုရီးယားက အိုလံပစ်တွင် ပါဝင်ရန် မြောက်ကိုရီးယားကို ဖိတ်ကြားခဲ့သည်။ ကိုရီးယား နှစ်နိုင်ငံမှ အားကစား အဖွဲ့များသည် အိုလံပစ် ဖွင့်ပွဲတွင် အလံတစ်ခုတည်းအောက်မှ စုပေါင်း ချီတက်ခဲ့ကြသည်။

မြောက်ကိုရီးယား ကိုယ်စားလှယ် အဖွဲ့သည်လည်း တောင်ကိုရီးယား သမ္မတ မွန်းဂျေအင်းနှင့် တွေ့ဆုံချိန်၌ ပြုံယမ်းသို့ လာရောက် လည်ပတ်ကာ နှစ်နိုင်ငံ ခေါင်းဆောင်ချင်း ဆွေးနွေးမှုများ ပြုလုပ်ရန် မြောက်ကိုရီးယားခေါင်းဆောင် ကင်မ်ဂျုံအန်း ကိုယ်စား ဖိတ်ကြားခဲ့ကြောင်း သိရှိရသည်။ 

Ref: Telegraph