ဂျပန်ဦးနှောက်ရောင်ကာကွယ်ဆေး ဆရာဝန်စစ်ဆေးချက် ရယူပြီးမှ ထိုးပေးတော့မယ်

Mon, 2017-11-20 16:17 -- zaythu

ဆရာဝန်ရဲ့ စစ်ဆေးချက်ရယူပြီးမှ ဂျပန်ဦးနှောက်ရောင်ကာကွယ်ဆေး ထိုးပေးတော့မယ်လို့ သတင်းရရှိပါတယ်။ 

ကလေးတွေကို ဘေးကင်းစေဖို့ ရောဂါစစ်ဆေးတာတွေ၊စောင့်ကြည့်တဲ့လုပ်ငန်းတွေကို စနစ်တကျလုပ်ဆောင်ချင်တာကြောင့်  ကာကွယ်ဆေးထိုးနှံရမယ့်ရက်ကို ထပ်တိုးဖို့ စီစဉ်နေပါတယ်။  ကျောင်းတွေမှာလည်း ဆရာဝန်အင်အား ထပ်ဖြည့်ပေးဖို့လည်း လုပ်ဆောင်နေတယ်လို့ ပြောပါတယ်။ 

ဒီနေ့ နိုဝင်ဘာ ၂၀ ရက်ကစပြီး ကာကွယ်ဆေးထိုးမယ့် ကလေးတွေကို ကျောင်းတွေမှာ ဆရာဝန်စစ်ဆေးချက်ရယူပြီးမှသာ ထိုးပေးတော့မှာဖြစ်ပါတယ်။ ပထမကတော့ တစ်နိုင်ငံလုံးက စာသင်ကျောင်းတွေမှာ ကျောင်းအခြေပြုအနေနဲ့  နိုဝင်ဘာလ(၁၅) ရက်နေ့ နိုဝင်ဘာ(၂၃)ရက်အထိ ထိုးနှံသွားဖို့ သတ်မှတ်ထားတာဖြစ်ပါတယ်။  ကျောင်းအခြေပြုအစီအစဉ်မှာ ကလေးငယ် ကိုးသန်းခွဲကို ထိုးနှံပေးသွားမှာဖြစ်ပြီး လက်ရှိမှာ နိုဝင်ဘာလ၁၇ရက် အထိ ကလေးငယ် ငါးသန်းကျော်ကို ကာကွယ်ဆေး ထိုးနှံပေးခဲ့ပြီးဖြစ်ပါတယ်။ 

ကာကွယ်ဆေး ထိုးပြီးတဲ့ ကလေးငယ် ငါးသန်းကျော်ထဲက စိတ်လှုပ်ရှားတာ၊ မူးဝေတာ၊ အန်တာ၊ ဖျားတာ စတဲ့  နောက်ဆက်တွဲ သာမာန် လက္ခဏာတွေဖြစ်ပွားတဲ့ ကလေးငယ်နှစ်ထောင်ကျော်ရှိပြီး နောက်ဆက်တွဲပြင်းထန်လက္ခဏာဖြစ်ပွားတဲ့  ကလေးငယ်ကတော့ သုံးဦးရှိတယ်လို့ ကျန်းမာရေးနဲ့ အားကစားဝန်ကြီးဌာနမှ သိရပါတယ်။

အသက်၉လကနေ အသက်၁၅နှစ်အရွယ်ကလေး ငယ် ၁၄သန်းကျော်ကို  နိုဝင်ဘာလမှာ ကျောင်းအခြေပြု အစီအစဉ်၊ ဒီဇင်ဘာလမှာ ပြည်သူလူထု အခြေပြု အစီအစဉ်နဲ့ထိုးနှံသွားမှာဖြစ်ပါတယ်။ 

ကာကွယ်ဆေးကို မွေးရာပါ ရောဂါအခံရှိသူတွေ၊ နာတာရှည် ရောဂါခံစားနေရသူတွေ၊ ကိုယ် ဝန်ဆောင်မိခင်တွေ၊အတက်ရောဂါ ရှိသူတွေ၊ HIV ဆေးသောက်သုံး နေရသူတွေ၊ တီဘီဆေးနှစ်လ အောက် သောက်သုံးနေ ရသူတွေနဲ့ လတ်တလောအပူကြီးပြီး ဖျားနေတဲ့ကလေးများ၊ ကူးစက်ရောဂါ ဖြစ်ပွားသူတွေ ထိုးနှံဖို့ မသင့်ကြောင်း ကျန်းမာရေးနဲ့ အားကစား ဝန်ကြီးဌာနက ထုတ်ပြန်ထားပါတယ်။

ရုပ်သံသတင်းထောက် - လွင်သဲငယ်ဦး 

Monday, November 20, 2017

Top News