ကျောက်မျက်အသင်းချုပ်ဥက္ကဋ္ဌသစ်အဖြစ် ဦးလဖိုင်ခွန်ဆာကို ရွေးကောက်တင်မြှောက်

 မြန်မာနိုင်ငံ ကျောက်မျက်ရတနာလုပ်ငန်းရှင် များအသင်းချုပ် ပဉ္စမသက်တမ်းအတွက် ဥက္ကဋ္ဌနှင့် အလုပ်အမှုဆောင်သစ်များ ရွေးကောက်ပွဲ ကို နေပြည်တော်တွင် နှစ်ရက် ကြာကျင်းပပြီး ဥက္ကဋ္ဌသစ်အဖြစ် ဦးလဖိုင်ခွန်ဆာကို ရွေးကောက် တင်မြှောက်ခဲ့ကြောင်း အဆိုပါ အသင်းရွေးချယ်တင်မြှောက်ရေး ကြီးကြပ်မှုကော်မရှင်အတွင်းရေး မှူး ဦးခင်ဇော်က ပြောသည်။


ကျောက်မျက်အသင်းချုပ် ရွေးကောက်ပွဲနှင့်ပတ်သက်၍ ဝေဖန်ကန့်ကွက်မှုများရှိသော် လည်း အသင်းချုပ်၏ ငါးကြိမ် မြောက်အလုပ်အမှုဆောင်နှင့် ဗဟိုအလုပ်အမှုဆောင်အဖွဲ့သစ် ရွေးချယ်တင်မြှောက်ပွဲကို နေပြည်တော် မဏိရတနာကျောက်စိမ်း ခန်းမတွင် မတ်လ ၁၀ ရက်မှ ၁၁ ရက်အထိ နှစ်ရက်ကျင်းပခဲ့သည်။

ကျောက်မျက်အသင်းချုပ် ဥက္ကဋ္ဌအပါအ၀င် အလုပ်အမှု ဆောင်နှင့် ဗဟိုအလုပ်အမှု ဆောင်သစ်များကို ဆန္ဒမဲပေးစနစ်ဖြင့် ရွေးကောက်တင်မြှောက်ခဲ့ ကြောင်း ဦးခင်ဇော်ကပြောသည်။

‘‘ပွဲ (ရွေးကောက်ပွဲ)ကတော့ အောင်မြင်စွာနဲ့ပဲ အမှုဆောင်အ သစ်အားလုံးရွေးချယ်ပြီးသွားပြီ’’ ဟု ဦးခင်ဇော်က 7Day Daily သတင်းစာအား ပြောကြားသည်။

ဦးလဖိုင်ခွန်ဆာသည် ဥက္ကဋ္ဌ နေရာဝင်ရောက်ယှဉ်ပြိုင်သူ လေး ဦးအနက် ထောက်ခံမဲ ၁၀၀ ကျော်ရကာ မဲအပြတ်အသတ်ဖြင့် ၂၀၁၈ မှ ၂၀၂၁ အတွင်း သုံးနှစ်အတွက် ကျောက်မျက်အသင်းချုပ် ဥက္ကဋ္ဌအဖြစ် ရွေးကောက်တင်မြှောက်ခံ ရကြောင်း ရွေးချယ်တင်မြှောက် ရေးကြီးကြပ်မှုကော်မရှင်တာဝန် ရှိသူများကပြောသည်။ အသင်းဥက္ကဋ္ဌရွေးကောက်ပွဲအတွက် မဲပေးခွင့်ရှိသူ ၃၀၀ကျော်ရှိကြောင်း ပြန်ကြားရေးဝန်ကြီးဌာနက သ တင်းထုတ်ပြန်သည်။

ကျောက်မျက်အသင်းချုပ် ဥက္ကဋ္ဌအဖြစ် ဦးတေဇနှင့် ဦးရုံးမူတို့တာဝန်ယူဖူးပြီး ဦးလဖိုင်ခွန်ဆာ သည် တတိယမြောက်ကျောက်မျက်အသင်းချုပ်ဥက္ကဋ္ဌ ဖြစ်လာသည်။ ၎င်းသည် ယခင်က ကျောက်မျက်အသင်းချုပ် ဒုဥက္ကဋ္ဌ(၁) အဖြစ် တာဝန်ယူခဲ့ပြီး ဧရာကျောက်စိမ်းကုမ္ပဏီ ပိုင်ဆိုင် ကြောင်း ရွေးချယ်ရေးကော်မရှင် တာဝန်ရှိသူများက ဆိုသည်။

