ဟုမ္မလင်းနှင့်တနိုင်းတွင် အင်အားအသင့်အတင့်ရှိ ငလျင်နှစ်ကြိမ်လှုပ်

 ဧပြီအတွင်း နှစ်ကြိမ် မြောက်အဖြစ် ဟုမ္မလင်းနှင့် တနိုင်းမြို့တွင် အင်အားရစ်ခ်ျတာ စကေး ၄ ဒသမ ၅ အဆင့်ရှိသော ငလျင်နှစ်ကြိမ် ရက်ခြား၍ လှုပ် ရှားခဲ့ပြီး ထိခိုက်ပျက်စီးမှု မရှိခဲ့ပေ။

 စစ်ကိုင်းတိုင်းဒေသကြီး ဟုမ္မလင်းမြို့အနီးတွင် ဧပြီ၎ ရက်ည ၉ နာရီ ၅၁ မိနစ်က လှုပ်ခဲ့ပြီး မြေအနက် ၁၀ ကီလိုမီတာကို ဗဟိုပြုသော ဇောက်တိမ်ငလျင်ဖြစ်၍ လှုပ်ရှားမှုသိသာခဲ့သည်။ သို့သော်ထိခိုက်ပျက်စီးမှု မရှိခဲ့ကြောင်း စစ်ကိုင်းတိုင်းဒေသကြီး ဘေးအန္တရာယ်ဆိုင်ရာ စီမံခန့်ခွဲမှုဦးစီးဌာန ဦးစီးမှူး ဦးစဝီလီဖရန့်က ပြောသည်။


ကချင်ပြည်နယ် တနိုင်းမြို့ တွင် ဧပြီ ၂ရက် ညနေ၆ နာရီ ၁၂ မိနစ်က လှုပ်ခတ်ခဲ့ပြီး မြေအနက် ၁၈၀ ကီလိုမီတာကို ဗဟိုပြုခဲ့၍ လှုပ်ရှားမှု မပြင်းထန်ခဲ့ပေ။ ငလျင်သည် မြေအနက်တိမ်ကို ဗဟိုပြုပါက လှုပ်ရှားမှု ပြင်းထန် ပြီး ဇောက်နက်သည့်နေရာတွင် ဗဟိုပြုပါက လှုပ်ရှားမှုသက်သာ လေ့ရှိသည်။ ကီလိုမီတာ ၇၀ အတွင်း ဗဟိုပြုပါက ဇောက်တိမ် ငလျင်၊ ကီလိုမီတာ ၇၀ မှ ကီလို မီတာ ၁၈၀ အတွင်း ဗဟိုပြုပါက ဇောက်လတ် နှင့် ကီလိုမီတာ ၁၈၀ မှ ကီလိုမီတာ ၃၀၀ အတွင်း ဗဟိုပြုပါက ဇောက်နက်ငလျင်ဟု သတ်မှတ်ထားသည်။

၂၀၁၈ ဇန်နဝါရီ ၁ ရက်မှ ဧပြီ ၅ ရက်အတွင်း မြန်မာနိုင်ငံ ဒေသအနှံ့တွင် အင်အားအနည်း ငယ်နှင့် အင်အားအသင့်အတင့် ရှိသော ငလျင် ၅၄ ကြိမ် လှုပ်ခတ် ခဲ့ကာ ပျက်စီးမှုအချို့ရှိခဲ့ပြီး ဒေသ ခံများ စိုးရိမ်ထိတ်လန့်ခဲ့သည်။

Top News