သစ်ခိုးအဖွဲ့များကို ဖမ်းဆီးနိုင်ရေး တရုတ်အာဏာပိုင်များသို့ ဆက်သွယ်ရန် ကချင်ပြည်နယ်အစိုးရ ကြိုးပမ်းနေ

ဖမ်းမိထားသော သစ်လုံးများကို ခိုးထုတ်သယ်ယူနေစဉ်

ကချင်ပြည်နယ် ချီဖွေ နှင့် ဆော့လော်မြို့နယ်အတွင်း ဖမ်းမိထားသည့် သစ်လုံးများကို တရုတ်သစ်မှောင်ခိုအဖွဲ့က ကား ဖြင့် ခိုးထုတ်သယ်ယူနေသည်ဆို သည့် ဆော့လော်အမတ်၏ တင်ပြမှုကို အောက်ခြေ၌ စိစစ် နေပြီး ခိုးထုတ်မှုများရှိပါက တရုတ်အာဏာပိုင်များသို့ ဆက် သွယ်၍ ဖမ်းဆီးနိုင်ရေး ကြိုးစား နေကြောင်း ကချင်ပြည်နယ် သယံဇာတနှင့် သဘာဝပတ်ဝန်း ကျင် ထိန်းသိမ်းရေးဝန်ကြီး ဦးH လအောင်က ပြောသည်။


ချီဖွေနှင့် ဆော့လော်ဒေသရှိ တရားမဝင် စကားဝါ၊ ထင်းရှူး သစ်လုံး ၁,၉၁၆ လုံး (၁,၃၅၀ တန်ခန့်)ကို သစ်တောဦးစီးဌာန နှင့် ဌာနဆိုင်ရာများက ပိုင်ရှင်မဲ့ ဖမ်းဆီးရမိခဲ့ကြောင်း အဆိုပါ ဖမ်းမိထားသည့် သစ်များအတွက် ကျသင့်အခွန်ငွေ သွင်းခြင်းနှင့် သစ်များလွှဲပြောင်း လက်ခံခြင်း ကို မေလ ၂၅ ရက်တွင် ဆောင် ရွက်ရန် ချိန်းဆိုထားသော်လည်း မေလ ၁၈ ရက်ကစ၍ တရုတ် နိုင်ငံမှ သစ်မှောင်ခိုအဖွဲ့များက ကားအစီး ၄၀ ခန့်ဖြင့် တရုတ် နိုင်ငံအတွင်းသို့ ခိုးယူသယ် ဆောင်နေကြောင်း ဆော့လော် ပြည်သူ့လွှတ်တော် ကိုယ်စား လှယ် ဦးလာမာလေးက နိုင်ငံ တော် သမ္မတထံ မေလ ၂၂ ရက် က တိုင်ကြားထားသည်။

အဆိုပါကိစ္စနှင့်ပတ်သက် ၍ ဦးလာမာလေးသည် မေလ ၂၄ ရက်တွင် ကချင်ပြည်နယ် ဝန်ကြီးချုပ် ဒေါက်တာခက်အောင်၊ ပြည်နယ် သယံဇာတနှင့် သဘာဝပတ်ဝန်းကျင် ထိန်းသိမ်းရေးဝန်ကြီးတို့ကို သွားရောက်တွေ့ဆုံတင်ပြခဲ့သည်။

‘‘ဝန်ကြီးချုပ်ကတော့ ဒီသစ် ခိုးတဲ့ကိစ္စနဲ့ပတ်သက်ပြီး သတင်း ရရချင်း နယ်လုံဝန်ကြီးကို စိစစ် ဆောင်ရွက်ရန် ညွှန်ကြားခဲ့တယ် လို့ ပြောတယ်’’ဟု ဦးလာမာလေး က ပြောသည်။

ထို့နောက် သယံဇာတနှင့် သဘာဝပတ်ဝန်းကျင် ထိန်းသိမ်း ရေးဝန်ကြီး ဦးHလအောင်နှင့်တွေ့ဆုံရာ ဝန်ကြီးက ချီဖွေ၊ ဆော့လော်မြို့နယ်နှင့် ထိစပ်နေသည့် တရုတ်နိုင်ငံဘက်ခြမ်းမှ အာဏာပိုင်များနှင့် ဆက်သွယ်ပြီး သစ်ခိုးမှုကို စုံစမ်းအရေးယူနိုင်ရန်ဆောင်ရွက်နေကြောင်း ပြောကြားသည်ဟု ဦးလာမာလေးက ဆိုသည်။

