လှိုင်ဒေသကောလိပ် အာစီတူးမှာ ဘွဲ့ကြို သင်တန်းတွေ ပြန်ဖွင့်တော့မယ်

Fri, 2017-11-24 18:14 -- zaythu

ရန်ကုန်တက္ကသိုလ်ရဲ့ ဘွဲ့ကြိုပထမနှစ်သင်တန်းတွေကို လှိုင်နယ်မြေမှာရှိတဲ့ ဒေသကောလိပ် (၂) (RC -2)မှာ ဒီဇင်ဘာလကစပြီး ဖွင့်လှစ်သွားတော့မှာဖြစ်တယ်လို့ သတင်းရရှိပါတယ်။

ရန်ကုန်တက္ကသိုလ်ထဲမှာ စာသင်ဆောင်ခုနစ်ဆောင်ရှိပြီး  ဘွဲ့ကြိုဘာသာရပ် သင်တန်းတွေဖွင့်လှစ်ရာမှာ ကျောင်းသားတွေ များလာပြီး စာသင်ဆောင်တွေ မလုံလောက်တာကြောင့် ရန်ကုန်တက္ကသိုလ်လှိုင်နယ်မြေမှာရှိတဲ့ ဒေသကောလိပ်  ၂ နေရာကို ပြုပြင်မွမ်းမံပြီး ဒီနှစ်မှာ ဖွင့်လှစ်တော့မှာဖြစ်တယ်လို့ ပညာရေးဝန်ကြီးဌာနရဲ့ တာဝန်ရှိသူတစ်ဦးကပြောပါတယ်။

ဘွဲ့ကြို ပထမနှစ်သင်တန်း တက်ရောက်ကြမယ့် ပထမနှစ်ကျောင်းသားကျောင်းသူတွေ အသုံးပြုနိုင်ဖို့ RC-2မှာရှိတဲ့ စာသင်ဆောင်တွေနဲ့ ကျောင်းအိမ်သာတွေကို  အောက်တိုဘာလကတည်းက ပြန်လည်ပြုပြင်နေပြီးကျောင်းဖွင့် အမီ အပြီးပြုပြင်သွားမှာဖြစ်ပါတယ်။

အခုလိုပြန်လည်ပြင်ဆင်တဲ့လုပ်ငန်းတွေကို  ရန်ကုန်တက္ကသိုလ်ရဲ့ ဒီဘဏ္ဍာနှစ်ဘတ်ဂျက်နဲ့ လုပ်ဆောင်နေတာဖြစ်ပြီး လိုအပ်ပါက အဆင့်မြင့်ပညာဦးစီးဌာနက ဘတ်ဂျတ်ထပ်မံချထားပေးမယ်လို့ သိရပါတယ်။ ရန်ကုန်တက္ကသိုလ်(လှိုင် နယ်မြေ)မှာရှိတဲ့ ဒေသကောလိပ် ၂ မှာ  ရန်ကုန်တက္ကသိုလ်ဘွဲ့ကြိုပထမနှစ်သင်တန်းတွေကို ဒီဇင်ဘာ ၄ ရက်မှာ  စတင်ဖွင့်လှစ်မှာဖြစ်ပြီး  ၂၀၁၇- ၂၀၁၈ ပညာသင်နှစ်ရဲ့  ရန်ကုန်တက္ကသိုလ်ဝင်ခွင့်ရ ကျောင်းသား၊ ကျောင်းသူတွေတက်ရောက်ရမှာဖြစ်ပါတယ်။

ဒါ့အပြင်  RC-2နေရာမှာ ဖွင့်လှစ်ထားတဲ့  ရန်ကုန်ပညာရေးတက္ကသိုလ်လေ့ကျင့်ရေးအထက်တန်းကျောင်း TTC (လှိုင်နယ်မြေ)မှ အတန်းတွေကိုလည်း  ဒီဇင်ဘာ ၁ ရက်ကစပြီး  TTC (ကမာရွတ်နယ် မြေ)မှာရှိတဲ့ ငါးထပ်ကျောင်းဆောင်သစ်ကို ပြောင်းရွှေ့ ဖွင့်လှစ်တော့မှာဖြစ်တယ်လို့ သိရပါတယ်။ ရန်ကုန်တက္ကသိုလ်(လှိုင် နယ်မြေ)မှာရှိတဲ့ ဒေသကောလိပ်၂ ကို ၁၉၇၇ခုနှစ်မှ ၁၉၈၁ခုနှစ် အထိဖွင့်လှစ်ခဲ့တာဖြစ်ပါတယ်။

အဲ့ဒီနောက်ပိုင်း ရန်ကုန်တက္ကသိုလ်(လှိုင်နယ်မြေ)ကို ပိတ်ထားခဲ့ရာ ၂၀၀၀ ပြည့်နှစ်မှာတော့ ရန်ကုန် ပညာရေးတက္ကသိုလ် လေ့ကျင့်ရေး အထက်တန်းကျောင်းရဲ့  သူငယ်တန်းမှ ပဉ္စမတန်းအထိ အတန်းတွေကို ဒေသကောလိပ် ၂  ၀န်းအတွင်းမှာ ပြန်လည်ဖွင့်လှစ်ခွင့်ပြုခဲ့တာဖြစ်ပါတယ်။

ရုပ်သံသတင်းထောက် - လွင်သဲငယ်ဦး 

Friday, November 24, 2017

Top News