ဒန်း ပန်းမျိုးစိတ်သစ် တနင်္သာရီ သဘာဝ ကြိုးဝိုင်းတွင် တွေ့ရှိ

ကမ္ဘာတွင် မှတ်တမ်းတင်ထားခြင်းမရှိသည့် မျိုးစိတ်သစ် ဒန်းပန်းတစ်မျိုးကို တနင်္သာရီ သဘာဝကြိုးဝိုင်းတွင် တွေ့ရှိရကြောင်း ပန်းမန်သုတေသနပညာရှင် ဒေါက်တာစောလွင်က ပြောသည်။

ပန်းမျိုးစိတ်သစ်ကို ၂၀၁၅ သြဂုတ်က အမှတ်မထင်တွေ့ရှိခဲ့ရပြီး မျိုးစိတ်သစ်အဖြစ် အတည် ပြုရန် ဒေါက်တာစောလွင်အပါ အ၀င် နယ်သာလန်နိုင်ငံ Leiden University တွင် ဒန်းပန်းမျိုးအုပ် စုများနှင့်ပတ်သက်၍ လေ့လာသုတေသနပြုလုပ်နေသူ ပါရဂူကျောင်းသားမစ္စတာ Saroj Ruchisansakun နှင့် ဒေါက်တာ သက်ယုနွယ်တို့ ၂ နှစ်ကြာ သုတေသနပြုလုပ်ခဲ့သည်။

‘‘စတွေ့တွေ့ချခြင်းမှာ မျိုးစိတ်သစ်ဟုတ်၊ မဟုတ်မသေချာသေးတဲ့အတွက် သုတေသနလုပ်ခဲ့တာပါ။ အဲဒါကြောင့် ချက်ချင်း မကြေညာနိုင်ခဲ့ဘူး။ အခုတော့ ကမ္ဘာ့အသိအမှတ်ပြု သိပ္ပံသုတေသနဂျာနယ်ကလည်း အသိအမှတ်ပြု လိုက်ပါပြီ’’ဟု ဒေါက်တာစောလွင်က ပြောသည်။

ပန်းမျိုးစိတ်အသစ် ဖော်ထုတ်တွေ့ရှိမှု သုတေသနဆောင်းပါးကို သိပ္ပံသုတေသနနယ်ပယ်တွင် လူအများ အသိအမှတ်ပြုထားသည့် Phytotaxal ဂျာနယ်တွင် ဆောင်းပါးအနေဖြင့် ပြီးခဲ့သည့် ဖေဖော်ဝါရီ ၁၅ ရက်က ဖော်ပြခဲ့သည်။

တွေ့ရှိထားသည့် ပန်းမျိုးစိတ်သစ်မှာ ဒန်းပန်းအုပ်စုဝင်ဖြစ်ပြီး သိပ္ပံအမည် Impatiens ဖြစ်သည်။ ကမ္ဘာပေါ်တွင် အဆိုပါမျိုးအုပ်စုဝင် ပန်းများကို အ၀ါရောင်၊ အဖြူရောင်၊ လိမ္မော်ရောင်၊ အနီရောင်၊ အပြာရောင်ဖြင့် မျိုးစိတ် တစ်ထောင်ခန့်တွေ့ရှိနိုင်သည်။

ယခုတွေ့ရှိထားသည့် မျိုးစိတ်သစ် ဒန်းပန်း၏ အရောင်မှာ ပန်းရောင်ဖြစ်ပြီး အမည်ကို တနင်္သာရီဒန်းပန်းဟု အမည်ပေးထားကြောင်း ဒေါက်တာစောလွင်က ပြောသည်။

မိုးရာသီတွင် ပန်းပွင့်ပြီး မိုးအကုန် ဆောင်းအကူးရာသီ၌ အသီးသီးကာ နေအပူရှိန်ကြောင့် ပေါက်ထွက်ပြီး အလေ့ကျအပင် ပေါက်ကြသဖြင့် မျိုးသုဉ်းမည့်အန္တရာယ်ရင်ဆိုင်ရခြင်းမရှိကြောင်း၎င်းက ပြောသည်။

မျိုးစိတ်သစ်အဖြစ် တွေ့ရှိထားသည့် အဆိုပါ ဒန်းပန်းနှင့် ပတ်သက်၍ စာတမ်းပြုစုရေးသားမည်ဟု ဒေါက်တာစောလွင်က ပြောသည်။