ရေနံနှင့် သဘာဝဓာတ်ငွေ့တူးဖော်ရေးရှယ်ယာထည့်ဝင်ရန် မြန်မာနိုင်ငံသားပိုင်ကုမ္ပဏီများ မှတ်ပုံမတင်သေး

 ရေနံနှင့်သဘာဝ ဓာတ်ငွေ့တူးဖော်ထုတ်လုပ်ရေးလုပ်ငန်းများတွင် နိုင်ငံခြားရေနံကုမ္ပဏီများနှင့် အကျိုးတူပူးပေါင်းရန် ဖိတ်ခေါ်ထားသော်လည်း ၁၀ ရက်ခန့်ကြာသည်အထိ လာရောက်မှတ်ပုံတင်သည့် ပြည်တွင်း ကုမ္ပဏီတစ်ခုမျှမရှိသေးကြောင်း လျှပ်စစ်နှင့် စွမ်းအင်ဝန်ကြီးဌာန ညွှန်ကြားရေးမှူး ဒေါ်ခင်ခင်အေးက ပြောသည်။

နိုင်ငံခြားကုမ္ပဏီများနှင့်အတူ အစုရှယ်ယာထည့်ဝင်မည့် မြန်မာနိုင်ငံသားပိုင်ကုမ္ပဏီများသည် လျှပ်စစ်နှင့် စွမ်းအင်ဝန်ကြီးဌာနသို့ မှတ်ပုံတင်ရမည်ဖြစ်ကြောင်း ၀န်ကြီးဌာနက ဇူလိုင် ၃ ရက်တွင် ကြေညာသည်။


‘‘အခုထိတော့ ကုမ္ပဏီတစ်ခုမှ လာရောက်မှတ်ပုံတင်ခြင်းမရှိသေးဘူး’’ဟု ဇူလိုင် ၁၂ ရက်တွင်ပြုလုပ်သော လျှပ်စစ်နှင့် စွမ်းအင်ဝန်ကြီးဌာန တစ်လတစ်ကြိမ် သတင်းစာရှင်းလင်းပွဲ၌ 7Day သတင်းစာ၏ မေးမြန်းမှုကို ၎င်းက ပြန်လည်ဖြေကြားသည်။

ပုံစံများဖြည့်သွင်းရခြင်းနှင့် လိုအပ်သည့် အချက်အလက်များကြောင့် မြန်မာနိုင်ငံသားပိုင်ကုမ္ပဏီများမှတ်ပုံမတင်သေးခြင်းဖြစ်နိုင်ပြီး မှတ်ပုံတင်ရန် နောက်ဆုံးရက် သတ်မှတ်ထားခြင်းမရှိကြောင်း ဒေါ်ခင်ခင်အေးကဆိုသည်။

‘‘မြန်မာကုမ္ပဏီတွေအနေနဲ့ ရေနံနဲ့ သဘာဝရှာဖွေတူးဖော်တဲ့ နည်းပညာတွေရစေချင်လို့၊ နိုင်ငံတကာအတွေ့အကြုံရစေချင်လို့ နိုင်ငံခြားကုမ္ပဏီတွေနဲ့ တွဲဖက် ရင်းနှီးမြှုပ်နှံတဲ့အတွက် အကျိုးအမြတ်တွေရစေချင်တယ်’’ဟု နိုင်ငံခြားကုမ္ပဏီများနှင့် အကျိုးတူပူးပေါင်းမှုအပေါ် ထုတ်လုပ်မှုစီမံရေးဌာနခွဲ ရေနံနှင့် သဘာဝဓာတ်ငွေ့စီမံရေးဦးစီးဌာနမှ ဒေါ်ခင်ခင်အေးက မှတ်ချက်ပြုသည်။

လစ်လပ်လုပ်ကွက်များတွင် ရေနံနှင့် သဘာဝဓာတ်ငွေ့ရှာဖွေတူးဖော်ထုတ်လုပ်ခြင်းလုပ်ငန်းများကို ထုတ်လုပ်မှုအပေါ် ခွဲဝေခံစားရေးစာချုပ်၊ ရေနံတိုးတက်ထုတ်ယူရရှိရေးစာချုပ်ဖြင့် နိုင်ငံခြားရေနံကုမ္ပဏီများနှင့် အကျိုးတူပူးပေါင်းဆောင်ရွက်ရန် အပြည်ပြည်ဆိုင်ရာ တင်ဒါခေါ်ယူမည်ဖြစ်ကြောင်း ၎င်းက ပြောသည်။

တင်ဒါခေါ်ယူရာတွင် ကမ်းလွန်လုပ်ကွက် ၁၃ ကွက်၊ ကုန်တွင်းလုပ်ကွက် ၁၈ ကွက် ပါဝင်ကြောင်း ဒေါ်ခင်ခင်အေးက ပြောသည်။