မြန်မာ့-ဘင်္ဂလားဒေ့ရ်ှနယ်စပ် ခြံစည်းရိုး ကာရံမှု အရေးပေါ်ရန်ပုံငွေမှ ကျပ်ဘီလီယံ ၂၀ သုံးစွဲ

 မြန်မာ-ဘင်္ဂလား ဒေ့ရ်ှနယ်စပ် ခြံစည်းရိုးကာရံခြင်း လုပ်ငန်းနှင့် ဆက်စပ်လုပ်ငန်းများ ဆောင်ရွက်ရန် အရေးပေါ် ရန်ပုံ ငွေကျပ် ၂၀ ဘီလီယံကို ပြည်ထဲ ရေးဝန်ကြီးဌာနက ကာကွယ်ရေး ဌာနသို့ လုပ်ငန်းအပ်နှံဆောင်ရွက် မည်ဖြစ်ကြောင်း ပြည်ထဲရေးဝန် ကြီးဌာန ဒုတိယဝန်ကြီး ဗိုလ်ချုပ် အောင်စိုးက ပြောကြားသည်။


ဖေဖော်ဝါရီ ၂၂ ရက်က ကျင်းပသည့် ပြည်ထောင်စုလွှတ်တော် အစည်းအဝေးတွင် မြန်မာ- ဘင်္ဂ လားဒေ့ရ်ှနယ်စပ် ခြံစည်းရိုးကာရံ ခြင်းလုပ်ငန်းနှင့် ဆက်စပ်လုပ်ငန်းများဆောင်ရွက်ရန် လွှတ်တော်သို့ လာရောက် ရှင်းလင်းပြောကြား ခြင်းဖြစ်သည်။

မြန်မာ-ဘင်္ဂလားဒေ့ရ်ှကုန်း မြေထိစပ်နေသည့် နယ်နိမိတ်အ ရှည်သည် ၁၈၂ ဒသမ ၆၈ မိုင်ရှိ ပြီး ယင်းထိစပ်နေသည့် နယ်နိမိတ်ကို နယ်စပ်ခြံစည်းရိုးကာရံခြင်း လုပ်ငန်းများကို ၂၀၀၉ မတ်လ ၁၃ရက်မှ ၂၀၁၅ မတ်လ ၃၀ ရက်အထိ အဆင့်သုံးဆင့်ဖြင့်ဆောင် ရွက်ခဲ့ပြီး နယ်နိမိတ်မှတ်တိုင် BP2မှ BP-66 အထိ ၁၂၆ ဒသမ ၆၈မိုင် ခြံစည်းရိုးကာရံထားပြီးဖြစ် သည်။

ခြံစည်းရိုးခတ်မှု စတုတ္ထအ ဆင့်အဖြစ် BP-66 မှ မြန်မာ- ဘင်္ဂလားဒေ့ရှ်- အိန္ဒိယသုံးနိုင်ငံ နယ်နိမိတ်ဆုံရာ နေရာဖြစ်သည့် D1 အထိ ၅၆ မိုင် ဆက်လက် ဆောင်ရွက်ရန် ကျန်ရှိနေရာ၂၀၁၆-၂၀၁၇ ဘဏ္ဍာရေးနှစ်တွင်၁၁ ဒသမ ၅ မိုင် နယ်စပ်ခြံစည်း ရိုးကာရံခဲ့ပြီး ၂၀၁၇-၁၈ ဘဏ္ဍာ ရေးနှစ်တွင် ၃ ဒသမ ၂ မိုင်ထပ်မံ တိုးချဲ့ဆောင်ရွက်ခဲ့ကြောင်း ပြည်ထဲရေး ဒုဝန်ကြီးကပြောသည်။

အဆိုပါ ၃ ဒသမ ၂ မိုင်ကို ခြံစည်းရိုးကာရံပြီးစီးပါက BP67နှင့် BP68 အကြား စုစုပေါင်း ၁၄ဒသမ ၇ မိုင်ပြီးစီးမည်ဖြစ်ကာ ကျန်ရှိသည့် သုံးမိုင်ခွဲကို ဆက်လက် ဆောင်ရွက်မည်ဖြစ်ကြောင်း ၎င်းက လွှတ်တော်သို့တင်ပြခဲ့သည်။

ပြည်ထဲရေးဝန်ကြီးဌာနမှ တင်ပြသည့် အကြောင်းအရာများ နှင့် စပ်လျဉ်းပြီး ပြည်ထောင်စုလွှတ်တော်က ခွင့်ပြုမှတ်တမ်းတင်ကြောင်း လွှတ်တော်နာယက မန်း ဝင်းခိုင်သန်းက ကြေညာသည်။

Top News