မြန်မာ-တရုတ်နယ်စပ် ကုန်သွယ်ရေးတွင် ငွေတရားဝင်လွှဲပြောင်းနိုင်ရန် ကုန်သည်များလိုလား

 မြန်မာ-တရုတ်နှစ်နိုင်ငံ နယ်စပ်ကုန်သွယ်ရေးတွင် ငွေ ကြေးလွှဲပြောင်းမှုကို အစိုးရက တရားဝင်ဆောင်ရွက်ပေးရန် မူဆယ်မြို့မှ ကုန်သည်အချို့က တောင်းဆိုသည်။

၂၀၁၇-၁၈ ဘဏ္ဍာနှစ် မြန်မာနိုင်ငံ ကုန်သွယ်ရေး စုစု ပေါင်း ဒေါ်လာ ၃၂ ဘီလီယံကျော်တွင် မြန်မာ၊ တရုတ်နယ်စပ်ကုန်သွယ်ရေးက ဒေါ်လာ ၆ ဒသမ ၆ ဘီလီယံကျော် ရှိသည်။

ကန်ဒေါ်လာဖြင့် တွက်ပါ ကတစ်ရက်လျှင် ဒေါ်လာ ၁၃ သန်းခန့် ကုန်သွယ်နေသော မူဆယ်၊ ရွှေလီနယ်စပ် ကုန်သွယ်ရေး ငွေလွှဲရာတွင် တရုတ်နိုင်ငံ ရွှေလီမြို့ရှိ ဘဏ်အချို့ကို အသုံးပြုနေရသည်။ မူဆယ်နယ်စပ်၌ ကုန်ပစ္စည်းများရောင်းဝယ်ရာတွင် ယွမ်ငွေကိုသာ အဓိက အသုံးပြုသဖြင့် တရုတ်နိုင်ငံဘဏ်များ၌ မြန်မာကုန်သည်များက ငွေစာရင်းဖွင့်လှစ်ပြီး ဆောင်ရွက်နေရ သည်ဟု မူဆယ်မြို့မှ ကုန်သည်အချို့က ပြောသည်။

တရုတ်ဘဏ်များတွင် မြန်မာကုန်သည်များ ငွေစာရင်းဖွင့်ပြီး ကုန်ပစ္စည်းများ ရောင်းဝယ်ရာ၌ တရုတ်အစိုးရက  လောင်းကစားမှုများအပါအ၀င် အကြောင်းပြချက်မျိုးစုံဖြင့် မြန်မာကုန်သည်များ၏ ငွေစာရင်းများကို ပိတ်၍ စစ်ဆေးနေသည်။ ထိုသို့ပြုလုပ်ရာတွင် မြန်မာကုန်သည်များ ဆုံးရှုံးနစ်နာမှုများ ရှိသဖြင့် မြန်မာဘဏ်များသို့ တရားဝင် ငွေလွှဲ နိုင်ရန် အစိုးရ တာဝန်ရှိသူများက ဆောင်ရွက်ပေးသင့်ကြောင်း မူဆယ်မြို့မှ ကုန်သည်များက ပြောသည်။

မတ်လ ၂၃ ရက်က ယူနန်ပြည်နယ်ရှိ ဘဏ်အချို့တွင် ငွေစာရင်းဖွင့်လှစ်ထားသော မြန်မာကုန်သည်အချို့၏ ငွေစာရင်းများ အပိတ်ခံခဲ့ရသည်။ ဆန်၊ သကြားကုန်သည်များ၏ ငွေစာရင်းများ အပါအ၀င် မူဆယ်မြို့ရှိ မြန်မာကုန်သည်များ၏ ငွေစာရင်းများပါဝင်ပြီး ဧပြီ ၆ ရက်တွင် ငွေစာရင်းအချို့ တရုတ်အစိုးရက ပြန်လည်ဖွင့်လှစ်ပေးခဲ့သည်ဟု မူဆယ်မြို့ရှိ  ကုန်သည်အချို့က ပြောကြားသည်။