ဖုန်းပြောခနှင့် ၀န်ဆောင်ခများလျှော့ချရန် အမ်ပီတီ တရားဝင်သတင်းထုတ်ပြန်မည်

အမ်ပီတီအနေဖြင့် ဖုန်းပြောခများအပါအ၀င် ၎င်းတို့၏ ၀န်ဆောင်မှုအသုံးပြုခများ လျှော့ချပေးခြင်းကို ဇန်န၀ါရီ ၉ ရက်နေ့တွင် တရားဝင် သတင်းထုတ်ပြန်မည်ဖြစ်ကြောင်း သတင်းရရှိသည်။

‘‘MPT က လက်ရှိပေးနေတဲ့ ၀န်ဆောင်မှုအားလုံးနဲ့ ပတ်သက်ပြီး ဖြေလျှော့မှုတွေ ပြုလုပ်ပေးသွားမယ့်ဟာကို ပြောသွားမှာ ဖြစ် ပါတယ်။ ဘာတွေ ဘယ်လိုပုံစံနဲ့ ပေးသွားမယ်ဆိုတာကတော့ အဲဒီနေ့ကျရင် တရားဝင်သိရမှာ ဖြစ်ပါတယ်’’ဟု မြန်မာ့ဆက်သွယ်ရေးလုပ်ငန်း စီးပွားရေးဌာနမှ ဒါရိုက်တာ ဦးစောထူးသာက ပြောသည်။

အမ်ပီတီက လျှော့ချပေးသွားမည့် ၀န်ဆောင်မှုများမှာ ဖုန်းပြောခများ၊ အင်တာနက်အသုံးပြုခများနှင့် ဆင်းမ်ကတ်ဝယ်လျှင် ကျပ်တစ်သောင်းဖြင့် အင်တာနက်လျှောက်ရသည့် ၀န်ဆောင်မှုများပါဝင်ပြီး အခြားသော ၀န်ဆောင်မှုများကိုလည်း လျှော့ချပေးသွားမည်ဖြစ်ကာ  ဈေးနှုန်းအတိအကျကို တရားဝင်ထုတ်ပြန်မည်ဖြစ်ကြောင်း သတင်းရရှိသည်။

လက်ရှိတွင် မြန်မာ့ဆက်သွယ်ရေးလုပ်ငန်းအနေဖြင့် ဖုန်း ပြောခ တစ်မိနစ်လျှင် ၅၀ ကျပ်နှင့် SMS တစ်စောင်လျှင် ၂၅ ကျပ်နှုန်းဖြင့် ကောက်ခံလျက်ရှိပြီး ပြည်ပအော်ပရေတာ နှစ်ခုက ဖုန်း ပြောခ တစ်မိနစ်လျှင် ၂၅ ကျပ်နှင့် SMS တစ်စောင်လျှင် ၁၅ ကျပ်နှုန်းဖြင့် ကောက်ခံလျက်ရှိသည်။


မြန်မာ့ဆက်သွယ်ရေးလုပ်ငန်းအနေဖြင့် နိုင်ငံတစ်ဝန်းတွင် ဆင်းမ်ကတ်ပေါင်း ၁၄ သန်း ၀န်းကျင်အထိ ရောင်းချပေးထားပြီး အဆိုပါအရေအတွက်မှာ ပြည်တွင်း၌ မိုဘိုင်းဖုန်းအသုံးပြုသူအားလုံး၏ ၉၀ ရာခိုင်နှုန်းကျော် ရှိကြောင်း အော်ပရေတာများ၏ ထုတ်ပြန်မှုစာရင်းများအရ သိရသည်။

Top News