တောင်ကိုရီးယားနှင့် ပူးတွဲ စစ်ရေးလေ့ကျင့်မှုများ ရပ်ဆိုင်းမည့် ထရမ့်၏ ဆုံးဖြတ်ချက်အတွက် အမေရိကန် အစိုးရ ဖြေရှင်းနေရ

တောင်ကိုရီးယားနှင့် ပူးတွဲ စစ်ရေးလေ့ကျင့်နေသည့် အစီအစဉ်များ ရပ်ဆိုင်းရန် သမ္မတ ဒေါ်နယ်လ်ထရမ့်၏ ဆုံးဖြတ်မှုနှင့် ပတ်သက်၍ အမေရိကန် အစိုးရ အနေဖြင့် ဖြေရှင်းမှုများ ပြုလုပ်နေရသည်။

မြောက်ကိုရီးယား ခေါင်းဆောင် ကင်မ်ဂျုံအန်းနှင့် စင်ကာပူတွင် သမိုင်းဝင် တွေ့ဆုံခဲ့ချိန်၌ ထရမ့်က တောင်ကိုရီးယားနှင့် အမေရိကန်တို့ ပူးပေါင်း စစ်ရေးလေ့ကျင့်မှုများ ရပ်ဆိုင်းပေးရန် ကင်မ်၏ တောင်းဆိုမှုကို လိုက်လျောမည်ဟု ကတိခံခဲ့သည်။ သတင်းစာ ရှင်းလင်းပွဲတွင်လည်း ယင်းကိစ္စနှင့် ပတ်သက်၍ မှန်ကန်ကြောင်း ထရမ့်က အတည်ပြု ပြောဆိုသွားခဲ့သည်။

အဆိုပါ လုပ်ရပ်သည် အမေရိကန်၏ အရှေ့အာရှဒေသ အဓိက မဟာမိတ်များဖြစ်သည့် တောင်ကိုရီးယားနှင့် ဂျပန်တို့ကို အငိုက်မိ အံ့ဩသွားစေခဲ့သည်။ ထို့အပြင် မဟာမိတ် နိုင်ငံများ အနေဖြင့် လုံခြုံရေး ကဏ္ဍအတွက် အမေရိကန်အပေါ် အပြည့်အဝ ယုံကြည် အားကိုး၍ ရနိုင်မရနိုင် ဝေဖန်ဆန်းစစ်မှုများလည်း ရှိလာသည်။

ထို့အပြင် အမေရိကန် ဒုတိယ သမ္မတ မိုက်ခ်ပန့်စ်ကလည်း ထရမ့်၏ ယခုဆုံးဖြတ်ချက်နှင့် ပတ်သက်၍ အမေရိကန် လွှတ်တော် အမတ်များ လက်ခံသဘောတူအောင် နာရီပေါင်း အတန်ကြာ အကျေအလည် ဆွေးနွေး တင်ပြခဲ့ရသည်။ ထိုပြဿနာအပေါ် အမေရိကန် အနေဖြင့် မဟာမိတ် နိုင်ငံများနှင့်ပါ ချိတ်ဆက် ဖြေရှင်းရမည့် အလားအလာ ရှိနေသည်။

မြောက်ကိုရီးယား အနေဖြင့် ယင်းသို့သော စစ်ရေးလေ့ကျင့်မှုများသည် ၎င်းတို့၏ အချုပ်အခြာ အာဏာကို ခြိမ်းခြောက်နေသည်ဟု ခံစားမိကြောင်း ကင်မ်က အရေးဆိုခဲ့သည့်နောက် စစ်ရေးလေ့ကျင့်မှုများ ရပ်တန့်ပေးရန် ထရမ့်က သဘောတူခဲ့ခြင်း ဖြစ်သည်။ သို့သော် ထိုအပြောင်းအလဲကြောင့် ဂျပန်နှင့် တောင်ကိုရီးယားတို့၏ လုံခြုံရေး ကဏ္ဍအတွက် စိုးရိမ်စရာ အနေအထားများ ပေါ်ပေါက်လာနိုင်သည်။

အမေရိကန် ဒုတိယ သမ္မတ ပန့်စ်က လွှတ်တော် အမတ်များနှင့် တွေ့ဆုံချိန်၌ အမေရိကန် စစ်တပ်သည် မဟာမိတ်များနှင့် ပုံမှန် ထိတွေ့သည့် စစ်ရေးလေ့ကျင့်မှု လုပ်ငန်းစဉ်များကိုမူ ဆက်လက် ဆောင်ရွက်နေမည်ဟု ဖြေရှင်း ပြောကြားခဲ့သည်။ သို့သော် ယင်းသတ်မှတ်ချက်နှင့် ပတ်သက်၍လည်း မည်သည့် အတိုင်းအတာထိ လေ့ကျင့်မှုများ ကြီးမား ကျယ်ပြန့်နိုင်သည် ဆိုခြင်းကို ထပ်ဆင့် အငြင်းပွားမှုများ ဖြစ်ပေါ်လျက်ရှိသည်။

Ref: Wall Street Journal

Top News