‘‘ပေါင်ရှန်ခရိုင် ဆက်ဆံရေး ရုံးမှာ သစ်ခိုးမှုနဲ့ပတ်သက်တဲ့ တရုတ်တွေကို စိစစ်စုံစမ်းပြီး အ ရေးယူဖို့ စာရေးပို့သွားမယ် ပြောတယ်။ ဒီနေ့ ကက်ဘိနက် (အစိုးရအဖွဲ့အစည်းအဝေး) ထိုင်ပြီးပြည်နယ်အစိုးရ သဘောတူညီချက်ရမယ်ဆိုရင် ပြည်ထောင်စု အစိုးရကို တင်ပြမယ်။ ပြည်ထောင်စုအစိုးရ သဘောတူညီချက်ရရင် သူတို့ ဆက်လုပ်သွားမယ်လို့ပြောတယ်’’ဟု ၎င်းကဆိုသည်။

ဝန်ကြီး ဦးHလအောင်က အဆိုပါကိစ္စကို ဝန်ကြီးချုပ်ထံ တင်ပြထားပြီး ဝန်ကြီးချုပ်၏ ခွင့်ပြုချက်ရရှိပါက ပြည်ထောင်စုအစိုးရထံ တင်ပြကာ ဆက်လက် ဆောင်ရွက်မည်ဟု ပြောသည်။

‘‘နိုင်ငံတော်ရဲ့ ဘဏ္ဍာတော် ပစ္စည်းတွေကို ပြည်ပက ဒီလိုမျိုး လုပ်ရဲတယ်ဆိုရင် ကျွန်တော်တို့ သမိုင်းမကောင်းဘူး။ ပြည်သူတွေ ရဲ့အမြင် ကျွန်တော်တို့အပေါ်မှာ တစ်မျိုးမြင်နိုင်ပါတယ်။ ကျွန် တော်တို့ အစိုးရက အဂတိလိုက် စားတာကို အရှိန်မြှင့်တိုက်ဖျက် နေတဲ့ ကာလလည်းဖြစ်တယ်’’ ဟု ဦးHလအောင်က ပြောသည်။

အဆိုပါ ဖမ်းမိသစ်များကို ကချင်အထူး ဒေသ(၁) ထာဝရ ငြိမ်းချမ်းရေးအဖွဲ့ ပန်ဝါဗဟိုဌာန ချုပ်၊ ပူတာအိုနဂါးကုမ္ပဏီ၊ ဆော့ လော်မြို့နယ် ပြည်သူ့လွှတ်တော် ကိုယ်စားလှယ်နှင့် အမျိုးသား လွှတ်တော်ကိုယ်စားလှယ်တို့ကို ဒေသဖွံ့ဖြိုးရေး လုပ်ငန်းများ အသုံးပြုရန် ရောင်းချမည်ဟု ကချင်ပြည်နယ် အစိုးရအဖွဲ့က ဆိုသည်။

‘‘အခုက စဉ်းစားစရာက ကားအစီး ၄၀ သွားတာလည်း သိတယ်။ သွားတဲ့အချိန်လည်းပဲ နယ်ခြားစောင့်ဂိတ်ရယ်၊ စစ်တပ် ဂိတ်ရယ်၊ ပြည်သူ့ဂိတ်ရယ် ဖြတ် သွားတယ်ဗျာ။ ပြည်သူ့စစ်ဂိတ် ဆိုရင် အနည်းဆုံး သုံးဂိတ် လောက်ဖြတ်ရတယ်။ အဲဒီမှာ ပန်ဝါပြည်သူ့စစ်အဖွဲ့တွေ ထိုင် ကြတယ်။ သူတို့ကို ရောင်းပေး မယ်ဆိုတဲ့သစ်ကို ပြန်ခိုးထုတ် တာကို မတားနိုင်ဘူးဆိုရင် ဒါစဉ်း စားစရာပေါ့’’ဟု ဦးလာမာလေး က ပြောသည်။ မေလ ၂၃ ရက်က ရရှိသည့် သတင်းအရ သစ်ခိုးကား ၂၈ စီး ထွက်ခွာပြီးဖြစ်သည်ဟု ၎င်းကဆိုသည်။

More in News Section

Top News