ပြည်ထောင်စုတပ်မတော်တစ်ခုတည်းထားရှိရန် တောင်ကြီးဆွေးနွေးပွဲတွင် သဘောတူ

(၆၈)နှစ်မြောက် တပ်မတော်နေ့တွင် ဗိုလ်ချုပ်မှူးကြီး မင်းအောင်လှိုင်က စစ်ရေးပြတပ်ဖွဲ့ဝင်များကို စစ်ဆေးနေစဉ် ဓာတ်ပုံ-ငြိမ်းချမ်းနိုင်/EPA

မြန်မာနိုင်ငံတွင်  ပြည်ထောင်စုတပ်မတော်တစ်ခုတည်းသာ လက်နက်ကိုင်အဖွဲ့အစည်းအဖြစ် ထားရှိရန် ပြည်ထောင်စုရေးရာ၊ တိုင်းရင်းသားအလုပ်ရုံဆွေးနွေးပွဲ ပါဝင်သူများက သဘောတူညီလိုက် ကြောင်း သတင်းရရှိသည်။

ထိုသို့ ပြည်ထောင်စုတပ်မတော်တစ်ခုတည်းဖြစ်ရန်မှာ စစ်မှန်သော ဖက်ဒရယ်ပြည်ထောင်စုစနစ် ဦးစွာတည်ဆောက်ရမည်ဟု တက်ရောက်လာသူများက ဆုံးဖြတ်ချက်ချခဲ့သည်။ တိုင်းရင်းသားအားလုံးပါဝင် သော ပြည်ထောင်စုတပ်မတော်ဖြစ်ရန်အတွက် အသက် (၁၈)နှစ်ပြည့်ပြီးသူတုိုင်း တပ်မတော်တွင် စစ်မှုသုံးနှစ် မဖြစ်မနေထမ်းဆောင်ရမည်ဖြစ်၍ ပြည်ပရန်ကာကွယ်ရေးကိုသာ ဦးစားပေးလုပ်ဆောင်ရမည်ဖြစ်ကြောင်း တပ်မတော်၏အခန်းကဏ္ဍကို အလုပ်ရုံဆွေးနွေးပွဲ၌ ဆွေးနွေးခဲ့ကြသည်။

ပြည်တွင်းတွင် တိုင်းရင်းသား လက်နက်ကိုင်အဖွဲ့ကြီး (၁၁)ဖွဲ့နှင့် အခြားလက်နက်ကိုင်အဖွဲ့ငယ်များ ရှိနေသော်လည်း ဖက်ဒရယ်ပြည်ထောင်စုစနစ်ကို ကျင့်သုံးမည်ဆိုပါက ယင်းအဖွဲ့အစည်းများအားလုံးပါ ၀င်သော ပြည်ထောင်စုတပ်မတော်ကို တည်ဆောက်နိုင်မည်ဖြစ်ကြောင်း မွန်ဒေသလုံးဆိုင်ရာ ဒီမိုကရေစီပါတီဥက္ကဋ္ဌ ဦးနိုင်ငွေသိန်းကပြောသည်။

ပြည်ထောင်စုတပ်မတော်တွင် ပြည်သူများရွေးချယ်တင်မြှောက်ထားသော သမ္မတသည် အစိုးရအဖွဲ့၏ အကြီးအကဲဖြစ်သကဲ့သို့ တပ်မတော်၏ အကြီးအကဲလည်းဖြစ်ရမည်ဖြစ်ပြီး ၎င်းလက်အောက်တွင် ကာကွယ်ရေးဝန်ကြီးရှိရမည်ဖြစ်ကြောင်း အလုပ်ရုံဆွေးနွေးပွဲ၌ သဘောတူညီခဲ့ကြသည်။ ယခုလ ဒုတိယပတ်အတွင်း ရှမ်းပြည်နယ်၊ တောင်ကြီးမြို့၌ ဗေဒါ နိုင်ငံတော်တည်ဆောက်ရေးသင်တန်းကျောင်းမှ စီစဉ်သော ပြည်ထောင်စုရေးရာ၊ တိုင်းရင်းသားရေးရာ အလုပ်ရုံဆွေးနွေးပွဲကို လွှတ်တော်ကိုယ်စားလှယ်များ၊ နိုင်ငံရေးပါတီများ၊ လူမှုရေးအသင်းအဖွဲ့များနှင့် လေ့လာသူ(၈၁)ဦး တက်ရောက်၍ သဘောတူညီချက်ရရှိခဲ့ခြင်းဖြစ်သည်။

More in Politics Section