နေပြည်တော်မှ ပြန်သယ်လာသည့် ဗိုလ်ချုပ်လက်ရေးမူကို ရေနံချောင်းတွင် မြို့လုံးကျွတ်ကြို

ဦးခင်အောင်မြင့်က ဗိုလ်ချုပ်လက်ရေးမူစာအုပ်အား ရေနံချောင်းမြို့မိ၊ မြို့ဖများနှင့် အထက(၁)ကျောင်းအုပ်ဆရာမသို့ ပြန်လည်ပေးအပ်နေစဉ် ဓာတ်ပုံ - NLD

နေပြည်တော်မှ နတ်မောက်သို့ ပြန်လည်သယ်ဆောင်လာသော ဗိုလ်ချုပ်အောင်ဆန်းပါဠိလက်ရေးမူစာအုပ် ကြိုဆိုပွဲကို သြဂုတ် ၁၆ ရက်ညနေတွင် ဆရာတော်အရှင်ဆန္ဒာဓိက ဦးဆောင်ပြီး ရေနံချောင်းမြို့လုံးကျွတ် ကြိုဆိုခဲ့ကြသည်။

““စာအုပ်ပြန်ရလို့လည်း တစ်မြို့လုံးက ပျော်နေကြပါတယ်။ အခမ်းအနားတွေ၊ အတီးအမှုတ်တွေနဲ့ကို ကြိုဆိုကြတာ။ တစ်မြို့လုံးပဲ”” ဟု ဗိုလ်ချုပ်အောင်ဆန်းပါဠိလက်ရေးမူစာအုပ် ရရှိရေးကော်မတီ ဥက္ကဋ္ဌ ဦးသာချိုကပြောသည်။

အမျိုးသားလွှတ်တော်ဥက္ကဋ္ဌဦးခင်အောင်မြင့်က ဗိုလ်ချုပ်အောင်ဆန်းလက်ရေးမူစာအုပ် ရေနံချောင်းသို့ ပြန်လည်ပေးအပ်မည်ဟု ပြောထားသောကြောင့် စာအုပ်ရရှိရေးကော်မတီအဖွဲ့မှ သြဂုတ် ၁၆ ရက်က နေပြည်တော်သို့ သွားရောက်ယူဆောင်ခဲ့သည်။ နေပြည်တော်၌ အဆိုပါစာအုပ်ပေးအပ်ပွဲသို့ ဒေါ်အောင်ဆန်းစုကြည်နှင့် အမျိုးသားလွှတ်တော်ဥက္ကဋ္ဌ ဦးခင်အောင်မြင့်တို့ တက်ရောက်ခဲ့ပြီး ရေနံချောင်း မြို့မိ၊ မြို့ဖများနှင့် အ.ထ.က(၁) ရေနံချောင်း ကျောင်းအုပ်ဆရာမကြီးပါဝင်သောအဖွဲ့အား အမျိုးသားလွှတ်တော်ဧည့်ခန်းမဆောင်တွင် လွှဲပြောင်းပေးအပ်ခဲ့သည်။

ဇူလိုင် ၁၉ ရက်တွင် ရေနံချောင်းမြို့သို့ရောက်ရှိလာသော အမျိုးသားလွှတ်တော်ဥက္ကဋ္ဌ ဦးခင်အောင်မြင့်သည် ရေနံချောင်း အမှတ် (၁)အထက်တန်းကျောင်းသို့ ရောက်ရှိပြီး ရေနံချောင်းမြို့သူ မြို့သားများ အမြတ်တနိုးဂုဏ်ယူစွာ ထိန်းသိမ်းစောင့်ရှောက်ထားသော ဗိုလ်ချုပ်အောင်ဆန်း၏လက်ရေးဖြင့် ရေးသားထားသည့် ပါဠိစာအုပ်ကို ရေနံချောင်း အမှတ်(၁) ကျောင်းအုပ်ဆရာမကြီးထံမှ တောင်းယူသွားခဲ့ခြင်း ဖြစ်သည်။

ထိုသို့တောင်းယူသွားခြင်းကြောင့် ဒေသခံမြို့သူမြို့သားများနှင့် ရေနံချောင်းဇာတိဖြစ်သော ဆရာတော် အရှင်ဆန္ဒာဓိကမှ ရေနံချောင်းအမှတ် (၁) အထက်တန်းကျောင်းသို့ ပြန်ထားရှိရန်အတွက် တောင်းဆိုထားသော အသံဖိုင်တစ်ခုကို ရေနံချောင်းမြို့သူမြို့သားများထံ ဇူလိုင် ၂၂ ရက်က ပေးပို့ခဲ့သည်။

More in News Section