အနည်းဆုံး အခကြေးငွေနှုန်းကို ကျပ် ၄,၈၀၀ သတ်မှတ်ရန် အမျိုးသားကော်မတီဆုံးဖြတ်

အစိုးရအဖွဲ့အတည်ပြုပါက စတင်ကျင့်သုံးနိုင်မည်
အနည်းဆုံးအခကြေးငွေနှင့်ပတ်သက်၍ အမျိုးသားကော်မတီအစည်းအဝေးကျင်းပနေစဉ် (ဓာတ်ပုံ − ရဲနိုင်ထွန်း)

အလုပ်သမားတစ်ဦး တစ်ရက်လုပ်ခ အနည်းဆုံးအခကြေးငွေ ကို ကျပ် ၄,၈၀၀ သတ်မှတ်ကြောင်း အနည်းဆုံးအခကြေးငွေသတ်မှတ် ရေးဆိုင်ရာ အမျိုးသားကော်မတီက ဆုံးဖြတ်ခဲ့သည်။

မတ်လ ၅ ရက်က နေပြည်တော်တွင်ပြုလုပ်သည့် အနည်းဆုံး အခကြေးငွေသတ်မှတ်ရေးဆိုင်ရာ အမျိုးသားကော်မတီအစည်းအဝေး၌ အနည်းဆုံးအခကြေးငွေ အဆိုပြုနှုန်းအတိုင်း သတ်မှတ်ကြောင်း ရွေး ချယ်ဆုံးဖြတ်ခဲ့သည်။

အနည်းဆုံးအခကြေးငွေ သတ်မှတ်ရေးဆိုင်ရာ အမျိုးသား ကော်မတီအစည်းအဝေးက ဆုံးဖြတ်သည့် အဆိုပါနှုန်းထားကို ပြည် ထောင်စုအစိုးရအဖွဲ့ထံ တင်ပြမည်ဖြစ်ပြီး အစိုးရအဖွဲ့အတည်ပြုပါက စတင်ကျင့်သုံးနိုင်မည်ဖြစ်သည်။

‘‘လုပ်ငန်းအရဆိုရင်တော့ ကော်မတီတစ်ခုကို တင်ရမှာပေါ့။ စီးပွားရေးကော်မတီကို တင်ရမယ်။ စီးပွားရေးကော်မတီက အတည် ပြုချက်ရရင် သမ္မတရုံးကို တစ်ပြိုင်နက်တင်မှာပေါ့။ ပြီးရင် အစိုးရအဖွဲ့ ကို တင်မယ်ဆိုတော့ ဒီဧပြီမကုန်ခင်အချိန် မတ်လအတွင်းမှာ ဒါတွေကို အတည်ပြုပြီးဖြစ်မယ်လို့ မှန်းထားပါတယ်’’ဟု အလုပ်သမား၊ လူဝင်မှု ကြီးကြပ်ရေးနှင့် ပြည်သူ့အင်အားဝန်ကြီးဌာန ပြည်ထောင်စုဝန်ကြီး ဦးသိန်းဆွေက ပြောသည်။

ထို့အပြင် ယခင်က အနည်း ဆုံးအခကြေးငွေကို အလုပ်သမား ၁၅ ဦးအထက် လုပ်ငန်းခွင်များ သာ အကျုံးဝင်ရာမှ ယခုအခါ အလုပ်သမား ၁၀ ဦးအထက် လုပ်ငန်းခွင်များပါ အကျုံးဝင်ရန် ဆုံးဖြတ်ခဲ့ကြောင်း အနည်းဆုံး အခကြေးငွေသတ်မှတ်ရေးဆိုင် ရာ အမျိုးသားကော်မတီအဖွဲ့ဝင် အချို့က ဆိုသည်။

ယခုဆုံးဖြတ်သော အနည်း ဆုံး အခကြေးငွေနှုန်းထားနှင့် ပတ်သက်၍ အလုပ်ရှင်၊ အလုပ် သမားနှစ်ဖက်စလုံးက လက်ခံနိုင် သည့်နှုန်းထားမဟုတ်သဖြင့် တုံ့ပြန်မည်ဆိုပါက ချင့်ချိန်လုပ်သင့်ကြောင်း အနည်းဆုံးအခကြေးငွေ သတ်မှတ်ရေးဆိုင်ရာ အမျိုးသား ကော်မတီအဖွဲ့ဝင် ဦးနော်အောင် က ပြောကြားသည်။

‘‘အလုပ်ရှင်တွေ မကျေနပ် ရင် အလုပ်ပိတ်တာတွေရှိလာမှာ ပေါ့။ အလုပ်သမားတွေ မကျေ နပ်ရင် ဆန္ဒပြတာတွေ ရှိလာမှာ ပေါ့။ အလုပ်ရှင်၊ အလုပ်သမား နှစ်ဖက်စလုံးက ဒါကို ဘယ်လိုတုံ့ ပြန်သင့်သလဲဆိုတာ စဉ်းစဉ်းစား စားနဲ့ တုံ့ပြန်သင့်တယ်’’ဟု ၎င်းက ဆိုသည်။

