ရန်ကုန်မြို့တော် စည်ပင်ဥပဒေမူကြမ်းအသစ်မှာ ဌာနသုံးခုသာထားဖို့ ရေးဆွဲထား

Thu, 2017-10-19 16:31 -- zaythu

အသစ်ပြန်လည်ရေးဆွဲထားတဲ့ ရန်ကုန်မြို့တော်စည်ပင်သာယာရေး ဥပဒေမူကြမ်းမှာ စည်ပင်ဌာန သုံးခုသာ ထားရှိမှာဖြစ်ပြီး ကျန်တဲ့ဌာနတွေကို ဖျက်သိမ်းဖို့ ရေးဆွဲထားတယ်လို့ သတင်းရရှိပါတယ်။ အဲဒီ့ ဥပဒေမူကြမ်းအရ စီးပွားရေးနဲ့စီမံခန့်ခွဲရေးဌာန၊ လုံခြုံရေးနဲ့စည်းကမ်းထိန်းသိမ်းရေးဌာန၊ ပြည်သူ့ဆက်ဆံရေးဌာနတို့ သာကျန်ရှိမယ်လို့ သိရပါတယ်။

အသစ်ပြန်လည်ရေးဆွဲတဲ့ ဥပဒေမူကြမ်းကို ရန်ကုန်မြို့တော် စည်ပင်သာယာရေးကော်မတီက ဌာနမှူးတွေ ပါဝင်တဲ့ကော်မတီနဲ့ ဥပဒေပညာရှင်၊ ဗိသုကာပညာရှင်တွေနဲ့ လွှတ်တော်ကိုယ်စားလှယ်တွေ ပူးပေါင်းဖွဲ့စည်းထားတဲ့ကော်မတီတို့က ရေးဆွဲထားတာဖြစ်ပါတယ်။ မူကြမ်းကို တော့ ရန်ကုန်မြို့တော်စည်ပင်သာယာရေးဥပဒေ မူကြမ်းစိစစ်ရေး ကော်မတီကနိုဝင်ဘာလမှာ အပြီးသတ်စိစစ်မှာဖြစ်ပါတယ်။  

အဲဒီနောက်မှာတော့ ဥပဒေကြမ်းအပေါ် လွှတ်တော်ကိုယ်စားလှယ်တွေနဲ့ ပြည်သူတွေရဲ့ အသံကို နားထောင်နိုင်ဖို့အတွက်  အများပြည်သူ ကို ချပြသွားမယ်လို့ သိရပါတယ်။ လာမယ့်ဒီဇင်ဘာလမှာတော့ အဲဒီ့မူကြမ်းကို လွှတ်တော်မှာ အတည်ပြုနိုင်ဖို့ ဆောင်ရွက်မှာဖြစ်ပြီး နောက်နှစ်မတ်လမှာ စည်ပင်ရွေးကောက်ပွဲကို ကျင်းပဖို့ရှိတယ်လို့ ဦးလှဌေးကပြောပါတယ်။

အသစ်ရေးဆွဲထားတဲ့ စည်ပင်ဥပဒေမူကြမ်းအရ ရန်ကုန်မြို့တော်စည်ပင်သာယာရေးကော်မတီကို  မြို့တော်ဝန်၊ အစိုးရက ခန့်အပ်တဲ့ ကော်မတီဝင် လေးဦး၊ ပြည်သူကရွေးချယ်မယ့် ကော်မတီဝင် ခြောက်ဦးတို့နဲ့ ဖွဲ့စည်းသွားမယ်လို့လည်း သိရပါတယ်။
လက်ရှိ ရန်ကုန်မြို့တော်စည်ပင်သာယာရေး ကော်မတီမှာ ဌာန ၂၁ရှိပါတယ်။

ရုပ်သံသတင်းထောက် - အိမ့်မြတ်နိုးဇော်

Thursday, October 19, 2017