နိုင်ငံတကာကျောင်းများရှိ ကျောင်းသား ၁၆၀ ကျော် အစိုးရသင်ရိုးသင်ကျောင်းများသို့ ပြောင်းတက်

ရန်ကုန်မြို့ ပြည်လမ်းအနီး တီတီစီကျောင်းအဆောက်အအုံကို မြင်ရစဉ်(ဓာတ်ပုံ − နစ်ကီ)

၂၀၁၈-၁၉ ပညာသင် နှစ်တွင် နိုင်ငံတကာကျောင်းများ နှင့် နိုင်ငံတကာသင်ရိုးသင် ပြည် တွင်းပုဂ္ဂလိက  ကျောင်းများမှ မြန်မာအစိုးရသင်ရိုးသင်ကျောင်း များသို့ ပြောင်းရွှေ့တက်ရောက် သူ ၁၆၃ ဦးရှိသည်ဟု ရန်ကုန် တိုင်းဒေသကြီး ပညာရေးမှူးရုံး က မေလ ၃၁ ရက်၌ ကြေညာ သည်။

 ကျောင်းပြောင်းရွှေ့တက် ရောက်လိုသူများအတွက် Plancement Test ကို မေလ ၁၄ မှ ၁၉ ရက်အထိ စစ်ဆေးခဲ့ပြီး မေလ ၃၁ ရက်တွင် တက်ရောက် ခွင့်ရသူများ စာရင်းကို ကြေညာ ခဲ့သည်။


 အစိုးရသင်ရိုးသင်ကျောင်း များသို့ ပြောင်းရွှေ့တက်ရောက် ခွင့် လျှောက်ထားသူများအနက် န၀မတန်း ၄၁ ဦး၊ အဋ္ဌမတန်း ၃၀ ဦး၊ သတ္တမတန်း ငါးဦး၊ ဆဋ္ဌမတန်း တစ်ဦး၊ ပဉ္စမတန်း ခြောက်ဦး၊ စတုတ္ထတန်း ၁၆ ဦး၊ တတိယတန်း ၁၀ ဦး၊ ဒုတိယတန်း ၂၂ ဦး၊ပထမတန်း ၂၄ ဦး၊ သူငယ်တန်းရှစ်ဦးအား ပြောင်းတက်ခွင့်ပေး ခဲ့သည်။

 ‘‘လျှောက်တဲ့သူထဲက Plancement Test အောင်တဲ့စာ ရင်းကို ရုံးမှာကြေညာထားပေး တယ်’’ဟု ရန်ကုန်တိုင်းဒေသကြီး ပညာရေးမှူးရုံး ညွှန်ကြားရေး မှူး(ပညာ)  ဒေါ်မြင့်မြင့်ခိုင်က ပြောသည်။

  နိုင်ငံတကာကျောင်းနှင့် နိုင်ငံတကာသင်ရိုးသင်ကြားနေ သည့် ပုဂ္ဂလိကကျောင်းများ တက်ရောက်နေရင်း အစိုးရကျောင်းများသို့ ကူးပြောင်းတက်ရောက်လိုသူများအတွက် အခွင့်အရေးပေးခြင်းဖြစ်ပြီး နယ်စပ်ဒေသကျောင်းများမှ ကျောင်းသားများ လည်း အကျုံးဝင်သည်ဟု ပညာရေးဝန်ကြီးဌာန ပြောရေးဆိုခွင့် ရှိသူ ဒေါက်တာခိုင်မြဲက ပြောကြားသည်။

ကျောင်းသား၏ ဉာဏ်ရည် ဉာဏ်သွေးအရ တက်ရောက်လို သည့် အတန်းတွင် စာလိုက်နိုင်မှု ရှိ၊ မရှိ တိုင်းတာနိုင်ရန် တက် ရောက်လိုသော အတန်းအောက် တစ်ဆင့်နိမ့်အတန်း၏ ပညာရေး ၀န်ကြီးဌာန သင်ရိုးညွှန်းတမ်းပါ ဘာသာရပ်များကို Plancement Test ဖြေဆိုရန် သတ်မှတ်ထား သည်။

‘‘နိုင်ငံတကာ ကျောင်းတွေ ကနေဆို တက္ကသိုလ်ဝင်စာမေး ပွဲ ၀င်ဖြေလို့မရတဲ့ ကန့်သတ်ချက်ရှိနေတော့ နိုင်ငံတကာကျောင်း ပြီးတဲ့ ကလေးက နိုင်ငံခြားကျောင်း သွားတက်ရတာများတယ်။ ပြည် တွင်းတက္ကသိုလ်ဆက်တက်လို့ မရဘူး။ ဒါကြောင့် ကျောင်းပြောင်း လျှောက်ကြတာ များတယ်’’ဟု အထက(၄)ဗိုလ်တထောင်မှ အ ထက်တန်းပြဆရာမတစ်ဦးက ပြောသည်။

နိုင်ငံတကာကျောင်းများ မှ မြန်မာအစိုးရသင်ရိုးသင် ကျောင်း များသို့ ကူးပြောင်းတက်ရောက် နိုင်ရန် ၂၀၁၄-၁၅ ပညာသင်နှစ် က စတင်ခွင့်ပြုခဲ့သည်။

၂၀၁၇-၁၈ ပညာသင်နှစ် တွင် ကျောင်းသား၊ ကျောင်းသူ ၃၀၀ ခန့် ပြောင်းရွှေ့တက်ရောက် ပြီး န၀မတန်းသို့ တက်ရောက်သူ အများဆုံးဖြစ်သည်။

၂၀၁၈-၁၉ ပညာသင်နှစ် အခြေခံပညာ ကျောင်းများကို ဇွန်လ ၁ ရက်တွင် စတင်ဖွင့်လှစ်ခဲ့သည်။

Top News