အနည်းဆုံး အခကြေးငွေ နှုန်းထား အသစ်သည် အများ လက်ခံသည့် နှုန်းထားဟု ယူဆပြီး အလုပ်သမားများ အမှန်တ ကယ် ရရှိခံစားနိုင်ခြင်း ရှိ၊ မရှိ စောင့်ကြည့်မည်ဟု ပြည်ထောင်စုဝန်ကြီး ဦးသိန်းဆွေက ပြော သည်။

‘‘အလုပ်သမားတွေဘက်က လည်း ဒါတွေကို သတ်မှတ်ပြီးရင် သူတို့ကို မပေးဘဲ ထားမလား။ အလုပ်တွေ ပိတ်သိမ်းပြီး အလုပ် သမားတွေလျှော့မလား၊ ဒါတွေ လည်း သူတို့စိုးရိမ်ပါတယ်။ ဒါကို လည်း ဝန်ကြီးဌာနရော သက်ဆိုင် ရာတာဝန်ရှိတဲ့ပုဂ္ဂိုလ်တွေနဲ့ အမြဲ တမ်းစောင့်ကြည့်လေ့လာပြီးတော့ အားလုံးအတွက် အကောင်းဆုံးဖြစ်အောင် ဆောင်ရွက်သွားမယ်လို့ ပြောချင်ပါတယ်’’ဟု ၎င်းက ဆိုသည်။

ယခုဆုံးဖြတ်ခဲ့သော အနည်း ဆုံးအခကြေးငွေနှုန်းထားသည် ပုဂ္ဂလိကလုပ်ငန်းခွင်များမှ အလုပ်သမားများနှင့်သာ အကျုံးဝင်ပြီး အစိုးရဝန်ထမ်းများနှင့်ပတ်သက် ၍မူ သက်ဆိုင်သည့် စီမံကိန်းနှင့် ဘဏ္ဍာရေးဝန်ကြီးဌာနနှင့် ညှိနှိုင်း ဆောင်ရွက်ရမည်ဟု ပြည်ထောင် စုဝန်ကြီးက ဆက်လက်ပြောကြား သည်။

ထိုသို့ အမျိုးသားကော်မတီ က ဆုံးဖြတ်သော အနည်းဆုံး အခကြေးငွေနှုန်းထားသည် အလုပ် ရှင်၊ အလုပ်သမားများ မျှော်လင့် ထားသည့်နှုန်းထားနှင့်ကွာခြားနေ သည်ဆိုကာ နှစ်ဖက်စလုံးက လက်မခံနိုင်ကြောင်း ဆိုသည်။

‘‘ကျွန်တော်တို့ကတော့ တစ်ရက်လုပ်ခ ကျပ် ၅,၆၀၀ သတ်မှတ်ရေးမူကိုပဲ ဆက်ပြီး ဆုပ်ကိုင်သွား မှာပါ။ ပြည်ထောင်စုအစိုးရအဖွဲ့ အနေနဲ့ အလုပ်သမားတွေတောင်း ဆိုချက်အခက်အခဲကို သိထားပြီးဖြစ်ပြီထင်တာကြောင့် အတည်ပြုချက်ပေးတဲ့အခါ ရလဒ်ပြောင်းလဲသတ်မှတ်ပေးဖို့ မျှော်လင့်ပါတယ်’’ဟု မြန်မာနိုင်ငံ စက်မှုလက်မှုနှင့် ဝန်ဆောင်မှုလုပ်ငန်းပေါင်းစုံ အလုပ်သမားသမဂ္ဂများအဖွဲ့ချုပ် အထွေထွေအတွင်းရေးမှူး ကို သက်နှင်းအောင်က ပြောသည်။

ထို့အပြင် တစ်ရက်လုပ်ခ ကျပ် ၄,၈၀၀ သတ်မှတ်ရွေးချယ် သည့်အပေါ် လွှတ်တော်ကိုယ်စား လှယ်များက အလုပ်သမားများ ဘက်က ရပ်တည်သည်ကို ပြသ သည့်အနေဖြင့် မေးခွန်းထုတ်ပေး ရန်လိုအပ်ကြောင်း ၎င်းက တိုက် တွန်းသည်။

အထည်ချုပ်လုပ်ငန်းရှင်အ ချို့က တစ်ရက်လုပ်ခကျပ် ၄,၈၀၀ သတ်မှတ်ခြင်းကြောင့် လုပ်ငန်းရေရှည်ရပ်တည်ရန် အခက်အခဲ များရှိလာနိုင်ကြောင်း ဆိုသည်။

