၂၁ ရာစု ပင်လုံအစည်းအဝေးကျင်းပရန် ရက်သတ်မှတ်ရေး အစိုးရနှင့် အပစ်ရပ်အဖွဲ့များ ထပ်မံညှိနှိုင်းမည်

 ပြည်ထောင်စုငြိမ်းချမ်း ရေးညီလာခံ-၂၁ ရာစုပင်လုံ တတိယ အစည်းအဝေးကို ဇွန်လ ၃၀ ရက်တွင် စတင်ကျင်းပရန် အစိုးရက  အဆိုပြုထားသော်လည်း တိုင်းရင်းသားလက်နက်ကိုင်အဖွဲ့များဘက်က အဆင်သင့်မဖြစ် သေး၍ ညီလာခံကျင်းပမည့် ရက် သတ်မှတ်နိုင်ရေး ထပ်မံတွေ့ဆုံ ညှိနှိုင်းမည်ဟု နှစ်ဖက်ကိုယ်စား လှယ်များက ပြောသည်။

၂၁ ရာစုပင်လုံ ကျင်းပမည့် ရက်သတ်မှတ်ရေးအတွက် တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေးသဘောတူစာချုပ် (NCA)လက်မှတ်ထိုးအဖွဲ့ ထိပ်သီးခေါင်းဆောင်များသည် ဇွန်လ ၁၁ ရက်တွင် ထိုင်းနိုင်ငံ ချင်းမိုင်မြို့၌ တွေ့ဆုံညှိနှိုင်းသော်လည်း အစိုးရ အဆိုပြုသည့် ဇွန်လ ၃၀ ရက်တွင် ကျင်းပရန် ပြေလည်မှုမရခဲ့ပေ။

‘‘ကျွန်တော်တို့ အဖွဲ့အစည်း၁၀ ဖွဲ့ကြားမှာ ဆွေးနွေးပွဲ တချို့လုပ်ဖို့လိုတော့ ဇူလိုင် ၁၀ ရက်နေ့ လုပ်ရင် အဆင်ပြေနိုင်တယ်လို့ ကျွန်တော်တို့ ဆုံးဖြတ်တယ်လေ။  ဒါပေမဲ့ အဲဒါကို အစိုးရနဲ့ ပြန်ပြီးတော့ ညှိရမယ်။ အစိုးရက လက်ခံ၊မခံပေါ့’’ဟု ရခိုင်လွတ်မြောက် ရေးပါတီ(ALP) ဒုဥက္ကဋ္ဌ ခိုင်စိုးနိုင် အောင်က ပြောသည်။

အစိုးရ ကိုယ်စားလှယ် ဦးဇော်ဌေးကလည်း ‘‘သူတို့ လျာထားတာတွေ့တယ်။ ကျွန်တော်တို့နဲ့ ပြန်ညှိမယ်။ လာမယ့်တစ်ပတ်လောက် မှာ တွေ့ဖို့တော့ မှန်းထားတယ်’’ ဟု ပြောသည်။

အစိုးရ၊ တပ်မတော်နှင့် အပစ်ရပ် အဖွဲ့များအကြား ငြိမ်းချမ်းလုပ်ငန်းစဉ်နှင့် ပတ်သက်ပြီးအ ဆင်မပြေမှုများ ရှိနေ၍ ၂၀၁၇ မေလက ကျင်းပသည့် ၂၁ ရာစုပင်လုံ ဒုတိယအစည်းအဝေးပြီး နောက် တစ်နှစ်ကျော်ကြာသည် အထိ မကျင်းပနိုင်သေးပေ။  ၂၁ရာစုပင်လုံကို ခြောက်လတစ်ကြိမ် ကျင်းပရန် သတ်မှတ်ထားရာ  ၂၀၁၇ ဒီဇင်ဘာတွင် မကျင်းပနိုင်၍ ၂၀၁၈ ဇန်န၀ါရီလကုန်သို့ လည်းကောင်း၊ ဇန်န၀ါရီလကုန်မှ  ဧပြီလကုန် (သို့မဟုတ်) မေလဆန်း သို့လည်းကောင်း၊ ထို့နောက် မေလကုန်သို့လည်းကောင်း အ ကြိမ်ကြိမ် ရွှေ့ဆိုင်းခဲ့ရသည်။ မေလကုန်တွင်လည်း မကျင်းပနိုင် ဘဲ အစည်းအဝေး ကျင်းပနိုင်ရန် အလွတ်သဘော ဆွေးနွေးမှုများမှတစ်ဆင့် ညှိနှိုင်းနေသည်။

NCA စာချုပ်ပါ ငြိမ်းချမ်းရေးလုပ်ငန်းစဉ်အရ ၂၁  ရာစု ပင်လုံကျင်းပနိုင်ရေး နှောင့်နှေးနေခြင်း သည် အမျိုးသားအဆင့် နိုင်ငံရေး ဆွေးနွေးပွဲများ အဆင်မပြေ ဖြစ်ခဲ့ခြင်း၊ အလွတ်သဘောဆွေးနွေးပွဲများ မအောင်မြင်သေးခြင်း၊ တပ်မတော်နှင့် အပစ်ရပ်အဖွဲ့အချို့အကြား ပဋိပက္ခများရှိခဲ့ခြင်းတို့ ကြောင့်ဖြစ်သည်ဟု ဆွေးနွေးရေး ကိုယ်စားလှယ်များက ပြော သည်။

More in News Section

Top News