ဟိုသီသူပုန်များ လက်မှ ဆိပ်ကမ်းမြို့ တစ်မြို့ကို သိမ်းယူရန် ယီမင်စစ်တပ် ထိုးစစ်ဆင် တိုက်ခိုက်

ထောက်ပံ့ရေး လမ်းကြောင်းများ ဝင်ရောက်နိုင်ရေးအတွက် အထူးတလည် အချက်အခြာကျသည့် ဆိပ်ကမ်းမြို့ တစ်မြို့ကို သူပုန်များ လက်မှ ပြန်လည် ရရှိရေးအတွက် ယီမင်စစ်တပ်က တိုက်ပွဲများ စတင် ဆင်နွှဲနေကြောင်း သိရသည်။

ဇွန်လ ၁၃ ရက် မနက်ပိုင်းမှစ၍ နိုင်ငံ အနောက်ဖက်စွန်းရှိ ဟူဒါယာဒါသို့ ချီတက်ခဲ့သော ယီမင် တပ်များသည် မြို့ကို သိမ်းဆည်းထားသည့် ဟိုသီ သူပုန်များနှင့် တိုက်ထုတ်ရန် ကြိုးစားနေခြင်း ဖြစ်သည်။ ယီမင် တပ်များကို ဆော်ဒီ အာရေးဘီးယား ဦးဆောင်သည့် အာရပ် မဟာမိတ် အင်အားစုများက ဝန်းရံ ကူညီပေးနေသည်။

ယီမင်တွင် ဆော်ဒီက ထောက်ခံသည့် လက်ရှိ အစိုးရနှင့် အီရန်၏ ကျောထောက်နောက်ခံ ပြုမှုကို ရရှိထားသည့် ဟိုသီ သူပုန်တို့ကြား နှစ်နှင့်ချီ ကြာမြင့်သည့် ပြည်တွင်းစစ် ဖြစ်ပွားလျက် ရှိသည်။ လက်ရှိ စစ်ဆင်ရေး ပြုလုပ်နေသော ဟူဒါယာဒါသည် ယီမင်သို့ ထောက်ပံ့ရေး ပစ္စည်းများ တင်ပို့ရန် အရေးအပါဆုံး ရေလမ်းကြောင်း ဝင်ပေါက်တစ်ခုသဖွယ် တည်ရှိနေသည်။

ဆော်ဒီ အစိုးရက ဟူဒါယာဒါရှိ ဟိုသီများ အနေဖြင့် မြို့ကို စွန့်ခွာရန် ကြိုတင် အချိန်သတ်မှတ်ပြီး ရာဇသံ ပေးခဲ့သော်လည်း လိုက်နာမှု မရှိခဲ့သည့်နောက် စစ်ဆင်ရေး အစပြုလာခြင်း ဖြစ်သည်။

ဆော်ဒီရှိ အယ်လ် အာရေးဘီးယား ရုပ်မြင်သံကြား ကွန်ရက်က ဟူဒါယာဒါ လွတ်မြောက်ရေးအတွက် အလွန် ကြီးမားသည့် ထိုးစစ်တစ်ရပ် စတင် ဆင်နွှဲနေပြီဟု ဖော်ပြခဲ့သည်။ ယီမင်၏ မြေပြင်ထိုးစစ်ကို ဆော်ဒီနှင့် မဟာမိတ် နိုင်ငံများက လေကြောင်း ပစ်ကူပေးပြီး ဟိုသီတို့ကို တိုက်ခိုက်နေခြင်း ဖြစ်သည်။

ယခုအခါ ဆိပ်ကမ်းဧရိယာ အပြင်ဖက် ရပ်ကွက်များတွင် ပေါက်ကွဲသံများ၊ သေနတ်သံများ ဆူညံကျယ်လောင်စွာ ကြားနေရကြောင်း မျက်မြင်များက ပြောကြားခဲ့သည်။

ယီမင်တွင် ပြည်တွင်းစစ် ဖြစ်ပွားခဲ့သည့် သုံးနှစ်မျှ ကာလအတွင်း လက်နက်ကိုင် ပဋိပက္ခများကြောင့် လူပေါင်း တစ်သောင်းမျှ အသက်ဆုံးရှုံးခဲ့ရပြီး ဖြစ်သည်။

Ref: EPA

Top News