တစ်ပတ်အတွင်း ရွေးကောက်ပွဲသတင်းတိုများ

ဒီချုပ်အမတ်အား ဓားဖြင့်ခုတ်သူများကို ရွေးကောက်ပွဲပြီးမှ စတင်စစ်ဆေးမည်
အမျိုးသားဒီမိုကရေစီအဖွဲ့ချုပ်မှ လွှတ်တော်ကိုယ်စားလှယ်နှင့်အဖွဲ့ဝင်နှစ်ဦးအား ဓားဖြင့်ခုတ်သူသုံးဦးကို ရွေးကောက်ပွဲပြီးမှသာ စတင်စစ်ဆေးမည်ဖြစ်ကြောင်း အောက်တိုဘာ ၃၀ ရက်ရုံးချိန်း၌ သာကေတမြို့နယ် တရားရုံးက ပြောသည်။ အောက်တိုဘာ ၂၉ ရက်ညပိုင်းက သာကေတမြို့နယ်တွင် ဦးနိုင်ငံလင်းအပါအဝင် ဒီချုပ်အမတ်လောင်းများ မဲဆွယ်စည်းရုံးစဉ် ဒီချုပ်မြို့နယ်အတွင်းရေးမှူး ကွမ်းယာဆိုင်တွင် ရေဝင်သောက်ရာမှ ဇော်လတ်ဆိုသူနှင့် စကားများရန်ဖြစ်ကာ ဒီချုပ်အမတ်လောင်းများ ဓားဖြင့် ခုတ်ခံရခြင်းဖြစ်သည်။ အဆိုပါ ဓားခုတ်မှုကို မတုံ့ပြန်ရန် ဒီချုပ်က အရေးပေါ်ကြေညာချက်ထုတ်ပြန်ထားသည်။

ရွေးကောက်ပွဲရလဒ်ကို တည်တည်ငြိမ်ငြိမ်လက်ခံရန် ဒေါ်အောင်ဆန်းစုကြည်တိုက်တွန်း
၂၀၁၅ ရွေးကောက်ပွဲတွင် အမျိုးသားဒီမိုကရေစီအဖွဲ့ချုပ်သည် မည်သည့်ရလဒ်ရရှိသည်ဖြစ်စေ တည်တည်ငြိမ်ငြိမ်ဖြင့် လက်ခံကြရန် ဒေါ်အောင်ဆန်းစုကြည်က အောက်တိုဘာ  ၃၀ ရက်တွင် ဗီဒီယိုဖိုင်မှတစ် ဆင့် တိုက်တွန်းပြောကြားသည်။ ထို့ပြင် ရွေးကောက်ပွဲတည်ငြိမ်အေးချမ်းစွာ ပြီးဆုံးနိုင်ရေးအတွက် ယင်းနေ့တွင် ရုန်းရင်းဆန်ခတ်မှုများမဖြစ်ပွားစေရေး အချင်းချင်းထိန်းသိမ်းကြရန်နှင့် မဲစာရင်းတွင် အမည်မပါသဖြင့် မဲပေးခွင့်မရခဲ့ပါကလည်း ပြဿနာမရှာဘဲ ညှိနှိုင်းကြရန် ဒေါ်အောင်ဆန်းစုကြည်က ပြောကြားသည်။


ရွေးကောက်ပွဲအေးချမ်းစွာပြီးဆုံးရန် သီတင်းကျွတ်လပြည့်နေ့တွင် ဆုတောင်း
အောက်တိုဘာ ၂၈ ရက် သီတင်းကျွတ်လပြည့်နေ့တွင် ရွှေတိဂုံစေတီတော်သို့လာရောက်ဖူးမြော်သူများထဲတွင် ရွေးကောက်ပွဲအေးချမ်းစွာ ပြီးဆုံးရန် ဆုတောင်းသူများရှိခဲ့သည်။ ဆုတောင်းသူများသည် ရွေးကောက်ပွဲအေးချမ်းစွာပြီးဆုံးရန်နှင့် ကောင်းမွန်သည့်အစိုးရတစ်ရပ်တက်လာရန်၊ အမျိုးသားဒီမိုကရေစီအဖွဲ့ချုပ်အနိုင်ရရန်၊ လွတ်လပ်ပြီး တရားမျှတစွာဖြင့် အနိုင်ရပါတီကို အာဏာလွှဲပေးရန် စသည့်အချက်များဆုတောင်းခဲ့ကြသည်။

ဘာသာရေးနှင့်သက်ဆိုင်သော နေရာများတွင် ပါတီများမဲဆွယ်မှု ၁၇ ရာခိုင်နှုန်းရှိ
နိုင်ငံရေးပါတီများပြည်သူလူထုနှင့်တွေ့ဆုံ၍ မဲဆွယ်စည်းရုံးမှုပြုလုပ်ရာတွင် ဘာသာရေးနှင့် သက်ဆိုင် သော နေရာများ၌ပြုလုပ်ခြင်းမှာ ၁၇ ရာခိုင်နှုန်းရှိသည်ဟု ရွေးကောက်ပွဲစောင့်ကြည့်လေ့လာရေးအဖွဲ့ PACE အစီရင်ခံစာ၌ ဖော်ပြထားသည်။ လူထုဟောပြောပွဲများကို ကိုယ်ပိုင်အိမ်၊ ရုံးခန်းများတွင် ပြုလုပ်မှုမှာ ၄၂ ရာခိုင်နှုန်းရှိပြီး ဒုတိယအများဆုံးမှာ ဘာသာရေးဆိုင်ရာ နေရာများ၌ ပြုလုပ်ခြင်းဖြစ်သည်ဟုဆိုသည်။ ထိုသို့ ဘာသာရေးဆိုင်ရာနေရာများအသုံးပြုရာ၌ ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီနှင့် အခြားပါတီ ကြီးငယ်များ၊ တစ်သီးပုဂ္ဂလများသည် အမျိုးသားဒီမိုကရေစီအဖွဲ့ချုပ်ပါတီထက် ပိုများသည်ဟု အစီရင်ခံစာတွင် ပါရှိသည်။