‘‘သူက မူလကလည်း အ သင်းချုပ်ကပဲ။ ဦးရုံးမူတို့နဲ့ အတူ တူပဲ’’ဟု ဦးခင်ဇော်က ပြောသည်။ကျောက်မျက်အသင်းချုပ် ဥက္ကဋ္ဌအပြင် ဒုဥက္ကဋ္ဌ ခြောက်ဦး၊ အတွင်းရေးမှူး ခြောက်ဦး၊ ဗဟို အလုပ်အမှုဆောင် ၂၂ ဦးနှင့် အ လုပ်အမှုဆောင် ၃၀ ဦးကိုလည်း ရွေးချယ်ခဲ့သည်။

ကျောက်မျက်အသင်းချုပ် စည်းမျဉ်းစည်းကမ်းများအရ စစ်ကိုင်း၊ မန္တလေး၊ မိုးကုတ်၊ မြစ် ကြီးနား၊ ဖားကန့်နှင့် ရန်ကုန်မြို့ရှိ ကျောက်မျက်အသင်းခွဲခြောက်ခု မှ အသင်းဥက္ကဋ္ဌများသည် အသင်း ချုပ် ဒုဥက္ကဋ္ဌများဖြစ်လာမည်။

မြန်မာနိုင်ငံကျောက်မျက် ရတနာလုပ်ငန်းရှင်များအသင်း ချုပ် ပဉ္စမသက်တမ်းအလုပ်အမှု ဆောင်နှင့် ဗဟိုအလုပ်အမှုဆောင်နေရာများအတွက် ၀င်ရောက်ယှဉ်ပြိုင်ရန် စာရင်းပေးလျှောက်ထား သူ ၁၃၇ ဦးရှိပြီး အသင်းစည်းမျဉ်းစည်းကမ်းများနှင့် ကိုက်ညီသူ ၁၀၄ဦးကို ရွေးချယ်ခံအဖြစ်သတ်မှတ် ခဲ့ကြောင်း ပြန်ကြားရေးဝန်ကြီး ဌာနက သတင်းဖော်ပြသည်။

မြန်မာနိုင်ငံကျောက်မျက် ရတနာလုပ်ငန်းရှင်များအသင်း ချုပ်အောက်တွင် အသင်းခွဲ ခြောက်ခုရှိပြီး အဆိုပါအသင်းခွဲများ၌ အသင်းဝင် တစ်သောင်းကျော်ရှိ သော်လည်း အသင်းစည်းကမ်း နှင့် မညီညွတ်သူများကို ရွေး ကောက်ခံနှင့် မဲပေးခွင့်စာရင်း တွင် ထည့်သွင်းထားခြင်းမရှိ ကြောင်း ရွေးချယ်တင်မြှောက်ရေး ကြီးကြပ်မှုကော်မရှင်အဖွဲ့ဝင် ဦး ထွန်းထွန်းက ဆိုသည်။

မြန်မာနိုင်ငံကျောက်မျက် ရတနာလုပ်ငန်းရှင်များအသင်း ကို ၂၀၀၈ တွင် အသင်းအဖြစ် တရားဝင်မှတ်ပုံတင်ဖွဲ့စည်းကာ ထိုသို့ဖွဲ့စည်းခဲ့ပြီးနောက် ၂၀၀၈ မှ၂၀၁၄ အထိ အသင်းဥက္ကဋ္ဌအဖြစ် ဦးတေဇက နှစ်ကြိမ်ဆက်တာဝန် ယူကာ ၂၀၁၄မှ၂၀၁၇အထိဦးရုံးမူက ဥက္ကဋ္ဌအဖြစ်တာဝန်ယူခဲ့သည်။

ကျောက်မျက်အသင်းချုပ် ပဉ္စမသက်တမ်းရွေးကောက်ပွဲနှင့် ပတ်သက်၍ ရွေးချယ်တင်မြှောက် ရေး ကြီးကြပ်မှုကော်မတီက ထုတ်ပြန်သည့် စည်းမျဉ်းစည်းကမ်းများ ကို မန္တလေးကျောက်မျက်အသင်း က ကန့်ကွက်ထားသည်။

Top News