တရုတ် ကျောက်မီးသွေးစက်ရုံဟောင်းများ နိုင်ငံတွင်းဝင်မလာရေး သတိထားသင့်

တရုတ်နိုင်ငံအနေဖြင့် ၎င်းတို့နိုင်ငံ၌ ဖျက်သိမ်းလိုက်သည့်  စက်ရုံအဟောင်းများကို ပြန်လည်ရောင်းချမည့် အရိပ်အယောင်များတွေ့နေရသဖြင့် ယင်းစက်ရုံအဟောင်းများ နိုင်ငံအတွင်း ရောက်ရှိမလာစေရေး အထူး သတိထား ဆောင်ရွက်သင့်ကြောင်း ပြည်သူ့လွှတ်တော် သယံဇာတနှင့် သဘာဝပတ်ဝန်းကျင်ထိန်းသိမ်းရေးဆိုင်ရာ ကော်မတီအတွင်းရေးမှူး ဦးသိန်းလွင်က ပြောသည်။


စွမ်းအင်လိုအပ်ချက်အရ မြန်မာနိုင်ငံရှိ ပြည်နယ်နှင့် တိုင်းဒေသကြီးအချို့တွင် ကျောက်မီးသွေးသုံး လျှပ်စစ်ဓာတ်အားပေးစက်ရုံများ တည်ဆောက်ရန် လျှပ်စစ် စွမ်းအားဝန်ကြီးဌာနက ဆောင်ရွက်နေခြင်းကို ရည်ရွယ်ပြောကြားခဲ့သည်။

 ‘‘လွှတ်တော်ထဲမှာ ကျွန် တော့်အနေနဲ့ တောက်လျှောက် ပြောလာတာက လျှပ်စစ်ဓာတ်အား ပိုထုတ်ဖို့အတွက် မဖြစ်မနေ ကျောက်မီးသွေး  စက်ရုံတွေ ဆောက်ရမယ်ဆိုရင် သဘာဝပတ်ဝန်းကျင်ထိန်းသိမ်းရေးကို မထိခိုက်စေဖို့ အနည်းဆုံးဖြစ်စေမယ့် အနေအထားနဲ့ ဆောင်ရွက်ပါလို့ တင်ပြခဲ့တယ်။ တရုတ်မှာ အခု ကျောက်မီးသွေးစက်ရုံ ခြောက်ထောင်ကျော်လောက်ကို ပိတ်သိမ်းထားတာရှိတယ်။ အရမ်းကြေးကြီးတယ်။ စွန့်ပစ်စက်ရုံသုံးရင် အရမ်းထိခိုက်မယ်’’ဟု ဦးသိန်းလွင်က ပြောကြားသည်။

 မကြာမီက မိမိတို့တက်ရောက်ခဲ့သည့် တရုတ်နိုင်ငံတွင် ကျင်းပပြုလုပ်ခဲ့သော ပစိဖိတ် ဒေသတွင်းဆိုင်ရာ စွမ်းအင်ဆွေး နွေးပွဲ၌  ဆွေးနွေးခဲ့သည့်  အကြောင်းအရာများအနက် တရုတ် နိုင်ငံအနေဖြင့် ဒေသတွင်းဆင်းရဲသော နိုင်ငံများမှ ကျောက်မီးသွေးသုံးဓာတ်အားပေးစက်ရုံများ တည်ဆောက်ရန်နှင့် အခြေခံအဆောက်အအုံများ ဖွံ့ဖြိုးတိုးတက်ရေးအတွက် ငွေချေးရန် Asian Infrastructure Investment Bank (AIIB) ကို တည်ထောင်နေပြီဟု သိရှိခဲ့ကြောင်း၎င်းက ဆိုသည်။

‘‘ဒါသိပ်အရေးကြီးတယ်။ ဆင်းရဲတဲ့ နိုင်ငံတွေ မြန်မာအပါအ၀င် လာအို၊ ကမ္ဘောဒီးယားလို နိုင်ငံတွေက ကျောက်မီးသွေး ဓာတ်အားပေးစက်ထောင်ရင် သူငွေချေးမှာပဲ။ ချေးရင် ဘာလုပ်မလဲ ငွေချေးသူက ငွေရှင်သတ်မှတ်တာလိုက်နာရမယ်။ သူ့ချေးငွေ နဲ့ သူတို့ဆီက အဟောင်းတွေကို ယူလို့ မလုပ်ဘူး မပြောနိုင်ဘူး။ ဒါကို တိုင်းပြည်နဲ့ လူမျိုးအပါအ၀င်  အစိုးရက သတိထားရမယ်’’ဟု အဆိုပါကဏ္ဍတွင် နှစ်ပေါင်း ၄၀ ကျော်ကြာ အတွေ့အကြုံရှိခဲ့သူ ဦးသိန်းလွင်က ဆက်လက်ပြောကြားသည်။

 အဆိုပါကျောက်မီးသွေး ဓာတ်အားပေးစက်ရုံများ တည်ဆောက်ရေးကိစ္စရပ်နှင့် ပတ်သက်၍ လွှတ်တော်ကိုယ်စားလှယ်အ ချို့က လွှတ်တော်တွင် မေးခွန်းများ မေးမြန်းခဲ့ပြီး ဒေသခံပြည်သူများက အဆိုပါကိစ္စရပ်ကို ကန့်ကွက်နေကြောင်း တင်ပြခဲ့သည်။

သို့သော်လည်း လျှပ်စစ်စွမ်းအားဝန်ကြီးဌာနက နိုင်ငံ၏ စွမ်းအင်လိုအပ်ချက်အရ အဆိုပါ ကျောက်မီးသွေးစက်ရုံများ တည်ဆောက်ရန် ဆက်လက်လုပ်ဆောင်မည်ဖြစ်ကြောင်း လွှတ်တော်သို့ တင်ပြခဲ့သည်။

မြန်မာနိုင်ငံတွင် ရှမ်းနှင့် မွန် ပြည်နယ်၊ ရန်ကုန်၊ တနင်္သာရီ၊ စစ်ကိုင်း၊ ဧရာဝတီတိုင်းဒေသကြီးတို့တွင် တည်ဆောက်ရန် လျာထားသည့် ကျောက်မီးသွေးသုံး လျှပ်စစ်ဓာတ်အားပေးစက်ရုံ ၁၂ ရုံ ရှိပြီး ရှစ်ရုံမှာ စူးစမ်းလေ့လာသည့် အစီရင်ခံစာ ထွက်ရှိနေပြီ ဖြစ်သည်။

အစီရင်ခံစာပြီးစီးသည့် စက်ရုံရှစ်ရုံသည် ယခုအချိန်တွင် ပတ်ဝန်းကျင်ထိခိုက်မှုစစ်တမ်းပြုလုပ်နေပြီဖြစ်ကြောင်း လျှပ်စစ်စွမ်းအားဝန်ကြီးဌာနမှ တာဝန်ရှိသူ တစ်ဦးက ပြောသည်။

လျှပ်စစ်စွမ်းအားဝန်ကြီးဌာနနှင့် နားလည်မှုစာချွန်လွှာ လက်မှတ်ရေးထိုးထားသည့် စက်ရုံ ၁၁ ရုံ ရှိပြီး လက်မှတ်မထိုးရသေးသည့် စီမံကိန်းတစ်ခုရှိသည်။