မိုင်တဲလ်ဆင်းမ်ကတ်သုံးသူ တစ်သိန်းကျော်နေပြီဟု ဆို

ဓာတ်ပုံ − ဂျေမောင်မောင်(အမရပူရ)

 ဈေးကွက်အတွင်း ဆင်းမ်ကတ် သုံးသန်းဖြန့်ချိထားပြီး အသုံးပြုသူ တစ်သိန်းကျော် ပိုင်ဆိုင်ထားကြောင်း အသစ်ဝင်ရောက်လာသည့် စတုတ္ထမြောက် ဖုန်းအော်ပရေတာ မိုင်တဲလ်၏ ပြင်ပဆက်ဆံရေးအရာရှိချုပ် ဦးဇော်မင်းဦးက ပြောသည်။


မြန်မာ့ဆက်သွယ်ရေးလုပ်ငန်းသည် အသုံးပြုသူ ၂၅ သန်း ကျော်ပိုင်ဆိုင်ပြီး တယ်လီနောက အသုံးပြုသူ ၁၉ သန်းကျော် ပိုင်ဆိုင်ထားသည်။ အလားတူ အူရီးဒူး၌ အသုံးပြုသူ ကိုးသန်းကျော်ရှိသည်။

မိုင်တဲလ်သည် ဆင်းမ်ကတ်များကို မတ်လ ၁၅ ရက်ကစတင်ကာ နေပြည်တော်ကောင်စီနယ်မြေ၊ ပဲခူးတိုင်းအရှေ့ခြမ်းနှင့် ကရင်ပြည်နယ်တွင် ရောင်းချခဲ့ပြီး ရန်ကုန်အပါအ၀င် တိုင်းနှင့် ပြည်နယ်အနှံ့တွင် ဇွန်လ ၉ ရက်၌ စတင်ရောင်းချခဲ့သည်။

မိုင်တဲလ်သည် အခြားသော ဆက်သွယ်ရေးအော်ပရေတာ များထက် ပရိုမိုးရှင်းပမာဏပိုမိုပေးအပ်ကာ ဈေးကွက်အတွင်း ၀င်ရောက်လာခြင်း ဖြစ်သည်။ ‘‘ကျွန်တော်တို့ မျှော်မှန်းထားတဲ့ ပမာဏထက် ပိုရောင်းရမယ်လို့ ထင်တယ်’’ဟု ဦးဇော်မင်းဦးက ပြောသည်။

လက်ရှိ၌ မိုင်တဲလ်သည် ‘မိုက်တယ်’အမည်ရှိ Packageတစ်ခုတည်းသာ မိတ်ဆက်ထားပြီး အခြားသော Package များ ဆက်လက်မိတ်ဆက်ရန် ပြင်ဆင်နေကြောင်း ကုမ္ပဏီက ကြေညာသည်။

ကျပ် ၄,၀၀၀ ကျသင့်သည့် အဆိုပါ Package တွင် အင်တာ နက် 5GB၊ အသံခေါ်ဆိုမှု မိနစ် ၂၅၀ ပါဝင်သည်။ ‘‘ကျွန်တော်တို့ ဟန်းဆက်တွေနဲ့လည်း တွဲရောင်းမယ်။ အဲဒီမှာလည်း အပိုထပ် ဆောင်းတွေပေးမယ်’’ဟု ဦးဇော်မင်းဦးက ပြောသည်။

မိုင်တဲလ်၏ ကွန်ရက်သည် ရန်ကုန်တိုင်းအတွင်း စတင်မိတ်ဆက်စဉ် ဖိုက်ဘာဆက်ကြောင်းလိုအပ်ချက်ရှိသဖြင့် ကွန်ရက်နှေး ကွေးမှု အနည်းငယ်ဖြစ်ပေါ်မည်ဟု ၎င်းက ပြောသည်။

Top News