‘‘တစ်ဆင့်ခံ လက်ခစားယူ လုပ်နေတဲ့ အထည်ချုပ်လုပ်ငန်း တွေအတွက်ကတော့ တော်တော် အခက်အခဲ ရှိလာနိုင်ပါတယ်။ တစ်ဆင့်ခံကနေ ကိုယ်တိုင် အော် ဒါယူချုပ်နိုင်တဲ့ အဆင့်ရောက် အောင် ကြိုးစားရတော့မယ့်အခြေ အနေပါ’’ဟု အထည်ချုပ်လုပ်ငန်း ရှင် ဦးအေးသောင်းက ပြောသည်။၎င်းအနေဖြင့်မူ အလုပ်ရှင်၊ အလုပ်သမား နှစ်ဖက် မတင်မကျ ဖြစ်နေသော အနည်းဆုံးအခကြေး ငွေနှုန်းထားကို အမျိုးသားကော်မ တီက ကြားချသတ်မှတ်ပေးခြင်း အပေါ် လက်ခံကြိုဆိုကြောင်း ပြောသည်။

‘‘နှုန်းထားသတ်မှတ်ဖို့ အချိန်ကြာလေလေ အလုပ်ရှင်၊ အလုပ် သမားရန်တိုက်ပေးသလိုဖြစ်နေ တာဆိုတော့ အခုလို ဆုံးဖြတ် လိုက်တာကောင်းတယ်။ ကျွန် တော်တစ်ဦးတည်း သဘောဆန္ဒ အရဆိုရင်တော့ ဒီဆုံးဖြတ်ချက် ဟာ အမြော်အမြင်ရှိရှိနဲ့ မျှတတဲ့ ဆုံးဖြတ်ချက်လို့ မြင်တယ်’’ဟု ဦးအေးသောင်းက ဆိုသည်။

အနည်းဆုံးအခကြေးငွေ သတ်မှတ်ရေးဆိုင်ရာ အမျိုးသား ကော်မတီသည် ဇန်နဝါရီ ၂ ရက် က အနည်းဆုံးအခကြေးငွေအဆို ပြုနှုန်းကို ကျပ် ၄,၈၀၀ သတ်မှတ် ကြောင်း ကြေညာပြီး ယင်းနှုန်း ထားနှင့်ပတ်သက်၍ ကန့်ကွက် သည့် တိုင်းဒေသကြီး၊ ပြည်နယ် များရှိ အလုပ်ရှင်၊ အလုပ်သမား ကိုယ်စားလှယ်များနှင့် တွေ့ဆုံ ညှိနှိုင်းခဲ့သည်။

 အဆိုပြုနှုန်း မထွက်ပေါ်မီ  အလုပ်သမားများက တစ်ရက် လုပ်ခ ကျပ် ၅,၆၀၀ ပေးရန် တောင်းဆိုထားပြီး အလုပ်ရှင်များ က ကျပ် ၄,၀၀၀ မှ ကျပ် ၄,၂၀၀ ခန့်သာ ပေးနိုင်မည်ဟု ထုတ်ဖော် ပြောကြားသည်။

အနည်းဆုံး အခကြေးငွေ အဆိုပြုနှုန်းနှင့်ပတ်သက်​၍ တိုင်း ဒေသကြီးနှင့် ပြည်နယ် ၁၀ ခုမှ အလုပ်ရှင်၊ အလုပ်သမားများ ကန့်ကွက်လွှာလေးထောင်ကျော် နှင့် ထောက်ခံတင်ပြလွှာ ၁၁ ခုရှိကြောင်း အလုပ်သမားညွှန်ကြား မှုဦးစီးဌာနက သတင်းထုတ်ပြန် သည်။  ယင်းအဆိုပြုနှုန်းထားကို ပြည်ထောင်စုနယ်မြေ၊ ကချင်၊ ကယား၊ ကရင်နှင့် ချင်းပြည်နယ် တို့က ကန့်ကွက်၊ အကြံပြုမှုများ မရှိခဲ့ကြောင်း ထုတ်ပြန်ချက်၌ ဖော်ပြထားသည်။

ထို့နောက် အမျိုးသားကော် မတီက အဆိုပြုနှုန်းအပေါ် ကန့် ကွက်မှုများနှင့် ပတ်သက်၍ အောက်ခြေမှ ညှိနှိုင်းတွေ့ရှိချက် များကို စုစည်းကာ ဖြစ်သင့်သည့် နှုန်းထားတစ်ခုကို ပြန်လည်ရွေး ချယ်ဆုံးဖြတ်ခဲ့သည်။

အနည်းဆုံးအခကြေးငွေကို တစ်ရက်လုပ်ခကျပ် ၃,၆၀၀ အဖြစ် ၂၀၁၅ စက်တင်ဘာတွင် စတင်သတ်မှတ်ခဲ့ပြီး ယခုဒုတိယ အကြိမ် ပြောင်းလဲသတ်မှတ်ရန် ဆောင်ရွက်ခြင်းဖြစ်သည်။

More in News Section

Top News