တွန်ဂါတွင် နှစ်ပေါင်း ၆၀ အတွင်း အဆိုးဆုံး ဆိုင်ကလုန်းမုန်တိုင်း တိုက်ခတ်

ပစိဖိတ်တောင်ပိုင်းရှိ ကျွန်းနိုင်ငံငယ်လေး တွန်ဂါတွင် နှစ်ပေါင်း ၆၀ အတွင်း အဆိုးဆုံး ဆိုင်ကလုန်းမုန်တိုင်း တိုက်ခတ်မှုနှင့် ကြုံတွေ့ခဲ့ကြောင်း သိရသည်။

အပူပိုင်း ဆိုင်ကလုန်းမုန်တိုင်း ဂီတာသည် ဩစတြေးလျ အရှေ့ဘက်ရှိ ကျွန်းနိုင်ငံငယ်လေးကို လေတိုက်နှုန်း တစ်နာရီ ၂၃၀ ကီလိုမီတာနှုန်းဖြင့် ဝင်ရောက် တိုက်ခတ်သွားခဲ့သည်။ ဖေဖော်ဝါရီ ၁၂ ရက် ညပိုင်းက ဆိုင်ကလုန်းမုန်တိုင်း ကုန်းတွင်းဝင်ရောက် တိုက်ခတ်ခဲ့ပြီးနောက် ထိခိုက်ပျက်စီးမှု များစွာ ဖြစ်ပေါ်ခဲ့ကြောင်း ဒေသခံများက ဆိုသည်။

တွန်ဂါ အစိုးရ၏ လွှတ်တော် အဆောက်အအုံ အစိတ်အပိုင်းအချို့ ပျက်စီးခဲ့သလို နိုင်ငံ တနံတလျားတွင် အဆောက်အအုံများ၊ လမ်းများ၊ သစ်ပင်များ ပျက်စီး ပြိုကျခဲ့သည်။ တွန်ဂါ ကျွန်းစု၏ အဓိက ကျွန်းမကြီးဖြစ်သူ တွန်ဂါတာပူ တောင်ပိုင်းကမ်းခြေကို ဆိုင်ကလုန်း ဖြတ်သန်းခဲ့ပြီး ဓာတ်တိုင်များ ပြိုလဲခဲ့သလို စိုက်ခင်း ဧရိယာ မြောက်မြားစွာ ရေလွှမ်းခဲ့သည်။ ထို့အပြင် ကျွန်း၏ အရေးပါသော မွေးမြူရေး စားကျက်မြေများလည်း ရေငန်ဝင်ကာ ပျက်စီးခဲ့သည်။

ဂီတာသည် လေတိုက်နှုန်း အမြင့်ဆုံး အချိန်တွင် တစ်နာရီ ၂၃၃ ကီလိုမီတာနှုန်းထိ ရောက်ရှိခဲ့ပြီး မူလ ခန့်မှန်းသည်ထက် အားကောင်းခဲ့သည်။ သို့သော် လူအများ စိုးရိမ်သကဲ့သို့ Category Five အားအပြင်းဆုံး အဆင့်သို့မူ မရောက်ခဲ့ချေ။

တွန်ဂါတွင် ထိုမျှဆိုးရွားသည့် လေမုန်တိုင်းမျိုး လွန်ခဲ့သည့် နှစ်ပေါင်း ၆၀ မျှအတွင်း တိုက်ခတ်မှု မရှိခဲ့ချေ။ မုန်တိုင်းကြောင့် အသေအပျောက် ရှိမရှိ ဆိုသည်ကိုမူ လတ်တလော အတည်မပြုနိုင်သေးဟု အစိုးရ တာဝန်ရှိသူများက ပြောကြားခဲ့သည်။ မုန်တိုင်း ဖြတ်ကျော်သွားပြီးနောက် ဖေဖော်ဝါရီ ၁၃ ရက် မနက်ပိုင်းတွင် ဒေသခံများက အပျက်အစီးများကို ရှင်းလင်းမှုများ စတင်နေပြီဟုလည်း သိရသည်။

Ref: Guardian