ရွေးကောက်ပွဲရက်မီးမပြတ်ရန် မီးစက်များအသင့်ဆောင်ထားရန် တာဝန်ရှိသူပြော
ရွေးကောက်ပွဲပြုလုပ်မည့်ရက်တွင် မဲရုံများ၌ မီးစက်များအဆင်သင့်ဆောင်ထားရန်လိုကြောင်း ရန်ကုန် မြို့တော်လျှပ်စစ်ဓာတ်အားပေးရေးကော်ပိုရေးရှင်း (YESC)မှ ဒုတိယအင်ဂျင်နီယာချုပ်က ပြောသည်။ ရွေးကောက် ပွဲပြုလုပ်မည့်ရက်တွင် လျှပ်စစ်မီးပြတ်တောက်မှုမရှိစေရန် အစွမ်းကုန် ပြင်ဆင်စောင့်ကြည့်မည်ဖြစ်သော်လည်း အကြောင်းအမျိုးမျိုးကြောင့် မီးပြတ်တောက်မှုရှိလာပါက ရွေးကောက်ပွဲဆိုင်ရာလုပ်ငန်းစဉ်များ အနှောင့်အယှက်မဖြစ်စေရေး သက်ဆိုင်ရာမဲရုံများအလိုက် မီးစက်များ အဆင်သင့်ထားရှိရန် လိုအပ်နေသည် ဟု ၎င်းက ပြောသည်။

ရွေးကောက်ပွဲမကျင်းပနိုင်သည့်နေရာများထပ်မံကြေညာ
လွတ်လပ်ပြီး တရားမျှတသောရွေးကောက်ပွဲကျင်းပရန် အခြေအနေမရှိဟုဆိုသည့် ရှမ်းပြည်နယ် တောင်ပိုင်းမှ မိုင်းရှူး၊ ကျေးသီးမြို့နယ်နှင့် ရှမ်းပြည်နယ်မြောက်ပိုင်း တန့်ယန်းမြို့နယ်မှ ကျေးရွာအုပ်စု ရှစ် အုပ်စု၊ ဟိုပန် မြို့နယ်မှ ကျေးရွာအုပ်စု ၄၂ စုတို့တွင် ရွေးကောက်ပွဲမကျင်းပနိုင်တော့ဟု ရွေးကောက်ပွဲ ကော်မရှင်က အောက်တိုဘာ ၂၇ ရက်၌ သတင်းထုတ်ပြန်သည်။ ရှမ်းအမျိုးသား ဒီမိုကရေစီအဖွဲ့ချုပ်(SNLD)က ယင်းကြေညာချက်အပေါ် ကန့်ကွက်စာထုတ်ခဲ့ပြီး SNLD ပါတီအထွေထွေအတွင်းရေးမှူး ဦးစိုင်း ညွန့်လွင်က ၎င်းတို့ပါတီနိုင်ရန် သေချာနေသည့် မဲဆန္ဒနယ်များကို တမင်အကြောင်းပြ၍ ရွေးကောက်ပွဲ မလုပ်နိုင်ရန် ပြုလုပ်ခြင်းဖြစ်ကြောင်း ပြောကြားသည်။

ရွေးကောက်ပွဲမကျင်းပနိုင်သည့်နေရာများကြေညာပြီးနောက် တိုက်ပွဲများပြင်းထန်
ရှမ်းပြည်နယ်တောင်ပိုင်းမိုင်းရှူးနှင့် ကျေးသီးမြို့နယ်တို့တွင် လုံခြုံရေးအခြေအနေအရ ရွေးကောက်ပွဲ မကျင်းပနိုင်တော့ဟု ရွေးကောက်ပွဲကော်မရှင်က ကြေညာခဲ့ပြီးနောက် ယင်းဒေသများတွင် မြန်မာ့တပ်မတော် နှင့် ရှမ်းပြည်တပ်မတော်မြောက်ပိုင်း(SSPP/SSA)တို့ဖြစ်ပွားနေသည့် တိုက်ပွဲများ ပိုမိုပြင်းထန်လာခဲ့သည်။ နိုဝင်ဘာ ၂၈ ရက်မှစကာ တိုက်ပွဲများပိုမိုပြင်းထန်လာကာ စစ်ဘေးသင့်သူဦးရေ ၄,၀၀၀ ကျော်ရှိနေပြီဖြစ်သည်ဟု ရှမ်းပြည်နယ်တောင်ပိုင်း လူငယ်ကွန်ရက်မှ သတင်းရရှိသည်။

Top News